creativemongolia

Category: professional-advisors

  • Доржготовын ЧИМЭДЦЭРЭН

    Хөтөч- аялагч

    1986 онд Өвөрхангай аймгийн Төгрөг суманд төрсөн. 1994- 1999 онд Төгрөг сумын 10 жил, 2000- 2004 онд Арвайхээр хотын I, II 10 жилүүдэд бүрэн дунд боловсрол эзэмшин, 2008- 2009 онд Япон улсын Токио хотын Аояама Гакуйн Их сургууль, 2005- 2010 онд МУИС-ийн Олон Улсын Харилцааны Сургуулийг бакалавр зэрэгтэй төгссөн.

    Өөрийгөө илүү таньж, олохын тулд нарийн боовны цехэд хэвлэгч, рестаронд зөөгч, үйлчлэгч, аяга таваг угаагчаас эхлээд хүний эрх, эрүүл мэнд, эмэгтэйчүүдийн эрх- жендерийн чиглэлээр үйл ажиллагаа явуулдаг ТББ-уудад сайн дурын болон төсөл хөтөлбөрийн ажилтан хийж байсны зэрэгцээ эрдэм шинжилгээ, судалгаа, ногоон байгууламж, барилгын салбарын байгууллага, төслүүдэд орчуулагч, төслийн зохицуулагч зэрэг төрөл бүрийн талбарт өөрийгөө сорьж үзсэний дүнд “АЯЛАХ” буюу “үүргэвчээ үүрээд л замд гарах” гэдэг онцгой сонирхол нь өөрийгөө нээх, бусдыг ойлгох болоод амьдралыг ухаарах сонгодог хэлбэр болохыг мэдсэн бөгөөд өнөөг хүртэл Монгол орныхоо ихэнх нутаг болоод Япон, Хятад, Орос, Израйль, Недарланд, Бельги, Франц зэрэг улсуудаар ажил- аялалын шугамаар явснаас гадна 2014 оны 9 сараас 2015 оны 4 сар хүртэлх 7 сарын хугацаанд Зүүн Өмнөд Азийн улсуудаар ганцаарчилсан үүргэвчтэй аялалыг амжилттай хийгээд ирсэн. “Аялал, аялах” гэхээр их мөнгөтэй хүний хийх зүйл мэт боддог бол огт тийм биш. Хэрвээ та үнэхээр аялах сонирхолтой л бол чин сэтгэлээсээ тэмүүлж хүсэх хэрэгтэй. Бусад нь тэгээд л аяндаа болчихно. Нөгөөтэйгүүр хүн дуртай юмаа хийхээр ядардаггүй бөгөөд мөнгө/боломжууд ч араас дагадаг юм билээ. Ганцхан аялал ч биш ер нь өөрийгөө таньж мэдээд, хийх дуртай зүйлээ олчихоод түүнийхээ төлөө цаг нар хайхралгүй явах үнэхээр сайхан.

    Өвөг дээдсийнхээ хатуужил тэвчээрийг өөр дээрээ турших зорилгоор Монгол орныхоо өнцөг булан бүрт очих морин аялал болон хүний л очих боломжтой Дэлхийн бусад газар орнуудад ганцаарчилсан үүргэвчтэй аялалуудыг хийж эмэгтэй хүн ганцаараа хаана хүрч болохыг мэдэх хүсэлтэй нэгэн.

    https://chimedeee.wordpress.com

  • Чимэдцэрэнгийн ГЭРЭЛХҮҮ (АРЬСАН УРЛАЛ)

    Арьс ширэн дээр зураг урлаач

    1978 оны 1 сарын 13- нд Улаанбаатар хотод төрсөн. 1986- 1994 онд 10 жилийн 34-р дунд сургууль төгссөн. 1995 онд үсчин, 1996- 1998 онд 3-р цаxилгаан станцад засварчин, 1998- 2000 онд Польш улсад, 2000 онд Mоголжингоо, Бэст салонд үсчнээр тус тус ажиллаж байсан. 2001 онд Үсчдийн Гоёл наадмын тэргүүн байр эзэлж 1-р зэргийн үсчин болсон.
    2001- 2008 онд Гоёл салоныг эрхлэн ажиллуулсан.
    2008 оноос одоог хүртэл Франц улсад гэр бүлээрээ ажиллаж амьдарч байна.

