creativemongolia

Category: media-content

  • 2010 онд Юу сэтгэж юу бүтээв? Хэтийн зорилго хаана уу? Хэний хүүтэй нөхөрлөв?

    2011 он гарлаа. Шинэ жилүүдэд уригдаж баярлаж хөөрч явахтай зэрэгцээд нэг нас нэмж хүний амьдралын нэгэн хуудас эргэж байгаа учраас бодож тунгаах зүйл бас олон байлаа. 

    4 жил гаруйн өмнө “Яруу сэтгэгч” сонин гаргачихаад, сониноо үүрээд сургуулиудиар зараад явдаг байсан үе бодогдлоо. Эхлэгч нь ямар хүн байдаг вэ гэж хүмүүс асуухаар нь Лувсандорж гээд нэг хүн байдаг юм гэж хэлчихээд л суудаг байж билээ. Өвлийн хүйтэнд сургуулийн коридорт зогсож сониноо танилцуулаад, шөнө нь сониноо бэлдэж дуусгах гэж номын сангийн шалан дээр сонин дэвсээд унтаж байсан үе ч бий. Хотын төв номын сангийн лавлагааны хэсэгт бараг амьдрах шахуу явсан үе ч бий. Хоолныхоо мөнгийг хүртэл хэвлэлтэндээ өгч байж хэвлэдэг байлаа… Гэр бүл, найз нөхөд маань сонин гаргахыг ойшоохгүй, мөнгө олохгүй дэмий балай зүйл хийж байна гээд л нүд үзүүрлэж байсан үе ч бий. Шантармаар, уйлж дуулмаар хүнд хэцүү үеүд байсан.

    Гэхдээ бид хийхээ зогсоогоогүй, бидэнд харсан, зорьсон, чиглэсэн зүйл байсан. Тэрнийхээ төлөө л амьдарсан. Монгол хүнийг соён гэгээрүүлж чадваржуулах гэсэн зорилгоосоо хазайлгүйгээр, уншиж, судалж, мэдлэг чадвартай хүмүүстэй уулзаж, ярилцаж, өөрсдийгөө хөгжүүлэхийн төлөө цаг хугацаагаа зориулж байлаа. За за энэ мөнгө олохгүй юм байна өөр ажил хийе, ашигтай мөнгө олох бизнес хийе гэж хошуурч гүйгээгүй, худлаа яриагүй, өөрийгөө хуурч диплом цуглуулаагүй, шалтаг тоочиж архи ууж орилж хашгираагүй, бухимдаж жагсаж цуглаагүй, хүн луйвардаагүй, урдаас бараа зөөгөөгүй… Зорилготой зоригтой өөрсдийнхөө харсанаар л явсан даа. Хамгийн анх сониноо дэмжиж цалингүй ч хамаагүй ажиллая гэж ирж байсан О.Булганхангай, Г.Энхбазар, Э.Жаргалсайхан, Алтангэрэл,Л.Золзаяа, Пүрэвжаргал, Номинзол, Энхчимэг, Ж.Бэгзсүрэн зэрэг анхдагчидаараа бахархаж байгаагаа илэрхийлье.

    Тэр үеэ бодвол одоо ч бага ч болтугай хэлэх үгтэй, хийсэн зүйлтэй болжээ. Номин холдинг, Юнител, Ази фарма зэрэг үндэсний томоохон компаниудад сургалт зохион байгуулж, хэд хэдэн томоохон төсөл дээр ажиллаа. Саяхан Багануур ХК, Баянхонгор аймгийн Шинэжинст сумын засаг дарга хүртэл сургалт авъя гэж биднийг урьж байсан. Дэлхийн олон оронд төгсөж ирсэн залуучууд, эрдэмтэн мэргэдтэй санал бодлоо солилцож, чадварлаг, ухаантай найз нөхөдтэй болж монгол хүний хөгжлийн төлөө олон ажлуудыг хамтын хүчээр урагшлуулж явна.

     

    2010 оны хувьд:
    Өөрийн зорилго болох “Монгол хүний хөгжлийн төлөө чадварлаг, хүчирхэг Монгол хүнийг төлөвшүүлэхийн төлөө ажиллаж, амьдарна” гэсэн зарчмынхаа дагуу хүүхдүүд, залуучууд, ажилчин, сэхээтнүүдийн хөгжилд чиглэсэн 30 орчим лекц сургалт, “Эх орны залуус хаа явна” нэвтрүүлгийн 24 дугаар, нэг ном ариутган шүүж, 2 сургамжит аудио цомог бүтээлцлээ. Эх орон телевизийн захирал Ш.Хишигсүрэн, Баатар маарамба, Жааз дуучин Д.Цэцэнбилэг, Олимпын аварга Эрдэнэбаатар, Кино найруулагч Бадамрагчаа, Маркетер Т.Төгөлдөр, Дельта констакшны захирал Эрдэнэбат, Сүрбаатар дүүргийн УНЗ-ийн Тэргүүлэгч Б.Батзориг, Fohowкомпанийн захирал С.Дашдулам, зураач В.Ундраа зэрэг нэр төртэй хүмүүстэй танилцаж, А.Мэнд-Орших, Алтангадасын Солонго, Шийрэв, Ганцоож, Баярсайхан зэрэг олон жилийн онлайн танилуудтайгаа уулзаж хамтарч ажиллах үүд хаалгаа нээж нийт 100 орчим шинэ хүнтэй танилцаж хамтран ажиллаж байна.

    Мөн 10 орчим олон нийтийн үйл ажиллагааг хамтран зохион байгуулалцаж, 30 гаруй ном уншиж, 40 орчим нийтлэл бичиж, Монгол хүний хөгжилд чиглэсэн үйл ажиллагаа явуулдаг “Сортоо” хүүхэд залуучуудын нийгэмлэг, “Индиго” хүүхдийн хөгжлийн төв, Монголын эко зохистой хөгжлийн холбоо, “Mind freedom” сургалтын төв, “Оточ одь” дээд эрүүл мэндийн эмнэлэг зэрэг ашгийн бус хүний хөгжлийн байгууллагууд болон Эх орон телевизийн “Эх орны залуус” нэвтрүүлэгт зөвлөж ажиллаж байна.

     

    Зарим нэг онцлох ажлуудыг сараар нь дурьдвал:

    1 сар
    – “Мөнхийн тэмүүлэл” сургамжит цомгийг хамтран бүтээж олны хүртээл болголоо.
    – “Эх орон” телевизийн Ш.Хишигсүрэн захиралын саналын дагуу Мэдээний албаны даргаар ажиллаа.

    2 сар
    – Өөрийн саналаар “Эх орон” телевизийн “Эх орны залуус хаа явна” нэвтрүүлгийн хөтлөгч, редактораар ажиллаж 24 дугаар бэлтгэн хүргэлээ.

    3 сар
    – Юнител, Fohow зэрэг компаниудад лекц, сургалт зохион байгуулалаа.

