creativemongolia

Category: media-content

  • Тавхан үг- амжилтанд хүрэх түлхүүр

    ЭРЭЛТ ХЭРЭГЦЭЭГ ЭРЖ ОЛООД ХАНГАГТУН

    Гэсэн энэ тавхан үгэнд санхүүгийн амжилтанд хүрэх түлхүүр, өөртөө бат итгэх, өөрийгөө тоож ойшоохын түлхүүр оршино.

    Хэн хүний эрэлт хэрэгцээг л ангадаггүй бол нэг ч үйл хэрэг, нэг ч ажил гэж байхгүйсэн. Эрэлт хэрэгцээ нь өчүүхэн бол шан нь өчүүхэн байхаас гадна, энэххүү зорилгыг хэрэгжүүлчихлээ гэхэд та сэтгэл ханахгүй хоцорч ч мэднэ. Эрэлт хэрэгцээ нь угаасаа нүсэр их байх юм бол шан харамж нь мөн л их байх агаад сэтгэл ханах мэдрэмж, улам улам ихийг сэдэн бүтээх хүсэл тань чухамхүү цаглашгүй болно шүү.

    Ажил хөдөлмөр эрхэлдэг хэн боловч нийгэмд буй ямарваа нэг эрэлт хэрэгцээг л хангаж байдаг нь тодорхой. Бичиг дансны ажилтан, биеийн хүчин үнэлэгчид, хоол зөөгчдийн аль аль нь хүнд хэрэгтэй л ажил хийж байна. Гэвч тэдэнд ноогдож буй шаардлага харьцангуй их бус болохлоор тэд ч их бус шан харамж авдаг.

                 Автотэрэгний асаагуур сэдэн бүтээсэн Чарльз Кеттеринг гараараа мануйлдаж асаах төвөгтэй ажлаас хүнийг чөлөөлж, ингэсний үр дүнд чухамдаа бүх хүнд (ялангуяа эмэгтэйчүүдэд) машин жолоодох боломжийг өгсөн билээ. Кеттеринг сая сая хүнийг автотэрэг ашиглах боломжоор хангасан байна. Тэрээр нийгэмд буй болсон эрэлт хэрэгцээг л олоод хангасан байна. Чухамхүү үүнийхээ хариуд цаглашгүй их шан харамж хүртсэн юм.

    Бүх Америк даяар эрэгтэй эмэгтэй өдий төдий хүн арай чарай амь зуудгийн учир юун гэвээс, тэдний өөрсдийнх нь хангаж буй, орчин тойронд нь байгаа эрэлт хэрэгцээ тэдний чадвар боломжтой харьцуулах юм бол тун ч шалихгүй. Гэтэл тэд чадвар боломжоо өөртөө болон орчныхондоо тун ч ашигтайгаар зарцуулж болохсон билээ.

    Энэ санааг тодруулах жишээ татъя.

    Дунд зэргийн чадвар боломжтой залуу банкны доогуур зиндааны түшмэдийн алба хаахдаа, энэ ажилаа цэвэр цэмцгэр ажил, түүнээс гадна “Би Үндэсний тэргүүн банкинд алба хашдаг” гэж ам бардам хэлж болох тул өөрийнх нь “би”-гийн зиндааг дээшлүүлж байна гэж үздэг. Гэвч цалин пүнлүүгээ түргэн ахина гэж найдах найдваргүй гэдгийг төдөлгүй ухаарна. Ийм банкны залуу албан хаагчид арай өндөр зиндааныхнаас нэг нь тэтгэвэрт гарч суудал сулрахад л тушаал ахих болно. Суудал суларлаа ч гэсэн доогуур зиндааны өдий төдий залуу түшмэдээс цорын ганц нь л тушаал ахина. Ийм тохиолдолд аливаа хүн нэг талаас, атаархаж, хэн нэгийгээ егүүтгэхийг эрмэлзэнэ, нөгөөтэйгүүр, сэтгэлээр унаж гутарна. Банкны эздийн хувьд бол мань залуугийн хийдэг ажлыг дунд зэргийн чадвартай ямар ч залуу хүн гүйцэтгэж чадах болохоор мань хүнийг халж сольчихоос гудайхгүй. Тэгээд ч нэмэрлэж байгаа шалихгүй ашиг тус, цалин хлс хоёр нь ч шууд хамааралтай байгаа хэрэг.