    УРАН БҮТЭЭЛ
    Үxэр, адууны ширэн дээр уран бүтээл туурвих санааг дэлхийд анхлан гаргаж, бүтээлээ хийж байна. Их Эзэн Чингис Хаан, Зэв Жанжин, Ноён, Хатан, Францийн Жанна Д’Арк, Их Аварга Дагвадорж, Бетховен зэрэг бүтээлийг туурвисан. Цаашид энэхүү бүтээлээ 3D хэлбэрээр бүтээх зорилго тавин ажиллаж байна.

    https://facebook.com/ch.gerelhw
    https://www.facebook.com/Authentic-Skin-Design-And…

  • Д.Отгонтуяа (Tuyana)- имиджмакер

    Tayana Style Code Agency (Туяана стайл коде ажеси) үүсгэн байгуулагч, имиджмакер

    Имиджмакер Д.Отгонтуяа нь Fashion Stylist, гоо сайханч, Make up Artist, Image Maker, Hair stylest мэргэжилтэй. 2006 оноос хувь хүний имидж бүрдүүлэлтийн нарийн мэргэшилүүд болох хувь хүний өнгө тодорхойлох, гоо сайхан, үсний стилист, нүүр будалтын чиглэлүүдээр мэргэшин суралцаж, ажиллаж туршлага хуримтлуулсан.

    2003- 2006 онд Герман Улсын Штутгард хотын Хатагтай Бергитийн нэрэмжит загвар зохион 

    бүтээгчдийн коллежийг Moda Design, Fashion Stylist чиглэлээр суралцаж төгссөн.

    2005- 2011 онд Германы нэрт дизайнер Blut geschwister компани болон Abseitz botique-д стилист;

    2012- 2014 онд ХБНГУ-ын Штутгард хотын Хатагтай Леманы нэрэмжит гоо зүйч, 

    гоо сайхны сургуулийг Гоо Сайханч мэргэжлээр суралцан төгссөн.

    2015- 2016 онд ХБНГУ -ын Мюнхэн хотын “Woman Styling” сургуульд Color Consultation , 

    Stylist, Make up Artsist, Hair Stylist, Personal Shoper, Fashion Stylist мэргэжлүүдээр 

    суралцан төгссөн;

    2015 оноос Герман Улсын Munchen хотод хувь хүний имидж бүрдүүлэлтийн Style Code агентлагаа Woman Styling Lounge-тай хамтран ажиллуулж бизнесмэн, багш, урлаг соёлын 60 гаруй хүний хувийн зөвлөхөөр ажиллаж байсан туршлагатай.

    2017 оноос Монгол Улсдаа имиджмакерийн мэргэжлийн зөвлөх үйлчилгээг нэвтрүүлж Tuyana Style Code Agency нээн ажиллуулж байна.

    Та хувь хүний имиж бүрдүүлэлтийн зөвлөгөөг авснаар өөрийн дахин давтагдашгүй дүр төрхийг тодорхойлуулж, өөртөө зохицсон царай төрх, үсний өнгө, үсний засалт, хувцаслалтыг бүрдүүлснээр өөртэй итгэх итгэл нэмэгдэж, ажлын амжилт болон өдөр тутмын амьдралд эерэгээр өөрчлөгдөж, өөртөө сэтгэл хангалуун өөдрөг амьдралыг бий болгож чадна.

    Та олон нийттэй харилцдаг салбарт ажилладаг удирдагч, бизнес эрхлэгч, улс төрч, урлаг соёлын салбарт ажилладаг бол өөрийн имидж бүрдүүлэх нь маш чухал нөлөөтэй юм. Бид танд үйлчилэхдээ хувь хүний нууц хадгалах ёс зүйн дүрмийг чанд мөрдөн ажиллах болно.

    Бид нийгмийн хариуцлагын хүрээнд олон нийт, оюутан сурагчидад стайл, имиджийн боловсрол олгох лекц, сургалтыг зохион байгуулж ажилладаг.