    4 сар
    – “Сортоо” клубээс санаачилсан Эх үрсийн хайрын илэрхийлэл- Эх үрсийн ногоон төглийг ЭНЭШТ-д бүтээн босгох “Ээждээ зориулсан бидний төгөл” хөтөлбөрийг хамтран хэрэгжүүлж зохицуулагчаар ажиллаа. 
    – “Миний 100 найз” залуусын хамтын ажиллагааны нөхөрсөг уулзалт зохион байгууллаа.

    5 сар
    – “Яруу сэтгэгч” клуб болон сонины 4 жилийн ой тохиолоо.
    – “Оточ одь” дээд эрүүл мэндийн эмнэлэгийн санаачилсан “Төгс эрүүлжихүйн баяр”-ыг зохион байгуулалцлаа.

    6 сар
    – “Сэрж буй Монгол” сургамжит цомгийг хамтран бүтээж нээлтээ хийлээ.
    – “Ээждээ зориулсан бидний төгөл” нээлтийн ажиллагаа боллоо.
    – Fohow компанийн санаачилсан “Монгол бардамнал” өв соёлоороо омогших цэнгүүнийг хамтран зохион байгуулалцлаа.
    – People to people байгууллагаас санаачилсан “Бидний амьдарч буй байгаль дэлхий” гар зургийн уралдааныг хамтран зохион байгуулалцлаа.

    8 сар
    – The New Media Marketing Agency-н Хүний нөөцийн болон олон нийттэй харилцах албанд ажиллахаар боллоо.

    9 сар
    – Яруу сэтгэгч клубын санаачилгаар “Индиго” шинэ зууны хүүхдийн хөгжлийн төв үүдээ нээлээ.
    – The New Media Marketing Agency-тай хамтран “Яруу сэтгэгч” цахим сонин гаргах шийдвэр гаргалаа.

    10 сар
    – “Мандухай хатан” компанийн санаачилсан “Мандухай хатаны үрс” хүмүүнлэгийн аянг дэмжиж оролцлоо.
    – Twitter Top users by Location-ны 36-р байрт жагслаа.

    11 сар
    – О.Булганхангай, Б.Баттулга нарын “Хүн чанарын эрэлд” номын ариутган шүүгчээр ажиллаа.
    – “Дельта” констракшний захиалгаар ажилтаны хөгжлийн цогц хөтөлбөр боловсруулах судалгааг эхлүүллээ.

    12 сар
    – The New Media Marketing Agency-н санаачилсан “Монгол блогчид- 2010” наадмын зохион байгуулалтын багт ажиллаа.
    – БГД-ийн Боловсролын хэлтэс, “Болор толь” төвийн хамтарсан сурагчидад зориулсан “Мэргэжлээ хэрхэн зөв сонгох вэ”, багшийн хөгжилд чиглэсэн “Боловсролын шинэ хандлага” хөтөлбөрийг дэмжиж оролцлоо.

     

    За ингээд 2011 ондоо,

    Хаана ч, хэзээ ч зорилготой, зоригтой
    Ядарсан ч зүдэрсэн ч жавхаатай, хийморьтой
    Өвдсөн ч зовсон ч  шантрахгүй, сөхрөхгүй
    Өлссөн ч цангасан ч буцахгүй, няцахгүй
    Шүлсээрээ ундалж, шүднийхээ махаар хооллож
    Өглөө бүр тэмүүлэлтэй, мэдрэмжтэй
    Үдэш бүр ялалттай, ухааралтай
    Амар хялбарыг харж биш
    Хэцүү бэрхтэй барилцаж, балбалцаж
    Хөнгөн хийсвэрийг сонгож биш
    Хүнд хэцүүтэй арсалдаж, алалцаж
    Ажлаас айж биш
    Ажлыг айлгаж, умруулж
    Өөрийнхөө авъяасыг нээж, хөгжүүлж 
    Өөрөөлийн чадварыг өнгөлж, хурцалж
    Өөрийн амьдралаа өөрийнхөө гараар бүтээн босгож, алдаж онож, баярлаж догдлож амьдарна шүү, анд найз нараа. 

    2011 он та нарын он жилүүд шүү. Алтан үеүд ард чинь биш Урд чинь байгаа шүү.

  • Индиго төв ШИНЭ ЖИЛИЙН БАЯР -аа тэмдэглэлээ

    “Индиго” хүүхдийн хөгжлийн төв нь 2010.12.25 нд “Шинэ жилийн баяр” аа амжилттай тэмдэглэлээ. Энэ удаагийн баяр наадмын хөтөлбөрөөрөө тус төвийн хүүхэд, багачууд “Хүн чанарын агуй” сэдэвт зохиомжит үзүүлбэрийг тоглож эцэг эх, найз нөхөддөө сонирхууллаа. Тус зохиомжинд эерэг хандлагатай гэр бүлд өссөн, сайхан сэтгэлтэй, сайн хүүхдүүд болон муу хандлагатай гэр бүлд өссөн авьяаслаг боловч хүн чанаргүй хүүхдүүд гэсэн хоёр бүлэг хүүхдүүд “ИНДИГО” төвийн шинэ жилийн баярт оролцохоор явж байгаагаар эхэлдэг ба, тэд замдаа хүн чанарын агуйгаар дамжин гарах үедээ замд нь тохиолдсон хүн чанар, авьяас чадварыг нь сорьсон олон саад бэрхшээлийг давж гарах болно. Ийнхүү үзүүлбэрийн төгсгөлд муухай сэтгэлтэй хүүхдүүд “хүнд авьяас чадвар байвч хүн чанаргүй бол хэн ч биш юм байна” гэдгийг ухаарснаар агуйг амжилттай гатлан, Индиго төвийнхөө баяр наадамд оролцож чадаж буй тухай өгүүлнэ.

    Түүнчлэн Тус төвийн “Ирээдүйн эзэд” клубын өсвөр насын гишүүд өөрийн авьяас билэгээ хичээнгүйлэн хөгжүүлж, хүний муу чанараас холуур байж, харин сайн сайхан чанарыг түгээн цэцэглүүлж, өөрийнхөө болон эх орныхоо жинхэнэ эзэн нь байж чадахаа амласан тангараг өргөж, энэхүү амлалтаа ямагт санаж, хичээнгүйлэн биелүүлнэ гэдэгт итгэж, тэдэнд итгэл хүлээлгэж, урам зориг хайрласан “Батламж” гардууллаа.

    Харин “Ирээдүйн эзэд” клубын бяцхан гишүүд маань “Индиго” хүүхдийн хөгжлийн төвийн “Ирээдүйн эзэд” нэртэй тэмдэгээр энгэрээ мялаалаа.

    Ийнхүү “Индиго” хүүхдийн хөгжлийн төвийн хамт олон хуучин оноо үдэж, шинэ онтойгоо зорилго тэмүүлэл дүүрнээр золгох бэлтгэлээ хийлээ.