    Тийм болохоор, мань залуу банканд нэн чухал тийм ажлыг хийх боломжийг олж байж л цалингаа нэмэгдүүлэх, гүйцэтгэсэн ажилдаа сэтгэл хангалуун байх цорын ганц замтай юм. Өөрөөр хэлбэл, одоогынх нь үйл ажиллагаа хангаж байгаагаас илт илүү эрэлт хэрэгцээг л олоод хангах хэрэгтэй гэсэн үг. Энэхүү зорилгод хүрэх олон арга зам бийгээс заримыг дурдъя:

    1.   мэдлэгээ дээшлүүлж нэмэгдүүлхийн тулд банкны үйл ажиллагааг улам няхуур судалж болно.

    2.   Арай илүү өгөөжтэй өөр ажилд орж болно.

    3.   Ганцаараа, эсвэл өөртэй нь ижил чадвар боломжтой хүмүүстэй нэгдэж өөрийн гэсэн ажил үйлс өрнүүлж болно.

    4.   Ганцаараа, эсвэл бусад хүмүүстэй нэгдэж шинэ санаа сэдэж боловсруулаад, ийм санаа саналын эрэлт хэрэгцээтэй байгаа хүмүүст худалдаж болно.

    Энэ бүх арга замын хүрэх гол зорилго бол өөрийнхөө чадварыг зарцуулж ашиглах хүрээг л тэлэхэд оршино. Гэвч арга тус бүрийг тус тусад нь авч үзье. Учир шалтгаангүйгээр ажлаа өөрчлөх юм уу, өөрийг гэсэн үйл ажиллагааг үндэслэл муутай эхлэх гэдэг тэнэг хэрэг. Нийгэмд буй эрэлт хэрэгцээг л хэрхэн хангах, одоогийнхоосоо илүү их ашиг тусыг нийгэмд хэрхэн өгөхөө тухайн хүн ухамсартайгаар эрж хайх ёстой.

    Үүнийг ухаарч ойлгохгүй байгаа хүн бол цөхрөнгөө бараад гингэнэж гонгинож байдаг муурын зулзага л гэсэн үг.

    Тийм хүмүүс ихэвчлэн, “Хөршийн хийж байгааг би нэг хийгээд үзье” гэдэг. Тийм хүмүүс өөр хүний нэгэнт сэдэж хийсэнг давтдаг боловч арай боловсронгуй болгодог. Тэдний найддаг цорын ганц зүйл бол аль болохоор хурдалж гүйцээд “үйл ажиллагааны өөрийн хэсгийг” шүүрч авах чадвар нь л болдог. Гэвч ийм хүмүүс бусдын хийснээс онцгой ялгарах, сор болохоор юм сэдэн бүтээж ерөөсөө чаддаггүй.

    Тийм хүмүүс өөрийнхөөсөө өөр хэний ч эрэлт хэрэгцээг хангадаггүй. Тийм хүмүүс “үйл тамаа эдлэж байна” гэж гоншигнож байдаг. Тийм хүмүүсийн гэргий нар ч нөхрөө ямагт ажилд дараастай, эцэс төгсгөлгүй өрсөлдөөнд орооцолдсон, гагцхүү ажлаа л гэдэг, амарч цэнгэж чаддаггүй, нойрны эм тан хайж эмчид байнга үзүүлэх юм гэж сэтгэл гонсгор байдаг.

    Иймэрхүү байдалд орчихгүйн тулд эрэлт хэрэгцээг эрж хайхтун!

    Хажууд тань, эргэн тойронд нь тань, хаа сайгүй байгаа эрэлт хэрэгцээг шүү.

     

    Эрэлт хэрэгцээг

    эрж олох нь 

                Нүдэнд үл үзэгдэх эрэлт хэрэгцээг эрж олох хамгийн ашигтай аргыг хүн өөрөө л олох ёстой.