    Та хувь хүний имиж бүрдүүлэлтийн зөвлөгөөг авснаар өөрийн дахин давтагдашгүй дүр төрхийг тодорхойлуулж, өөртөө зохицсон царай төрх, үсний өнгө ба засалт, хувцаслалтыг бүрдүүлж, өөртөө сэтгэл хангалуун өөдрөг амьдралыг бий болгож чадна. Та олон нийттэй харилцдаг салбарт ажилладаг удирдагч, бизнес эрхлэгч, улс төрч, урлаг соёлын салбарт ажилладаг бол өөрийн имижийг бүрдүүлэх нь маш чухал нөлөөтэй юм. Бид танд үйлчилэхдээ хувь хүний нууц хадгалах ёс зүйн дүрмийг чанд мөрдөн ажиллах болно.

    https://www.facebook.com/StyleCodeAgency/

  • Идэрийн УРАНГОО (URANGOOIDER)

    Urangooider брэндийг үүсгэн байгуулагч, хувцасны эмч, “Хувцаслалтын эрх чөлөө” номын зохиогч. Үндэсний агуулгатай өдөр тутмын хувцас болон хүн байгалийн амин шүтэлцээг илэрхийлсэн ОРГАНИК ФАЙШН загвар зохион бүтээдэг. Үндэсний онцлох брэндүүдийн нэгдэл @Creative Gallery -г хамтран үүсгэн байгуулагч.

    Байгалиас сэдэл санаагаа авч байгалийн гаралтай болон хөвөн даавуу, арьс ширэн материал голчлон ашигласан загваруудыг бүтээдэг. Монгол, Орос, Итали, Канад улсад загварын цуглуулгаа танилуулж байсан.

    Монгол Улсын Сити институт болон Солонгосын Коокмин их сургуулиуад суралцаж төгссөн. Гоёл наадмын 3 удаагийн шилдэг дизайнар, Газар дундын тэнгисийн орнуудын шилдэг дизайнер шагналыг тус тус хүртсэн.

    Юнител, Юнивишн, Скайтел зэрэг компанийн имиж бүрдүүлэлт, үйлчилгээний ажилтануудын хувцасны дизайн, үйлдвэрлэлийн ажилд хамтран ажиллаж байсан. Гоо зүй, хувцаслалт, имиж бүрдүүлэлтийн чиглэлээр зөвлөгөө сургалт зохион байгуулдаг.

    Бүх зүйл энгийн бөгөөд донжтой байх нь хамгийн сайхан. Хамгийн шилдэг нь энгийн бөгөөд таамаглашгүй тэр зүйл юм.

    URANGOOIDER brand is enriched by HANDMADE decorations. Creating an UNIQUE look with every piece of garment. 

    Love your garment and have fun wearing it !

    https://facebook.com/Urangoo-Ider-658032977614746
    http://urangooider.com

  • Эршүүгийн ОТГОНБАЯР (УРАН ЗУРАГ)


    Зураач

    Отгонбаяр нь найман хүүхэдтэй айлын нэг. 1998 онд Монгол зургийн ангийг төгсөж уран бүтээлч болох гараагаа эхэлжээ. Удалгүй Монгол зураг болон Монголын түүхийн судлаачаар бие даан ажиллаж байх үедээ Нүүдэлчидийн соёлын холбогдолтой угсаатан зүйн 400 гаруй судалгааны зураг зурж эмхэтгэсэн байдаг.

    2005 оноос Герман улсад амьдарч байгаа тэрээр Бер­лин хот дахь Германы Урлагийн Их Сургуульд урлаг судлаач, урлагийн менежер мэргэжлээр суралцаж 2010 онд урлагийн мастерийн зэрэгтэй төгссөн. 2010 онд Берлин хотод Отгонбаярын үүсгэн байгуулсан “ЗУРАГ” галерей нь Монголын урлагийн түүхэнд монгол хүний хилийн чанадад нээсэн анхны галерей юм.

    1996 онд анхны үзэсгэлэнгээ гаргаж, 2001 оноос хойш эх орондоо төдийгүй Герман, Голланд, Швед, Швейцарь, Франц, Япон, Чех, Энэтхэг зэрэг улсуудад үзэсгэлэн зохион байгуулсан.

    УРАН БҮТЭЭЛ

    Бурханы зураг

    Тэрбээр өнөө үеийхэнд уламжлалт урлагийг эерэг талаас нь таниулах, монголын соёлын өвийг хамгаалах зорилгоор монголын миниатур зургийн уламжлалт техникүүд болон угсаатан зүйг судалсан нь чамгүй үр дүнтэй явагдсан байна. Эдгээр уламжлалт техникүүдийн нэг нь “Thangka” бурханы зураг юм. Отгонбаяр энэ бясалгал мэт төвлөрөлтийн дээд цэгээр үйлдэгддэг өвөрмөц урлах ухааны уламжлалт техникийн аргыг ашиглан өнөөдрийг хүртэл 600 гаруй Бурхадыг бүтээжээ.