    Жич: Шинэ жилийн баярын арын ажлыг амжуулж, хийж бүтээсэн ажлын тайлан болон тус төвийн хүүхдүүдийн бүтээлийн үзэсгэлэн гаргах, батламж, тэмдэг хийлгэх, бэлэг бэлтгэх зэрэг бүхий л ажлыг хариуцлагатайгаар хийж гүйцэтгэсэн тус төвийн сэтгэлзүйч Б.Бат-Өлзий, багш Г.Насанцэцэг, Д.Энхжин нартаа чин сэтгэлийн талархал илэрхийлж, цаашдын ажил хөдөлмөр, амьдралд нь хамгийн сайн сайхан бүхнийг хүсье.

  • Пунцагийн БААТАР- 9 үе дамжсан маарамба, хүний их эмч

    9 үе дамжсан маарамба, хүний их эмч, Монгол Улсын Гавъяат эмч.

    “Одь тан” эм, биологийн нэмэлт бүтээгдэхүүний үйлдвэр болон Dr Baatar брэндийг үндэслэгч. “Дээд эрүүл мэнд” онол, номын хамтран бүтээгч.

    Пунцагийн Баатар 1959 онд Дорноговь аймгийн Сайншанд хотод Эцэг Пунцаг, эх Лхагвагийн хүү болж төржээ.Бага насандаа эцэг эхийн гар дээр бойжиж, 1967 онд аймгийн 10 жилийн сургуульд элсэн орж, 1977 онд төгсчээ.Улсын Багшийн дээд сургуулийг 1986 онд дүүргэжээ.

    Тэжээхүйн ухааны мөрд

    1984 онд Дэлгэрэх сумын Одь хэмээх Дорж оточид шавь болжээ. Гэрээр төвд хэл, судалж, түшиж оношлохүй арга барил, монголын тэжээхүйн ухааны онол заалгаж, Ишданзанваанжилын “Манаггаржаам” /Увдисын нуух тэмдэгт/, “Онцоргаадан” /Маш гайхамшигт хурмын сан/, Ютигёндонгомбын “Анагаах Ухааны Дөрвөн Үндэс” Ишбалжирын “Дөрвөн рашаан”, Жамбал маарамбын “Манагренчинжунай” /Увдисын зэндмэнь эрдэнэ/, Дэсрид Санжаажамцын “Манаг Лхантав” /Увдисын үндэсний нэмсэн арга/, “Бидэр онбо” /Хөх Биндэръяа/, “Дотрын өвчнийг анагаахуй”, Жамбаа маарамбын “Цацлаган бичиг” зэрэг эх зохиолуудыг заалган судалж, ном тус бүрээр шүүлэг өгчээ. Эмийн ургамлыг 4 улиралд таних, түүх, хадгалах, номхотгох, боловсруулах, эм тан найруулах ёсыг заалгаж сурчээ.

    Багшийнхаа дэргэд 12 жил тэжээхүйн ухаан, төвд хэл үзэж суралцахын зэрэгцээ зүүн бүсийн ба говийн аймгуудад үзлэг хийж дадлага туршлага олж авчээ. П.Баатар 2002 онд Дорноговь аймагт АУК-ийг хүний их эмч бакалавр мэргэжлээр төгсчээ.

    Сүүлийн таван жилийн  ажлын үзүүлэлт

    2006 оноос хойш Хэнтий, Сүхбаатар, Дорнод, Ховд, Дундговь, Өмнөговь, Увс, Архангай, Сэлэнгэ, Говь-Алтай,  зэрэг 10 гаруй аймагт 100 гаруй суманд урилгаар очиж 40.1 мянган хүнд үзлэг эмчилгээ хийжээ. 2006 оноос Хорт хавдар өвчтэй хүмүүсээс эдгэрээд 3-с дээш жил  амьдарч байгаа 7 хувь, 3 хүртэл жил 11.4 хувь, нэг жилээс дээш 21,9 хувь байна .

    2008 онд Уламжлалт Эмч нарын эрдэм шинжилгээний бага хуралд “Хорт хавдар эдгэрч байна” гэсэн илтгэл хэлэлцүүллээ. ЭХО, рентгэн, дуран авиан шинжилгээ, эс судлалын шинжилгээгээр оношлогдсон 36 өвчтний материалд тулгуурласан илтгэл олны анхаарлыг татаж, маргаан тарьж, шуугиан дэгдээсэн юм. Гэхдээ эрүүлжсэн эд, эрхтэн, хавдар нь арилсан, эв эрүүл болсон хүмүүс хөдлөшгүй баталгаа нотолгоо болж итгэл төрүүлсэн билээ.

    Одоо П.Баатарын хяналтанд хавдар өвчтэй 614 хүмүүс байгаа бөгөөд 40.3 хувь нь эдгэрэн сайжирч байна.

    Эх орондоо танигдсан нь

     “Оточ Одь” хувийн жижигхэн эмнэлгийг анх 2002 онд Дорноговь аймагт П.Баатар өөрийн багш, шавь хоёртойгоо байгуулсан юм. Удалгүй эмнэлгийн нэр зар аймгаас аймаг дамжин тарж, Улаанбаатар, Дархан, Эрдэнэт хотууд хүртэл Баатар эмчийг урин залах болжээ. Хөдөө суурингийн эмч оточ улсын нийслэлийн танил төдийгүй, хүсэн хүлээсэн эмч нь болж, учирч уулзсан хүн бүхэн өвчин зовлонгоосоо салж эдгэрч П.Баатар  монгол даяар танигдсан байна.

    Монгол оточ Дэлхий дахинд уригдав

    Анх 1992 онд  Монголын Ардын эмнэлгийн хүрээлэнгийн урилгаар Польш улсын Торун, Видогоши хотод 3 жил амьдрахдаа уламжлалт анагаах ёсны тус хүргэжээ.

    Тэрээр  2002 онд дэлхийн кино  урлагийн нэрт жүжигчин  Стивен Сигалын урилгаар кино зураг  авч байгаа орнуудад  нь хамт  явж эмчилж байсан бөгөөд  Стивен Сигал П.Баатараар эмчлүүлснийхээ дараа “Би эв эрүүл боллоо” гэж бахархалтайгаар хэлсэн байжээ. Буриадын Улаан-Үүд хотод урилгаар 3 удаа очиж, эмчилгээ сувилгаа үзүүлжээ. Америкийн иргэн Марк Фрэнкийн урилгаар 2010 онд Денвер, Сан-франциско, Нью-Йорк, Вашигтон, Лос-Анжелос, Чикаго  хотуудад очиж 20 хүнд эмчилгээ үзүүлжээ

    Үүнээс гадна Франц, Казакстан, Оросны холбооны улс, Японд уригдаж, тэдгээр орнуудын ард иргэдэд Монгол Уламжлалт Эмчилгээний аргаар олон арван хүнийг эрүүлжүүлж, хүндэтгэл  хүлээсэн байдаг юм. Одоо Улаанбаатар хотод байгаа “Оточ-Одь” гэдэг хувийн жижигхэн эмнэлэгт гадаадын 10 гаруй орны ард иргэд ирж үзүүлж байна.