    Бүрэн итгэлтэй хэлж болох нэг зүйл гэвэл эрэлт хэрэгцээ таныг эрж хайх бус, харин та эрэлт хэрэгцээг хайж олох ёстой юм шүү. Та ийм зорилго тавивал хүчин чармайлтанд тань совин ч туслах болно. Харин онгод бол совин татсаны л үр дүн билээ. Зохих шийдийг уйгагүй эрж хайхад аз тохиох явдал бишгүй л байдаг.

    Төмрөөр бүтээгдэхүүн үйлдвэрлэдэг байсан Алекс Левитийн тухай хуучилъя. Энэ хүн орон тооны ажилтантай, бас зарим нэг тоног төхөөрөмжтэй байсан байна. Тэгээд гэр ахуйн багаж төхөөрөмж үйлдвэрлэхээр санаа шулуудсан юм санж. Зах зээлийн судалгаанаас нэг удаа уншиж байгаад олонх эмэгтэйчүүд тоос сорогч ерөөсөө ч хэрэглэж үзээгүй тухай мэджээ. Чухам энэ зүйл л үйл ажиллагааныхаа хойшдын чиглэлийг төлөвлөхөд нь түлхэц болсон ажээ. Энэ асуудлыг судалж эхлэнгүүтээ л, үйлдвэрлэгчид тоос сорогч үйлдвэрлэх болсноороо хойш захзээлийг тоос сорогчоор хангахад л анхаарч жижиг сажиг зүйлээр л сайжруулах төдийгөөр зөнд нь орхисонг мань хүн ухаарчээ.

    /үргэлжилнэ/

  • Амьдралын аксиомууд

     Хүмүүс үргэлж л “тийм байсан бол (мөнгөтэй байсан бол, алдартай байсан бол, бизнесмен байсан бол г.м) мөн гоёо” хэмээн бодож санаа алдан ярилцах ажээ. Гэтэл зүгээр л бодсоноороо хэн нэгэн байх боломжгүй. Та яг одоо хэн байгаа яг түүгээрээ л байна. Харин хэн нэгэн болох боломж хүн бүрт бий. Хэн байхын тухай биш хэн болохын тухай л ярих хэрэгтэй. Та зорьж чадвал хэн ч болох боломжтой. Энэ амжилтанд хүрсэн хүмүүс чинь угаасаа ийм хүмүүс байсан ч юм биш, ийм хүмүүс болсон байхгүй юу.

    Зарим нь бүр дээшээ унахыг хүснэ гээч. Мөн тэнэг хэрэг шүү, хүн доошоо л унадаг харин дээшээ авирдаг билээ. 

     ***

                “Хүнийг хөдөлмөр бий болгожээ”. Тэгвэл залхуурал хүнийг буцаагаад адгуус болгодог ажээ. Худлаа гэвэл Бөмбөгөр дээгүүр очоод, өөрөө өөртөө ялагдсан, юу ч хийдэггүй залхуу адгуусуудыг харцгаа. Залхуурал хүнийг ийм болгодог аж.

    Харин та чинь арай залхуу хүн                 биш биз дээ.

      ***

                Ямар хүн завгүй байдаг вэ. Юм бүхнийг дараа хийе гэж хойшлуулдаг хүн. Би завгүй байна дараа болъё эсвэл өнөөдөр онцгүй өдөр байна маргааш л болъё гэх мэтээр хойшлуулсаар нэг л мэдэхэд дийлдэхгүй их ажилд дарагдсан байдаг. Тэд үргэлж завгүй явах мөртлөө  бүтээсэн ажил нь маруухан байдаг ажээ. Өнөөдөр хийх ажлыг маргааш гэж бүү хойшлуул, маргааш хийхэд амархан болчихгүй шүү дээ.

                Хийх зүйлээ цагтаа хийдэг, хэзээ ч          ажилыг хойшлуулдаггүй, ажил амралтаа зохицуулж чаддаг хүмүүс л хамгийн их завтай явдаг ажээ. Тэд маш их ажлыг амжуулна гээч.