    Комик

    Отгонбаярын 1998 оноос ажиллаж байгаа нэгэн төсөл бол Монголын Нууц Товчоо-г Монгол Зургийн аргаар зурагжуулах юм. Энэ ном нийт 620 гаруй хуудастай 3000 орчим зурагтай аж. Тэрээр энэ бүтээлийнхаа талаар: “Манайхан “Монголын Нууц Товчоо”-г ойлгохын тулд олон удаа унших хэрэгтэй гэж ярьдаг. Бид өөрсдөө ойлгоход хэцүү байхад, гадаад хэлээр мянга орчуулаад ч гадаадынхан бас л ойлгохгүй шүү дээ. Монгол зураг бол номын зураг тэр тусмаа комик зурганд их тохирмжтой. Миний санаа энэ зургаас монгол комик стиль гаргаж, монголынхоо түүх, ёс заншил болон соёл урлагийг олон улсад зөв талаас нь таниулах ажил юм. Ер нь комик номыг олон улсад бүх насны хүмүүс сонирхон цуглуулж уншдаг, тэр дундаа залуу үеийнхэн илүү сонирхдог мөн залуудаа сурсан мэдсэн зүйл амьдралд үлддэг шүү дээ. Тэгэхээр Монголын түүхийн сэдэвтэй энэ номыг комик зургийн аргаар олон улсад гаргаж чадвал тус орнуудын шинэ залуу үеийхэнд Монголын урлагийг ямарваа нэгэн хэмжээгээр таниуллаа гэж ойлгож болно“

    Чөлөөт уран бүтээл

    • “Диваажин-07” гуаш, даавуу, 21 x 30 см, зурсан он 2003. Түүний 2002 оноос хойш бүтээж байгаа “Диваажин” цуврал зургууд нь Монгол зургийн аргаар бүтээгдсэн бичил миниатур зурагнууд юм.
    • “Туурайн төвөргөөн-12”, гуаш, даавуу, 120 x 160 см, зурсан он 2008. 1999 оноос бүтээж байгаа “Туурайн төвөргөөн” цуврал зургуудын гол онцлог нь нэг зурганд мянга мянган бичил морид багтсан байдаг юм.
    • “ХҮН” зураг 660 x 217 см, акрил зотон зурсан он 2010- 2012. Уг зурганд 11000 гаруй хүн амьтны дүрслэл орсон нь Монголдоо төдийгүй дэлхийн урлагийн түүхэнд “нэг зурганд” урьд өмнө байгаагүй хамгийн олон хүн дүрслэгдсэнээрээ онцгой юм.


    БИЕ ДААСАН ҮЗЭСГЭЛЭН

    1996 он ХОС ЕС үзэсгэлэн, Монголын Хүүхдийн Ордон, Улаанбаатар

    2007 он

    • БУРХАД Үзэсгэлэн, “Adelhausermuseum” Музей, Фрайбург, Герман
    • МОНГОЛ МИНИАТУР ЗУРАГ Үзэсгэлэн, Монголын Соёлын Төв, Фрайбүрг, Герман
    • МИНИАТУР ЗУРАГ Үзэсгэлэн Герман Банк (Deutsche Bank), Берлин
    • ЗҮРХНЭЭС МЭДЭРСЭН ДИВААЖИН Үзэсгэлэн, Мюнхен, Герман
    • ОТГО ОЙРЭБРО ХОТОД Үзэсгэлэн, “Konstfrämjandet” Галерей, Ойрэбро, Швед

    2009 он

    • ОТГО ОЙРЭБРО ОРДОНД Үзэсгэлэн, Ойрэбро, Швед
    • ОТГО СЭЭХАЙМ ОРДОНД Үзэсгэлэн, Констанц, Герман

    2011 он

    • ТУУРАЙН ТӨВӨРГӨӨН Үзэсгэлэн, ЗУРАГ Галерей, Берлин
    • ТУУРАЙН ТӨВӨРГӨӨН Үзэсгэлэн, Монголын Соёлын Төв, Бонн, Герман
    • БУРХАД Үзэсгэлэн, ЗУРАГ Галерей, Берлин
    • МОНГОЛ АЯН – 1 Үзэсгэлэн, Альзас, Франц
    • МОНГОЛ АЯН – 4 Үзэсгэлэн, Лайпциг, Герман