    Энэ бол зөвхөн  эмч оточ П.Баатарын нэр хүнд төдий биш, Монголын Уламжлалт Тэжээхүйн ухааны арга, засал эмчилгээг дэлхийн олон улс, ард иргэд хүртэн хүлээн зөвшөөрсний баталгаа мөн. Бишрэлтэйеэ. Үүнд өөрсдийгөө их 7 гүрэн хэмээн нэрлэдэг улс орнууд ч багтаж байгаа нь Монголын Дээд өвгөдийн оюун ухааныг П.Баатар 9 дэх үе нь болон үргэлжлүүлж яваагий нь гэгээ гэрэл, хүч чадал, ач буян мөн. П.Баатарын “Оточ Одь” эмнэлэг 464 жил Маналын бясалгал, тахилга тасраагүй Жингэр Тэмээт уулын даяанчаас эхлэлтэйг дурьдахад хангалттай юм.

    Сургалт, сурталчилгаа, урьдчилан сэргийлэх ажлууд

    “Оточ Одь” эмнэлэг бол ард иргэдийг өвчингүй байлгах, мэдлэг дадлага, хэвшил эзэмшүүлэх монголын хоёрхон хувийн эмнэлгийн нэг юм. Товчоор хэлбэл урьдчилан сэргийлэх эмнэлэг юм.

    ”Дээд эрүүл мэнд гэж юу вэ?” сэдэвт сургалт лекцийг \152  цаг\  Дорноговь, Говьсүмбэр, Өмнөговь, Дундговь, Сүхбаатар,Улаанбаатар, Багануур хотуудад зохион байгуулжээ.

    Мөн “ Мөнхөд бадамлах зул”, “Тулгын гурван чулуу”, “ Эргэлзээ, эрэл, үнэн“ , “ Цэцэг  инээдэг“ зэрэг  түүхэн үе, онол  арга зүйг харуулсан бүрэн хэмжээний баримтат кино, “Найман  маналын  гэгээ“  ном, 8 үеийн  багш  нарынхаа  бясалгаж  гэгээрсэн Жингэр  тэмээтийн агуйн  дэргэд “Найман маналын суварга“ бүтээсэн нь нутгийн ард олон, эмч  нарын  сайшаал  хүлээсэн гэгээлэг  үйл  явдал болсон.

    Дорноговийн Дэлгэрэх  сумын  2-р багийн нутаг Жингэр Тэмээт бясалгалын уулан дээр 8 багшдаа зориулж, 8 маналын чулуун суврага бүтээлгээд жил бүр тэндээ маналын бясалгал заадаг  болжээ.   

    2001 оны 8 сарын 8-нд Хөх  хотод  болсон олон улсын  уламжлалт  анагаах  ухааны эмч  нарын  хуралд, 2009 оны 7 сарын 19-нд Өвөр  монголын өөртөө  засах орны Ордос   хотод болсон 4 дэхь удаагийн  олон  улсын уламжлалт эм ба  шинэ эмийн үндэс бүтээх эрдэм шинжилгээний ярилцах хуралд урилгаар  оролцов.

    П.Баатарын тухай хэвлэлүүдэд

     “Нутгийн амьдрал” сонины 2002 оны №20 дугаарт “Барын сүүлийг барьж болдоггүй баривал тавьж болдоггүй”,

    “Зиндаа”  сонины 2006 оны №15 дугаарт “Холливудын од Стивен Сигалыг эмчилсэн монгол эмч дэлхийн түүхэнд эмчлэгдэж байгаагүй өвчнийг бүрэн эдгээжээ”,

    “Дорноговийн  мэдээ” сонины 2007 оны 007 дугаарт  “Хэрвээ энэхүү эрдэмд сайн суралцваас бор гэрээсээ ертөнцийг таньж чадна”,

    “Өдрийн сонин” сонины 2008 оны №142 дугаарт “Хорт хавдрыг уламжлалт аргаар эдгэрүүлж болно”,  №15 дугаарт “Түмнийг анагаагч “Тулгын гурван чулуу”,

    “Зууны мэдээ” сонины 2008 оны  №81 дугаарт “Хорт хавдартай 22 хүнийг бүрэн эмчилсэн”,   Тус сонины 2009 оны №95 дугаарт “Мянган тохиолдлоос 2 буюу уламжлалт анагаах ухаан хорт хавдрыг эмчилж байна”,

    “Үндэсний шуудан ” сонины 2009 оны № 104 дугаарт “Таны хавдрыг эмчилнэ гэсэн. Тэгээд эдгээсэн”, 

    “Буриадын үнэн” сонины №46 дугаарт “Отошо-Одь гэжэ нэрэтэй эмнэлэгэй дорнод медицины врач Пүнсэгийн Баатар хорон хабдарые \рак\ бусад үбшэнтэй адилхан эмшэлэгддэг үбшин гэжэ хэлэжэ байна”

    2010  онд Оросын  Холбооны Улсын “Жизнь“ сонинд “Бүддийский  лама излечивает рак с помощью молитв и трав\ ,  

    “Зууны мэдээ” сонины 2010 оны  №306 дугаарт “Эмчилгээгүй гэсэн үг сонсч, цөхрөнгөө барсан хүмүүс манайд ирдэг”,

    “Үндэсний шуудан” сонины 2011 оны №30 дугаарт “Амьд явахын нууц буюу бодь оточийн оньсон судас”,

    “Sunny Mongolia Today” сэтгүүлийн 2010 оны дугаарт “Амьд явахын нууц буюу “Оточ Одь” эмнэлгийн бодь оточийн оносон судас”,

    “Хань” сонины 2010 оны 17 дугаарт хавдартай өвчинтнүүдийн эдгэрч илааршсан тухай талархал гарсан. “Хань” сонины 2010 оны 10 гаруй дугаарт уламжлалт эмчилгээний зарчмын талаар бичсэн билээ.

    Medeelel.com сайтаар “Үгүйлэн санана”  видеогоор Америкт очоод  ярилцлага өгсөн нь 17.5 мянган  уншигчдын сайшаал  талархал хүлээв

    Энэ олон хэвлэл, энэ олон арван сэтгүүлчид, олон зуун ард иргэд Баатарыг зүгээр л магтаагүй юм. Энд магтаалын илүү үг, илүү тодотгол нэг ч байхгүй. Харин магтаал мэт үнэн бичигдсэн байна. П.Баатар үүнээс олон мянган хүнийг эдгээж, тэдний төлөө эрүүл бищ, саруул ухаанаа хоёргүй сэтгэлээр зориулж явааг нь цөөн хэсэг нь илэрхийлсэн нь энэ юм.

    Гавъяа шагнал

    2005-02-18 /№5548/ П.Баатарын  хөдөлмөрийг өндрөөр  үнэлж Эрүүлийг хамгаалахын тэргүүний ажилтан

    /№ 29464/ Их Монгол Улс байгуулагдсаны 800  жилийн  ойн медаль

    2007-12-07 /№1722/ Эрх чөлөөний одон 

    2009 онд Ардын хувьсгалын 20  жилийн ойн медаль, ”Мөнх тэнгэрийн одон”

    2010-07-9 /№38682/ Алтангадас одонгоор  тус тус хүртсэн.