    Лука

  • Эссэ бичих агуу бөгөөд санаанд оромгүй долоон сануулга

    1. Таны эссэг Олимпийн шүүгчид дүгнэхгүй

    Эссэ бол гараагаа арван оноотой эхлээд, алдаа гаргах бүрт оноогоо хасуулдаг Олимпийн усан сэлэлт, эсвэл уран гимнастикийн үзүүлбэр биш.

    Эссэг гартаа улаан үзэг барьсан харгис шүүгч бус, сэтгэл догдлуулсан мэдээллийг хүлээж буй багш профессор уншина. Энэ хүн эссэний тань сэдэвт бус, харин таны тухай сэтгэгдэлээ тархиндаа бичиж, дүгнэлт хийх бөгөөд бүр ихдээ “энэ залуу надад үнэхээр таалагдаж байна” хэмээн уулга алдана.

    2.Танд нэг гоц санаа байх ёстой

    Энэ нь эхний зөвлөгөөнөөс урган гарна. Эссэг уншигч хүн асуултын дагуу гол санааг хэр гаргасан эсэхийг мэдэхийн тулд маш хурдан уншдаг. Иймт та мянга түмэнтээ таарах /бөх барилдах нь намайг анхаарлаа төвлөрүүлэхэд сургасан, эмээгийн үхлээс болж сарнай үнэртдэг болсон, би бусдад тус хүргэхийг хүсдэг учраас эхлээд өөртөө туслана/ санааг давтсан л бол хэдий сайн цэгцтэй бичигдсэн ч олигтой үнэлгээ авахгүй л болов уу.

    Үнэндээ, дэвшүүлсэн санаагаа хэт чамирхаж илэрхийлвэл тэр нь их нуршсан болдог.

    3.Гол санаа тань өөриймсөг бөгөөд нүсэр биш байх ёстой

    “Том сэдэв”-ээс аль болох зайлсхий. Ойрхи Дорнод дахь энх тайван, экологи, иргэний эрх ба хүний ерөнхий зан төрх гэх мэт илэрхий нүсэр гарчигаас гадна “ёс суртахуун”-аар жонхуудсан том санааны олон зуун жижиг хувилбаруудаас болгоомжлох хэрэгтэй. Өөрийн гэсэн, агуулга төгөлдөр, анхны санаагаа хадгалсан байвал санаа тань тод томруун болно. Ёс суртахууны асуудал хөндөн ярих гэж байгаа бол санаанд оромгүй, өвөрмөц бөгөөд өөртөө тохируулсан байдлаар бичих хэрэгтэй.

    Амжилтгүй санаа: Намайг зусланд байхад нагац ах Харри маань үгүй болсныг эцэг, эх маань дуулгахад би тэрээр хичнээн энэрэнгүй, өгөөмөр хүн байсныг дурсан санасан.

    Арай илүү хувилбар: Нагац ах Харриг нас барах үед эцэг, эх маань надад анх нас бие гүйцсэн хүн шиг хандсан юм. Тэгэхэд би зусланд амарч байсан ба тэд намайг оршуулганд явуулахаас амрах нь дээр биз гээд хоер долоо хоногийн дараа л  сая тэрхүү гунигт мэдээг дуулгасан юм.

    Сануулга: Зөв хувилбар бол, яриа нагац ах Харригийн тухай бус /тэр эссэний гол агуулга биш шүү дээ/, таны тухай өрнөх ёстой. Иймд та аль болох тодорхой хүрээнд өөрийн тухай өгүүлэн бичвэл зохино. Ийнхүү бичихдээ багшид чухам хэн болох, бие даасан болон өсөн дэвших тэмүүлэлтэй эсэхээ илэрхийлнэ. “Жинхэнэ” өгүүлэгдэхүүн нь нагац Харри ч биш, эцэг, эхтэйгээ маргасан тухайд ч биш, харин таны өсөн хөгжих хүсэл тэмүүлэл, чадвар дэвшлийн тухай юм.