    2012 он

    • ХҮН Үзэсгэлэн, ЗУРАГ Галерей, Берлин
    • КАМА СУТРА “KAMA SUTRA in Miniature” Үзэсгэлэн, ЗУРАГ Галерей, Берлин
    • ОТГО арт Үзэсгэлэн, “Commerzbank” Бранденбург хаалга, Берлин
    • ОТГО арт Үзэсгэлэн, Цагаандариум Арт Галерей & Музей, Улаанбаатар
    • ОТГО арт Үзэсгэлэн, Улаан Гэр Галерей, Хаан Банк, Улаанбаатар


    НОМ БҮТЭЭЛ

    2004 он ЗҮРХНЭЭС МЭДЭРСЭН ДИВААЖИН

    2004 он БУРХАД

    https://facebook.com/OTGOArtist
    http://mongolian-art.de

  • Т.Эрдэнэчулуун: Машины загвар зохиох нь яг л уран баримал бүтээхтэй адил

    Т.Эрдэнэчулуун: Машины загвар зохиох нь яг л уран баримал бүтээхтэй адил

    Цаана чинь монгол залуу францын тансаг хөлгүүдийг бүтээж, автомашины акул компанийг амьдруулж явна. Т.Эрдэнэчулуун автомашин үйлдвэрлэгч Францын алдарт “Ренаулт” компанид дизайнераар ажиллаж, бүтээсэн шинэ загварууд нь дэлхийн авто машины зах зээлд тун ч нэр хүндтэй явна. Тэрээр олон улсад Эрдэ гэдэг нэрээрээ алдаршсан байна.

    Эрдэ арав гаруй жилийн турш Ренаулт компаний франц, бразиль, солонгос, испани, румин дэх салбарт ажиллан брэндийн машинуудын загварыг гаргаж байжээ. Түүний хамгийн сүүлд бүтээсэн загвар нь Renault Duster SUV хэмээх тансаг хөлөг аж.

    41 настай Т.Эрдэнэчулуун 1971 оны наймдугаар сарын 23-нд Улаанбаатарт төрсөн бөгөөд дунд сургуулиа төгссөний дараа Политехникийн их сургуульд суралцаж 1989 онд төгсчээ. Эрдэ энэ ондоо Чарлезын их сургуульд философийн чиглэлээр сурахаар Прагт очсон байна. Тэрээр 1999-2000 онд англид очиж “Ковентри” дизайны сургуульд сурчээ. Эрдэ Францын алдарт Ренаулт компанид 2001 оноос ажиллах болсноор мэргэжлийн карьераа эхлүүлсэн юм. Тэрээр компанид ажиллах эрхээ машины загварын тэмцээнд түрүүлэн олж авсан юм байна.

    Эрдэ Тунгаагийн хамгийн сүүлд зохиосон машин Renault Duster SUV хийгээд мэргэжил, машины загварын хандлагын тухай гадны хэвлэлд өгсөн ярилцлагыг хүргэж байна.

    0150

    -Зах зээлд маш амжилттай борлогдож буй Renault Duster-ын загварыг та бүтээсэн. Загварын санаагаа яаж бодож олсон бэ?
    – Дастерын дизайныг гаргах үйл явц төлөвлөсний дагуу явагдсан. Дизайны мэргэжлийн студынхэн загварын хувьд найман сонголт санал болгосон. Тэднээс дөрвийг нь л сонгож, үлдсэн дөрвийг детальчилсан байдлаар маш нарийн судалсаны эцэст шилдэг хоёр төслийг нь шалгаруулсан. Тэгээд л миний төсөл ялсан.
    Манай багийнхан нэг талаас хүн бүр хэрэглэж ямар ч хэрэгцээнд хэрэглэж болохуйц машин бүтээхийг зорьсон юм. Энэ зорилгоо биелүүлэхийн тулд олон тооны бүрэлдэхүүн хэсгүүдийг холбох хэрэг гарсан. Техникийн хүчин зүйлийн хувьд бид Дастерын дугуйн суурийг урт бүтээхийг хүссэн. Гэтэл үр дүн нь машины урт 4.31 м, өргөн 1.82 м болсон.