    2013 онд Монгол Улсын Гавъяат эмч

    Эртний монголын анагаах ухааны Дэлгэрэхийн уламжлалт сургуулийг эдүгээгийн дэлхийн тавцанд сэргээн  алдаршуулсан  минь бүтээлээрээ Чингис хааны дэлхийн Академийн жинхэнэ гишүүн /Академич/ цол  өргөмжлөлөөр шагнуулсан.
    Ертөнц дахины Энхтайвны холбооноос “Энхийн элчин сайд“ өргөмжлөл авсан байна.

    “Оточ-Одь” эмнэлгийн эмч оточ П.Баатар нь Монголын тэжээхүйн ухаан хийгээд Брүгэгажиддүвийн 500 жил тасраагүй жүд, дамжилгын 9 дэх үе нь болон авч яваа монгол эмч мөн. Бас өөрийн нэр хүнд эмнэлгийнхээ төлөө бус монголын анагаах ухааны алдар сууг дэлхийн дээд түвшинд авч яваа эгэл жирийн эгэлгүй монгол эмч оточ билээ.

    Одоо тэрбээр эмнэлэг болон Дээд эрүүл мэндийн хүрээлэнгийн хамт олонтойгоо хамтран дээд эрүүл мэндийг дэлхий дахинаа түгээн дэлгэрүүлэх, хорт хавдарыг анагаах арга барилыг Монголын эмнэлэгийн байгууллагын ажилчид болон монгол хүн бүрт сургах талаар “ДЭЭД ЭРҮҮЛ МЭНД” төслийг эхлүүлээд байна.

    Ярилцлага унших

  • NMMA-2010 ШИНЭ ЖИЛ- Амралт, аялалаар салхилж, авъяасаа нээсэн, экстрим шинэ жил

    22-ны өдөр “Хөх морьт” амралтын газар очлоо. Орчин нөхцөлдөө тохируулаад боломжоороо тэмцээнүүд зохионгоо хорхог хийж идлээ (өвөл хорхог хийж идэх сонин л юм байна). Хөдөлгөөн багатай бидэнд хөдөлж, салхилах шиг сайхан баяр гэж юу байх билээ. Орой нь баярын ширээндээ сууж нээлтээ хийгээд, баг хамт олондоо 6 сарын турш бодож явсан чин сэтгэлийн үгээ хэллээ. Энэ үгүүд бол насан турш бодож явахаар санаанд хоногшсон үгүүд байлаа.

    Хуваагдсан багаараа мэндчилгээ дэвшүүлж урлагийн үзүүлбэрээр гэнэтийн бэлэг барьлаа. Нэгнийхээ нуугдмал авъяасыг сайн гэгч нь мэдэж авлаа. Манай шинэ жил дээр Монгол Улсын Ерөнхийлөгч Ц.Элбэгдорж, АНУ-ын ерөнхийлөгч Брак Обома нар ирж мэндчилгээ дэвшүүлсэн нь хамгийн гоё гэнэтийн бэлэг байлаа. 

    Ингээд өглөө болтол дуулж, хуурдаж, тоглож наадлаа. Өдөр тийш хотоор дайрж нэг сайн идэж аваад Sky resort-ын зүг хөдөллөө. За тэгээд skiboard, цана дуртайгаа сонгож, нисэх нь нисэж, хамраа авах нь авч, бөгсөө хөндүүр болтол унах нэг нь уналаа. Унаж, тусаж байж л Скитчин болно шүү дээ. Шинэ ондоо шинэ зүйлд өөрийгөө сорьж, шинэ спортын төрөлтэй орохоос илүү сайхан зүйл байх уу. 23-ны 23:00 цагт хаалтаа хийж нэгнийгээ гэррүү нь дөхүүлж өглөө. Ингээд бидний ажлын 2 өдөр амарч аяласан экстрим шинэ жил өндөрч байгаа юм биш 2011 оны турш шинэ жил үргэлжилсээр байх болно. Яагаад гэвэл өдөр бүхэн бидэнд шинэ, өдөр бүхэн амжилт, өдөр бүхэн баяр, өдөр бүхэн аз жаргал байсаар байх болно оо. 

    За бид шинэ жилээрээ ширээ тойрч томоотой суугаад, хүзүүндээ зангиа зүүгээд, хоол идэж, пиводоод тэмдэглэхийг хүссэнгүй. Бусдаас өөр байж бүгд бүтээлч идэвхи санаачлагатай оролцож нуугдмал авъяас чадвараа нээсэн, санаанд оромгүй үзүүлбэрээр дүүрэн амьдралын хөгжилтэй сайхан дурсамж болж үлдэхээр, өөрийгөө мэдэрсэн цорын ганц NMMA-чүүдийн л шинэ жил байлаа. 

    Шинэ ондоо шинэ эрч, шинэ амжилт, шинэ мэдрэмж, шинэ аз жаргалаар дүүрэх байх нь тодорхой. 2011 он бидний он жил байх нь бас тодорхой.

    Жааз дуучин Д.Цэцэнбилэгийн хэлдэгээр “ЗОРИЛГО ТОДОРХОЙ ХҮРЭХ НЬ ТОДОРХОЙ” шүү, залуучууд аа.

  • БЯМБА гарагийн бүлэг нээгдлээ

    ИНДИГО хүүхдийн цогц хөгжлийн төв нь хүүхдүүдийн чөлөөт цагийг зөв өнгөрүүлэх, тэдний сурч, мэдэх, хийж бүтээх чинхүү хүсэл тэмүүллийг нь дэмжих үүднээс БЯМБА гарагийн бүлэг нээлээ.

    Бямба гараг бүр 3 наснаас 6 насны хүүхдүүд төв дээрээ ирж, найз нөхөдтэйгээ оньсого таалцан, ертөнцийн гурав, түргэн хэллэгээр наадан, сургамжит видео үзэж, олон шинэ зүйлийг сурч мэдэхээс гадна, цаасан урлал, наамал болон бусад олон төрлийн бүтээл хийж байхаар боллоо.

    Та бүхэн Бямба гарагийн өглөө 10 цагаас орой 5 цаг хүртэл, өдрийн дөрвөн хоолтой, тав тухтай, цэвэр орчинд хүүхдийнхээ бүтээлч сэтгэлгээ, бүтээлч байдлыг хөгжүүлэхийг хүсвэл манай төвд хандаарай.