    4.Үлгэр-1: Сул чөлөөтэй бай,

     бүү тэвд

    Багш профессорууд танд олонтаа зөвлөх боловч та ямарч дасгал, сургуулалтгүй бол ханын зураг зурах зураач эсвэл кинонд тоглох жүжигчин адил балмагдана. Ер нь зурах, жүжиглэх нь хүн бүр хийж чадах зүйл мэт боловч бэлтгэл, сургуулилтгүйгээр барахгүй ажил. Бичих ч бас үүнтэй мөн адил. Та өөртөө итгэлтэй болсон нөхцөлд л тайвширч чадах тул хэд хэдэн ноорог бичиж, мэдлэгтэй хүнээс зөвлөгөө авсаны дараа л сая сэтгэл өег болно гэсэн үг.

    5.Үлгэр-2: Сул чөлөөтэй бай,

    бүү тэвд

    Та өөрөө чухам хэн бэ? Бид өөрсдөө бие хүний хувьд олон төлөөлөл, хэсэг болдог. Тухайлбал, гэр бүлийн хувьд нэг, найз нөхдийн хувьд нэг, албан ёсны үйл явдалд нэг, мөн ганцаардсан үедээ бас нэг өөр бие хүн болдог. Найзуудтайгаа тэнэглэн тоглож байхад тань Polaroid-аар авхуулсан болон ахынхаа хурим дээр хамгийн аятайхан гарсан хоёр зургийн алийг нь багш илүүд үзэх бол. Та стратегийн шийдвэр гаргах хэрэгтэй. Та эдгээрийн аль нэг дүрийг сонгож, сайтар боловсруулан танилцуулах ёстой. Энэ бол амжилтад хүрэхэд хамгийн дөхөмтэй- Таныг хийж буй ажилдаа махаруу, онцгой хүн гэдгийг харуулах дүрийг сонгоно гэсэн үг юм.

    6.Хайр дурлал бол хамгийн чухал нь биш ч, нэгэнт танд байгаа бол түүнийгээ гээж болохгүй

    Ямар ч сэдвээр эвтэйхэн бичиж болох боловч, хамгийн их сэтгэгдэл төрүүлэхүйц сэдвийг сонго. Эргэлзээ бус хүсэл эрмэлзлэлийнхээ тухай бич. өсвөр насныхны зовинол, ичгүүргүй явдлууд багш хүнд тун залхмаар байдаг тул үүнээс зайлсхийх хэрэгтэй.

    Та ямар нэг зүйлд сэтгэл татагддаг бол тэрхүү сэтгэл, итгэл үнэмшлээ тодорхой илэрхийлэн бич. Бага дүүдээ тэгтлээ хайртай биш бол яагаад гэдгээ мөн л хошигнол, сонирхолтой яриа, түүх, болсон явдал зэргээр тайлбарлан эссэн дээр өөрийн тухай аливаа чухал мэдээллийг хүргэж чадвал багшид үнэлэгдэх боломж тань төдийчинээ нэмэгдэнэ.

    7.Эссэ бичигчдийн ховор хэрэглэх хоёр үр нөлөөтэй хийгээд чамирхуу хэрэгсэл

    Харилцан яриа, ишлэл

    Тааруухан хувилбар: Миний төгөлдөр хуурын багш, хатагтай Фон Крабб зөвхөн төгөлдөр хуур тоглохыг заагаад зогсохгүй амьдралд хэрэгтэй олон зөвлөгөөг хичээлээрээ өгсөн юм. Түүний англи хэл нэг их сайнгүй бөгөөд байгаа байдал нь хуучинсаг боловч би түүнийг үргэлж санах болно.

    Илүү хувилбар: “Алекс, чамайг төгөлдөр хуурынхаа ард суун одоо л эхэлж байна гэж бодож байхад чинь бусад хүмүүсийн хувьд концерт аль эрт эхэлчихсэн байдаг. Тиймээс зөв сууж сур” гэж Фон Крабб хэлдэг. Тэр бүр анхныхаа өдөр л түүний араас өөр хоорондоо шивнэн “Хатагтай Фон Крабб бөмбөг” гэж дуудахгүй байхыг сануулж билээ. Гэвч бид яаж тэсэх вэ дээ. Бид шоолон ярилцдаг ч түүнийг хүндэтгэж бас эмээдэг байсан.