    0150

    – Renault Duster SUV-ын онцлог нь юу вэ?
    -Машины урд хэсэгт хром сараалжин хаалт, моторын хавхаг байрладаг. Duster SUV-г гаднаас нь таних гол онцлог нь энэ. Дастерын бас нэг онцлог нь ямар ч хэрэглээнд тохиромжтой. Мөн бид хамгаалалтын хэсэгт жолоочийг ямар ч төрлийн замд айж сандрахгүй явахад туслах олон хүчин зүйлүүдийг нэмсэн. Хэдийгээр эзнийг нь айдас мэдрэхгүй байхаар загварыг нь зохиосон ч зогсоолд орхиход машин маш үнэтэй харагддаг учраас юу ч болж магадгүй гэдэгт л санаа зовсон. /инээв/.

    -Та машины загвар бүтээхдээ ямар зарчим баримталдаг вэ?
    -Машин бол яг л уран баримал шиг. Машины дизайныг гаргахад яг л уран баримал хийж байгаа мэт үе давхарга тус бүрээр нь ажилладаг. Тиймээс шинэ машины загварыг маш уян хатан бодлогоор гаргах ёстой. Нэг л шийдсэн бол зөвхөн тэр зүгрүү гэж зүтгэх ёсгүй. Эхлээд машины дизайны гол зорилгыг биелүүлээд, дараа нь детальчилсан хэсгүүдэд анхаарах хэрэгтэй.

    0150

    -Машины дизайныг бүтээхдээ дизайнерууд бие биеэсээ суралцдаг байх. Таны хувьд өөрийгөө хэнтэй жиших вэ?
    -Одоо ажиллаж буй компанид маань олон чадварлаг дизайнер зөвхөн машины загвар төдийгүй онгоцны загвар бүтээж байна. Миний бодлоор би Италийн машины загвар зохион бүтээгчидтэй ижил түвшнийх. Би 1970-аад оны италийн төмөр хөлгүүдийг хараад өөрийн эрхгүй татагддаг. Тэднээс сурах зүйл их бий.

    -Таны бодлоор авто машины загварын ханлагыг ямар компани тогтоож байна?
    -1970-80 оны машинууд загварын хандлагыг амархан тодорхойлж чадна. Гэвч хоолны амтаас эхлээд олон зүйлүүд өөрчлөгдөж буй өнөө үед машины дизайн маш хурдан өөрчлөгдөж байна. Өнөө үед машины загварын нэг хүчтэй хандлага байх боломжгүй, харин ч эсрэгээрээ маш олон хандлага байх ёстой. Ирээдүйд бидний ажил загварын хандлагын шилдэг нь байгаасай гэж хүсдэг.

    -Та ойрын ирээдүйд юу хийхээр төлөвлөж байна?
    -Миний бүх төлөвлөгөө ажиллаж байгаа газартай маань холбоотой. Маш олон машины загварын төслүүд байгаа. Тиймээс өөр төлөвлөгөө бодох зав алга даа.

    Түүний Ренаулт Дастер машинаа танилцуулж буй бичлэгийн энд дарж үзнэ үү.

    0150
    0150

    0150
    0150

    0150
    0150

    0150
    0150

    0150
    0150

    Мэдээллийн эх сурвалж: http://www.24tsag.mn/

  • Гэндэндаржаагийн ЗАГДАА

    Зохион бүтээгч, нийгмийн зүтгэлтэн.

    Орон гэргүй, орц, траншейнд амьдардаг, архи мансууруулах бодисонд донтсон, засан хүмүүжүүлэх ангиас суллагдсан, өнчин ядуу бүх насны иргэдийг дахин нийгэмшүүлэх, ажил хөдөлмөр эхлүүлэх, сэтгэлзүйн сургалт олгож нийгэмд эзлэх байр сууриа дахин олоход нь тусалдаг “Зөв амьдрах ухаан” ТББ-ийн үүсгэн байгуулагч, тэргүүн, Итгэлт элч ХХК-ийн захирал.

    Баянхонгор аймгийн Баян- Овоо суманд 1958 онд төрсөн. Дархан Уул, Сэлэнгэ аймагт тус тус ажиллаж амьдарч байсан. Сонгино хайрхан дүүрэг, Чингэлтэй дүүрэг, Сүхбаатар дүүрэг, Баянзүрх дүүрэг, Цагдаагийн ерөнхий газар, Нийслэлийн цагдаагийн газартай нийгмийн хэв журам сахиулах чиглэлд 8 жилийн турш хамтран ажиллаж байна. Ял эдлээд суллагдаж гарч ирсэн зарим иргэдийг дахин нийгэмшүүлэх чиглэлээр Шүүхийн шийдвэр биелүүлэх газар, хорих ангиудтай мөн хамтран ажиллаж байна. Нийгмийн сэтгэлзүйн чиглэлээр, эмзэг бүлгийн 400 гаруй хүнтэй 10 жил гаруй ажилласан туршлагатай.