    /Энэхүү зураг дээр хүүхдүүд “Таван сармагчин” гийн тухай богино хэмжээний видео үзээд, түүнийгээ үйл хөдлөлд оруулан, үзүүлэх тоглолт хийж байна/

  • “МОНГОЛ БЛОГЧИД 2010” Ёслолын ажиллагаа сонин содон үйл явдлаар дүүрэн болж өндөрлөлөө

    The New Media Marketing Agency-н санаачилгаар Монголыг блогчдын дэмжлэгтэйгээр Мэдлэг чадвараа нийгмийн хөгжилд харамгүй зориулж буй блогчидоо хүндэтгэж, урамшуулж, нийгмийн сайн сайхны төлөө нэгдэж олон ажил хийж чадна гэдгийг харуулж, интернет орчин дахь соёлыг дэлгэрүүлж, монгол залуус боломжоо олж хараасай гэсэн зорилгоор зохион байгуулсан “Монгол блогчид 2010” наадам амжилттай болж өндөрлөлөө.

    1. Шалгаруулалтын хувьд: http://monbloggersevent.ideascale.com/хүссэн блогч бүр өөрийн блогийг бүртгүүлж дэмжигчид нь санал өгөх боломжтой нээлттэй санал асуулгаар 1-р шатны шалгаруулалт явагдлаа. 208 блогч блогоо нэр дэвшүүлэн өрсөлдүүлж 1963 хэрэглэгч бүртгэгдэж 3843 санал, 511 сэтгэгдэл үлдээсэн байна. Ингээд нийтийн санал асуулгаар хамгийн олон санал авсан 36 блогийг 2 шатанд дэвшүүлж, New Media Marketing Agency Index-ээр шалгаруулж, 25 блогийг 3-р шатанд нэр дэвшүүллээ. 25 блогт олны танил блогчид Амай, Нийлэлч ноён Б.Батбаяр, Сэтгүүл, зохиолч А.Амарсайхан, Монголын блогчдын холбооны тэргүүн Б.Батхүү, Блогч Г.Хантулга, “Adsolux” компанийн захирал Д.Дөлмандах, МҮОНТВ-ийнзахирал Ц.Оюундарь, “Синглтон” компанийн захирал В.Баярсайхан, Эдийн засагч Д.Жаргалсайхан гэсэн 10 хүн оноо өгч номинаци бүрийн шилдэг блог болон Шилдгийн шилдэг блогийг тодруулсан билээ.

    Зарим нэг туршлагатай блогчид өөрсдийн саналаар залуучууддаа боломж олгоё гэж хэлээд оролцохоос татгалзсан. Энэ бол блогч хүний зангараг, ухаалаг зан харагдаж байна. Мөн шүүгч нар болон зохион байгуулагч байгууллагын блогийг шилдэгт өрсөлдүүлээгүй болно.

    2. “Нийгмийн сэдэвт” төрөлд өрсөлдөхөөр шалгарч үлдсэн 5 шилдэг блог

    http://lehhh.wordpress.com/
    http://ulstur.blogspot.com/
    http://aanxaa.blog.gogo.mn
    http://www.jargalkhand.blogspot.com/
    http://alimaa.wordpress.com/ эндээс Шүүгч нарын саналаарhttp://aanxaa.blog.gogo.mn блог Шилдэг нийгмийн сэдэвт блогоор шалгарлаа. Шилдэг нийгмийн сэдэвт блогийн өргөмжлөлийг Монгол Улсын Ерөнхий сайд С.Батболд гардуулж, наадмын ивээн тэтгэгч байгууллага “АПУ” Green Spot-ийн төлөөлөл NEW MEDIA цом, нэрэмжит шагналаа гардууллаа.

    3. “Шилдэгт бизнес блог” төрөлд өрсөлдөхөөр шалгарч үлдсэн 5 шилдэг блог
    http://djargal.blogspot.com/
    http://vganzorig.blogspot.com/
    http://mongoliabusinessblog.com/
    http://www.mugmarketing.blogspot.com/
    http://enkhtor.blogspot.com/ эндээс Шүүгч нарын саналаарhttp://vganzorig.blogspot.com/ блог 2010 оны Шилдэг бизнес блогоор шалгарлаа. Шилдэг Бизнес блогийн өргөмжлөлийг МҮЭ-ийн ерөнхийлөгч С.Ганбаатар гардуулж, наадмын ивээн тэтгэгч “Хас” банк, Вестерн Юнион-ийн төлөөлөл NEW MEDIA цом, нэрэмжит шагналаа гардууллаа.

    4. “Олны таашаал хүртсэн” төрөлд өрсөлдөхөөр шалгарч үлдсэн 5 шилдэг блог
    http://enhmandah.blogmn.net
    http://gegeen.wordpress.com/
    http://www.zayaz.net/
    http://pclavlah.blogspot.com/
    http://www.suuder.com/ эндээс Шүүгч нарын саналаарhttp://www.suuder.com/ блог 2010 оны Шилдэг “олны таашаал хүртсэн” блогоор шалгарлаа. Шилдэг блогийн өргөмжлөлийгЕрөнхийлөгчийн зөвлөх Ч.Отгочулуу гардуулж, наадмын ивээн тэтгэгч “Оточ одь” дээд эрүүл мэндийн эмнэлэг болон “Мандухай хатан” компанийн төлөөлөл NEW MEDIA цом, нэрэмжит шагналаа гардууллаа.

    5. “Энтертаймент” төрөлд өрсөлдөхөөр шалгарч үлдсэн 5 шилдэг блог
    http://moviemn.posterous.com/
    http://www.itismovie.mn/
    http://huuy-haay.blogspot.com
    http://bibbytimes.com/
    http://www.izone.mn/ эндээс Шүүгч нарын саналаарhttp://www.itismovie.mn/ блог 2010 оны Шилдэг “Энтертаймент” блогоор шалгарлаа. Шилдэг Бизнес блогийн өргөмжлөлийг Эдийн засагч Д.Жаргалсайхан гардуулж, ивээн тэтгэгч “Fohow” эрүүл мэндийн компанийн Ерөнхий захирал С.Дашдулам NEW MEDIA цом, 1 сая төгрөгийн үнэ бүхий эрүүл мэндийн бүтээгдэхүүнээр шагналаа.

    6. Шилдгийн шилдэг блогоор http://gegeen.wordpress.com/ блог тодорч, өргөмжлөлийг зохиолч сэтгүүлч А.Амарсайхан, Цомыг “Тэнгэр” санхүүгийн нэгдлийн Гүйцэтгэх захирал Ч.Ганхуяг нар ёслол төгөлдөр гардуулснаар Шагнал гардуулах ёслолын ажиллагаа өндөрлөлөө. Энэ үеэр А.Амарсайхан “Залуусыг хөгжүүлэх гол талбар бол блог юм” гэж онцлон хэллээ.

    7. Монголын блогчидын холбооны тусгай шагналыг Блогч Гамп, Үлэмж нар авлаа. Мөн “Мандухай хатан” компанийн нэрэмжит шагналыг http://www.zayaz.net/ блог тус тус хүртлээ.