    Орчин үеийн монгол гэрийн төрөл бүрийн загварыг зохион бүтээсэн. Залуу зохион бүтээгч нэвтрүүлгийн шилдэг оролцогч болж байсан.

    Бид үнэний эсрэг юуг ч хийж чадахгүй. Харин үнэний төлөө бүхнийг хийнэ.

    https://www.facebook.com/gendendarjaa.zagdaa

  • Энэбишийн БАЯРМАА | Сэтгэл судлаач, сургагч багш

    Сэтгэл судлаач, байгууллагын сэтгэлзүйн сургагч багш. Англи, солонгос хэлтэй. 

    Нийгэм, сэтгэл судлалын дээд сургуулийн сэтгэл зүйн тэнхмийн багш; 

    МУИС-ийн сэтгүүлзүй, МУБИС- ийн англи хэл судлал, Солонгосын Чуннам их сургууль, Нийгэм сэтгэл судлалын дээд сургуулийг сэтгэл судлалаар дүүргэсэн.

    Байгууллага, хамт олонд зориулан “Ажлын байрны стрессийг даван туулах, баг хамт олонтойгоо ойлголцох, хамт олны уур амьсгалыг сайжруулах, харилцааны зөрчлийг удирдах, аз жаргалын мэдрэмжээ дээшлүүлэх, өөртөө итгэлтэй байдлаа эргүүлэн олж авах, гэр бүлийн сэтгэлзүй” сэдвээр багц лекц, сургалтыг системтэйгээр зохион байгуулдаг.

    Тэрээр өөрийн амьдралд тулгарсан хүнд хэцүү өвчин, эмгэгийг эдгээх, даван туулах зорилгоор сэтгэл заслын нарийн судалгааны чиглэлрүү орж, сэтгэл судлалын зарим онолыг өөрийн биеэр мэдрээд туулж яваа маш өвөрмөц намтартай сэтгэл судлаач юм.

    “Амжилтын төлөвлөгөө” 2009, “Ухаалаг сонголт” 2009, “Хайр” 2013, “Анзаарч чадвал амьдрал сайхан” 2013, “Сэтгэл хөдлөлөө жолоодох урлаг” 2018, “Одоо цагт амьдрах урлаг” 2018, “Хүсэл мөрөөдөлдөө хүрэх дөт зам” 2018, “Мэргэжил сонголт таны амьдралыг шийднэ” 2019, “Өөртөө итгэлтэй болох сэтгэл зүйн нууц арга” 2019, “Нийтлэг тохиох өвчний сэтгэл зүйн шалтгаан” 2019, “Салалтын дараах сэтгэл зүйн тусламж” 2019 зэрэг хувь хүний хөгжил, сэтгэл судлалын 11 ном эрхлэн хэвлүүлж хэд хэдэн ном нь бестеллер болж олон мянган уншигчдын амьдралд өөрчлөлтийг авчирч чадсан. Монгол Улсдаа төдийгүй Өвөр Монголд сургалтаа зохион байгуулж, номоо хэвлүүлж 20,000 гаруй хүнд хүргэсэн.

    БОЛОВСРОЛЫН МЭДЭЭЛЭЛ

    2019 онд Нийгэм сэтгэл судлалын дээд сургууль, Сэтгэл судлал;

    2013 онд Солонгосын Чуннам их сургууль, Сэтгэл судлал;

    2012 онд Солонгосын Хансэй их сургууль, Солонгос хэл;

    2011 онд Удирдлагын академи, Бизнесийн удирдлага;

    2010 онд МУБИС, Англи хэл судлалын магистр;

    2008 онд МУИС, Сэтгүүл зүйн баклавр;

    АЖЛЫН ТУРШЛАГА

    2019 оноос Career Code сургалтын төвийн сургагч багш;

    2019 оноос Нийгэм сэтгэл судлалын дээд сургуулийн багш;

    2018 оноос Хүний хөгжил, сэтгэлзүйн Uram.mn үүсгэн байгуулагч;

    2012 оноос Өрхийн үйлдвэрлэл сэтгүүлийн орлогч эрхлэгч;