    8. “Монгол блогчид 2010” наадмын үеэр зохион байгуулагдсан нэг чухал ажил бол Олон улсын хөгжлийн бэрхшээлтэй иргэдийн эрхийг хамгаалах өдрийг тохиолдуулан наадмын таксын орлогоор хөгжлийн бэрхшээлтэй 2 иргэнд тусламж үзүүлсэн хүмүүнлэгийн ажил байлаа. Хэдийгээр таксын орлого нь тусламж үзүүлэх хэмжээнд хүрээгүй хэдий ч The New Media Marketing Agency-н залуус цалингаа хандивлаж, Батнасангийн Нэмэхбаяр, Балдорж Мөнххишиг нартLenovo брендийн лаптоп, “Мандухай хатан” компанийн иж бүрдэл гоо сайхны бүтээгдэхүүнийг тус бүрд The New Media Marketing Agency-н захирал А.Мэнд-Орших гардуулж цаашдын хийж бүтээх ажил үйлсд нь урам зориг өгснийхөө дараа Монгол блогчид наадам 100 блогчидын уулзалт зохион байгуулах санааг хамтын хамтын санаагаар хэрхэн баяжуулж Монгол блогчиддоо хүндэтгэл үзүүлэх наадам болтлоо хөгжсөн тухай бяцхан түүх үгүүллээ.

    Наадмын үеэр Ерөнхий сайд С.Батболд залуусын зохион байгуулж байгаа ажлыг сонирхоё гээд хүрч ирсэн нь Блогчид бидний ажлын тодорхой хэмжээгээр хүндэтгэж, үнэлж буйг харуулсан хэрэг боллоо. Ерөнхий сайдтай интернет орчинд блогчидоо уулзуулж байх боломж олгоё гэж шийдсэн учир Ерөнхий сайдын twitter акунтыг нь нээж олон нийтэд зарлалаа. Сайд ч интернет орчинд залуустай нээллттэй санал бодлоо солилцож байхаа амлаж дараагийн уулзалтын цаг болсон учир явахаар боллоо.

    Мөн Жааз дуучин Д.Цэцэнбилэг, BEATNEG Family бүжгийн хамтлаг, “Double effect” Bit Box, Моханик хамтлагууд хүрэлцэн ирж уран бүтээлээ өргөсөнөөс гадна Vanquish, Opozit, TG нар The New Media Marketing Agency-н хамт олонд зориулан бүтээсэн бүтээлээ өргөн барьлаа. Наадмын чөлөөт хөтөлбөр болгож наадмын азтангуудыг тодруулж Зураач В.Ундраагийн “Элбэг ширээ” уран зураг, Нэвтрүүлэгч Г.Оюунбатын “Монголын нууц товчоо” сонсдог ном тэргүүтэй бэлэг гардууллаа. Мөн нүүрэн дээрээ сошель лого зураг зуруулах, сошель баатруудтай зургаа татуулах, блогчидод зориулсан нээлттэй микрофон, twitter, facebook, blogspot, wordpress булангуудад гарын үсгээ үлдээх, диско бүжиг зэрэг олон сонирхолтой үйл ажиллагаа боллоо. “Монгол блогчид 2011” наадмын уриаг зохиох тэмцээн явагдаж 7 хүн өрсөлдсөнөөс “Сэтгэцгээе Бичицгээе, Сэрцгээе Монголчууд аа” уриагаар Д.Чимидцэрэн, “Мэддэгээ бичиж, Мэддэггүйгээ уншицгаая” уриагаар М.Жамъяанчойжил нар түрүүлж Датаком компаниас домайн хаяг авах эрх, “Монгол эгшиглэн”хамтлагийн Бид Монголдоо хайртай СД-ний эзэн боллоо. Монголын хамгийн анхны сошель нетворк болох Бизнетворк-ийн“Хүүхэд бүрийн төлөө хамтдаа” бүлгээс амьдралын түвшин доогуур хүүхдүүдэд тусламж үзүүлэхээр зохиож буй Хандивийн Маскарад шоуны хос тасалбарын дуудлага худалдаа болж Индала хэмээх бусгүй 200000₮-өөр худалдаж авлаа.

    Монгол блогчид 2010 наадам фото зургийн хальснаа ингэж буусан байна. Та очиж амжаагүй бол үзээрэй. 1 хуудас, 2 хуудас.

    Наадмын зохион байгуулахад бүх талын туслалцаа үзүүлж бодит ажил хэрэг болгож мэдээллийн технологийн хөгжилд үнэтэй хувь нэмэр оруулсан Ивээн тэтгэгч байгууллагууд

    – “Тэнгэр” санхүүгийн нэгдэл
    – “Хас” банкны Вестерн Юнион үйлчилгээ
    – “АПУ” Green Spot
    – “Fohow” хүний хөгжил, эрүүл мэндийн компани
    – “Оточ одь” дээд эрүүл мэндийн эмнэлэг
    – “Датаком” компани
    – “Мандухай Хатан ” гоо сайхны бүтээгдэхүүн үйлдвэрлэл, үйлчилгээний компани
    – “Телемакс Коммуникэйшн” компаниудад Монгол блогчидынхоо өмнөөс маш их баярлалаа.

    Мөн Мэдээллээр дэмжигч байгууллага http://biznetwork.mn/,http://gogo.mn/, http://www.news.mn/, http://shudarga.mn/,www.shuud.mn, www.mongolnews.mn д талархалаа илэрхийлье.

    Монгол блогчид нэгдэж чадлаа. Монгол блогчид хамтраад нийгэмдээ хувь нэмэр оруулж чадлаа. Блогийн ач холбогдолыг ойлгуулж чадлаа. Монгол залуус өөрийгөө болон Монгол улсаа дэлхийд таниулах гарцтай боллоо. Монгол блогчидын хамтын ажиллагаа хүчтэй, бодитой, үр дүнтэй байж чадна аа. Дараа жилийн наадмаар илүү олон блогтой, илүү их сонин сайхантай уулзацгаая.


    МОНГОЛЫН БЛОГЧИД МАШ ОЛОН БОЛОХ БОЛТУГАЙ!

    2010 оны 12 сарын 6

  • “Эх орны залуус” эр цэргүүдтэй хамтдаа

    2010.11.20-нд Мастербүлгийн санаачилсан “Эх орны залуус” сэдэвт залуусын хамтын ажиллагааны хөтөлбөрт хэсэг залуусын хамт оролцож Хилийн 0151 дүгээр ангид зочилж, цэргийн амьдралтай анх удаа танилцлаа. Энэхүү үйл ажиллагааг зохион байгуулсан Учрал, хамт оролцсон залуус, микро автобусаар үйлчилсэн Жамц ах болон халуун дотно хүлээж авсан Хилийн цэргийн 0151 ангийн хамт олондоо баярлалаа. Тус анги нь маш өвөрмөц зохион байгуулалттай үнэхээр гайхалтай сайхан хамт байсан бөгөөд бусад төрийн байгууллагууд санаа авмаар дэвшилттэй талуудтай санагдсан.