    2011- 2012 Сантис боловсролын төвд Англи хэлний багш;

    2003- 2006 онд МҮОНТВ, ТВ9 телевизийн сэтгүүлч, хөтлөгч;

    НОМ, БҮТЭЭЛ

    2019 он Өөртөө итгэлтэй болох сэтгэл зүйн нууц арга;

    2019 он Нийтлэг тохиох өвчний сэтгэл зүйн шалтгаан;

    2019 он Салалтын дараах сэтгэл зүйн тусламж;

    2019 он Мэргэжил сонголт таны амьдралыг шийднэ;

    2018 он Сэтгэл хөдлөлөө жолоодох урлаг;

    2018 он Одоо цагт амьдрах урлаг;

    2018 он Хүсэл мөрөөдөлдөө хүрэх дөт зам;

    2013 он Анзаарч чадвал амьдрал сайхан (Хэ Миний бүтээлийн орчуулга);

    2013 он “Хайр” сургамжит өгүүллэгийн эмхтгэл;

    2009 он Амжилтын төлөвлөгөө (Брайан Трейсигийн бүтээлийн орчуулга);

    2009 он “Ухаалаг сонголт” Хувь хүний хөгжлийн шилдэг бүтээлийн чуулган;

    Ярилцлага унших

  • Очирбатын БУЛГАНХАНГАЙ

    Философич, нийгэм судлалын багш мэргэшилтэй.

    “Багийн тоглолт& Багаа эрчил” багаар ажиллах хөтөлбөрийн сургагч багш.

    Архангай аймгийн Тариат сумын сургуульд багшилж байх хугацаандаа Шавь Н.Шинэбаяр нь ЭЕШ- 2011 нийгмийн ухааны хичээлээр улсын хэмжээнд 1-рт, О.Цэцэгбаяр 2011 оны Улсын олимпиадын 2-ын даваанд алтан медаль хүртэж байсан. Заах аргач, тэргүүлэгч зэрэгтэй.

    1993- 2003 онд Архангай аймгийн Тариат сумын бүрэн дунд сургууль
    2003- 2007 онд МУИС- Философи, нийгмийн ухааны багш мэргэжлээр дүүргэсэн.
    2008- 2009 онд Нийслэлийн 73-р сургуульд багш
    2010- 2012 онд Архангай аймгийн Батцэнгэл сумын Бүрэн дунд сургуулийн багш
    2013- 2018 онд Архангай аймгийн Тариат сумын Бүрэн дунд сургуулийн багш

    Гүн ухааны шүлэг, афоризм, эссэ бичих дуртай. “Ээждээ бичсэн 1000 захидал” (2009 он), “Хүн чанарын эрэлд” (2011 он) номуудыг эрхлэн хэвлүүлсэн. 0- 3 настай монгол хүүхдүүдийн фото зураг авч үзэсгэлэн, цомог гаргахаар ажиллаж байна.

    2007 оноос хойш “Яруу сэтгэгч” хүний хөгжлийн сонинг дэмчигдийг бүлгэмийг хамтран үүсгэн байгуулж, хувь хүний хөгжил, төлөвшлийн чиглэлээр тасралтгүй ажиллаж байна.

    Twitter | Facebook

  • Сүрэнгийн БАТБАЯР

    Чонос овогт Сүрэнгийн БАТБАЯР

    Хот төлөвлөлтийн мэргэшсэн архитетор, “Монгол монорэйл” төслийн санаачлагч, Хуульчдын хотхон төсөл, Санзай хотхон төсөл, Их майдар төсөл, Ажигана үйлдвэрийн төсөлд тус тус ажиллаж байсан туршлагатай. 2011 онд Тэргүүний барилгачин цол авсан.

    1980 оны 9-р сарын 1- нд төрсөн.
    1988- 1998 он Ниислэлийн 62-р дунд сургууль төгссөн.
    1998- 2003 он МУШУТИС- Архитектурын мэргэжлээр бакалавр
    2005- 2012 он МУШУТИС- Иргэний ба үйлдвэрлэлийн барилгын инженерийн бакалавр
    2003- 2007 он МУШУТИС- Архитектурын ухааны магистр
    2002- 2003 он Барилга архитектур корпорацид архитектур
    2003- 2006 он Мөнгөн хөсөг ХХК-ийн архитектур инженер
    2006 оноос Органик архитектур Монголиа ХХК-ийн захирал