    Цэргийн 1 өдрийн амьдрал ямар байдагийг үзэх анх очихдоо, хүмүүсийн амнаас сонсож байснаараа цэргийн амьдрал өрөвдөлтэй байдаг байх гэж бодсон боловч очсоныхоо дараа бодол өөрчлөгдсөн. Цэргүүд тэнд маш их зүйлийг сурч, амьдрах чадварт суралцдаг юм байна лээ. Ялангуяа тэр цэргийн анги нь цэргүүддээ менежмент зааж өгч, амьдрах аргад суралцуулж байгаа нь бахархалтай санагдсан. Жишээ нь: Галуу, тахиа болон мал аж ахуй эрхэлж, шувууныхаа өндөгөө цэргийн ангиуддаа борлуулдаг, талхаа өөрсдөө барьдаг, ногоогоо тарьчихдаг, өвс, түлээгээ бэлдчихдэг гэх мэт олон ажлыг хамтын хүчээр амжуулдаг нь таалагдсан. Ер нь цэргийн хүчийг зөв удирдаж чадвал томоохон бүтээн байгуулалтыг хийж болмоор юм шиг санагдсан. Эх орныхоо торгон хилийг хамгаалж бидний амар тайван амьдруулж байгаа цэрэг эрсээрээ бахархаж байна. 

    Та нар минь байгаа болохоор эх орны минь торгон хил амгалан байх болно оо.

  • Миний уран бүтээлийг дэмжиж нэгэн эгэл жирийн сэтгүүлч залуугийн бичсэн шүлэг

    Нүгэлгүйгээр хайр яаж ирдгийг…

     

    Уран бүтээлч, зураач бүсгүй 

    Ундраа-д зориулав 

     

    Уран бийрийн аясыг бүсгүй сэтгэлээр нэрж

    Уйтгарт бараан орчлонг гэрэлтүүлж бодно

    Уян цагаан гарынхаа төгс хэмээр

    Уудам хатуу орчлонг зөөллөж бодно

    Хургүй яаж цэцэг ургадгийг

    Хувирахгүйгээр яаж хайр ирдгийг

    Хуурчрахгүйгээр сэтгэл яаж тэмүүлдгийг

    Хурууныхаа үзүүрээр мэдэрч бүтээлээ нэрнэ 

    Нүгэлгүйгээр хайр ирдэг болохыг

    Нүдээрээ биш сэтгэлээр мэдрэх нь зөв болохыг

    Нуургүйгээр нүүдлийн шувууд чуулж болохыг

    Нэгэн уянгаар амилуулах гэж бүтээлээ нэрнэ

    Монгол ахуйгаа мэдрүүлэх гэж бүтээлээ урлана

    Магадгүй түүнийгээ магтуулах гэж урам хүлээнэ

    Өчигдөргүй маргаашийг төсөөлөн байж бийрээ барина

    Өөрөө түүндээ уярч, өрөөлийн харааг булаана

    Бийргүй бол түүнд амьдрал утгагүй мэт санагдана

    Будаггүй бол түүнд хорвоо өнгөгүй мэт үзэгдэнэ

    Бүтээлч сэтгэл бийр, будагтайгаа байхад

    Бүтээхийн учиг хөвж, жаргана

    Уран бүтээлч хүмүүн гэдэг…

     

    2010.11.19

  • Хандын ЦЭРЭНДОРЖ- Дээд эрүүл мэндийг үндэслэгч, соён гэгээрүүлэгч

    Дээд эрүүл мэндийг үндэслэгч

    Хүний их эмч, Дээд эрүүл мэндийн хүрээлэнг үндэслэгч. Оточ Одь дээд эрүүл мэндийн эмнэлэгийн зөвлөх.

    Эрүүл мэндийн шинжлэх ухааны салбарт 60 гаруй жил ажилласан туршлага, судалгаа болон 300тгаруй жилийн яндашгүй арвин түүхтэй говийн алдарт зургаан их манрамбын эмнэлэгийн ариун голомт- тэжээхүй ухааны өв сангаас улбаалсан Дээд эрүүл мэндийн үзэл баримтлал, онолыг боловсруулахаас гадна хавдар, архаг өвчнүүдийг дээд эрүүл мэндийн эмчилгээний олон аргаар эмчилж амжилт олсон.

    “Судлаар онож танихуйн 108 шид оршив” (1993), “Нууцын маш гайхамшигт сангийн хураангуй” (2008) “Найман маналын гэгээ”, “Дээд эрүүл мэнд” (2010) номын зохиогч.

    Монгол Улсын Гавъяат Эмч














  • ӨНГӨТ ХҮҮХДҮҮД -Монголын шинэ үеийн хүүхдүүдийг судлах аян

    “ИНДИГО” хүүхдийн хөгжлийн төв,”ӨӨРЧЛӨЛТ ШИНЭЧЛЭЛТИЙГ ӨӨРӨӨСӨӨ ЭХЭЛЬЕ” ТББ болон “АУРА СТУДИ” хамтран “ӨНГӨТ ХҮҮХДҮҮД” -Монголын шинэ үеийн хүүхдүүдийг судлах аянг 2010.11.19-нд албан ёсоор эхэллээ.

    Энэхүү аяны эхний хүрээнд Монгол хүүхдүүдээ аурагаар нь оношилох ажлыг хийж байна.

    “ӨНГӨТ ХҮҮХДҮҮД” Монголын шинэ үеийн хүүхдүүдийг судлах судалгааны аяны зорилго:
    1.Монгол хүүхдийн сэтгэхүйн онцлог, төрөлх хэв шинж, авьяас чадварыг судлан нээн илрүүлэх, цаашдын сургалтын технологи, сурган хүмүүжүүлэх арга барилд тодорхой хувь нэмэр оруулах.
    2.Шинэ зууны иргэн гэгдэх Индиго хүүхдийг олж илрүүлэх, тэдний нөөц боломж, чадварыг нийгэмд эерэгээр ашиглахад оршино.

    Бид аурагаар хүүхдийн онцлогийг судлахаас гадна дараах нэмэлт судалгаануудыг сэтгэлзүйн үндэстэйгээр хийж, эцэг эх, сурган хүмүүжүүлэгч, асран хамгаалагч нарт чиглэсэн зөвлөгөө, сургалтыг явуулж байна.
    • зан төлөв, хувийн хэв шинж, авьяас,
    • сэтгэлгээний болон сэтгэхүйн онцлогийг илрүүлэх
    • гэр бүлийн харилцаа, гэр бүл төлөвлөлт
    • хүүхдийн нас зүй, орчны нөлөөг судлах, сурган хүмүүжүүлэх арга барил
    • мэргэжил сонголт, зорилго, амьдрал төлөвлөлт гэх мэт.

    Уриалга:
    Шинэ зууны хүүхдүүд оюун ухаан, сэтгэлгээний өндөр чадамжтай төрж байгаа билээ. Тиймээс та бүхнийг шинэ зууны хүүхдүүдийг судлаж, Монгол хүүхдүүдэд тохирсон сургалт, хүмүүжлийн шинэ арга барил боловсруулах энэхүү судалгааг дэмжин оролцоно гэдэгт итгэлтэй байна.

    Утас: 9915-8825, 8817-7575,