    Сануулга: Эссэний бичилтэд хадагтай Фон Крабб гайхалтай байсан гэдгийг дагнан өгүүлбэл утга төгс болж үл чадна. Хоёр дахь бичилт түүний дутагдал биш, иш татсан зүйлээр илүү байгаа тул зохиогч буюу Алексын тухай ойлголт өгч, түүний талаар аятайхан сэтгэгдэл төрүүлж байна.

    Уншигчийн сонирхолыг татна гэдэг бол эссэ бичигчийн бараг хамгийн гол зорилго, нууц түлхүүр нь юм. Танд илүү хувилбар хэмээх гарын авлагын адил бичих нь амаргүй. Үүнийг их сургуулийн профессорууд ч тэр бүр чаддаггүй. Гагцхүү ингэж бичихийг хичээж, эссэндээ гол дүрийн үгийг олж иш татвал өөрт тань тустай.

    Жишээ: Эдгээр өгүүлбэрийн аль нь илүү вэ?

    А. Би тэн хагаст нь дархан цаазтай, нөгөө хэсэгт нь томоохон эдлэн газар бүхий байшингуудтай том хотын захын нэгэн дүүрэгт суудаг.

    Б. Би Бостноос 15 бээрийн зайтай орших Массачусетс муж улсын байгалийн үзэсгэлэнт дархан цаазат, хагас хэсэг нь хувийн эзэмшилд хамаарах эдэлбэр газар бүхий Линколны эдлэнд амьдардаг.

    Сануулга: Хоёр өгүүлбэрийн Б нь арай илүү байна. Учир нь уншигчид хотын нэрийг сонирхох нь гарцаагүй. Америкийн агуу туужийн муу хувилбарт гардагийн адил “Миний аав том хотын том пүүст ажилдаг” гэж бүү бич. Үүнийхээ оронд Миний аав Вашингтон дахь “Арнолд ба Портер” хэмээх хуулийн том фирмд ажилладаг гэх нь дээр.

    Мэдээж аливааг хэт дэлгэрүүлэн бичихэд аюул бий. “Хуулийн том фирм” гэдгийг “340 гишүүнтэй, 12 хотод салбартай /та хотуудыг нь нэрлэж болно/ хуулийн фирм” гэж болно л доо. Гэхдээ ийм хэт дэлгэрэнгүй мэдээллийг эссэнд оруулах нь тун ховор юм.

    Кембрижийн  Их Сургуулийн эссэн үйлчилгээний албаны заавраас

  • TUYANA STYLE CODE AGENCY

    TUYANA STYLE CODE AGENCY

    Давтагдашгүй өөрийгөө бүтээ…

    АГУУЛГА

    1. ТАНИЛЦУУЛГА
    2. ХУВЬД ХҮНИЙ ИМИДЖ БҮРДҮҮЛЭЛТ
    3. БАЙГУУЛЛАГЫН ИМИЖ БҮРДҮҮЛЭЛТ
    4. БАЙГУУЛЛАГЫН ЦОГЦ ЗӨВЛӨХ ҮЙЛЧИЛГЭЭ
    5. СУРГАЛТЫН ХӨТӨЛБӨР
    6. ҮНИЙН САНАЛ
    7. ИМИДЖМАКЕР ТУЯАНА
    8. ХОЛБОО БАРИХ
    1. TUYANA STYLE CODE AGENCY ТАНИЛЦУУЛГА

    Олон улсад тэр дундаа баруун Европын орнуудад эрчимтэй хөгжиж эхлээд байгаа COLOR CONSULTING буюу ӨНГӨ ТОДОРХОЙЛОХ үйлчилгээг Монголдоо анхлан нэвтрүүлэн ажиллаж буй мэргэжлийн байгууллага. 2015 онд Герман улсад үйл ажиллагаагаа явуулж байгаад 2017 оноос үйл ажиллагаагаа явуулж байна.

    Бид Монголын тэргүүлэгч бизнес эрхлэгчид, улстөрч, УИХ-ын гишүүд, урлаг соёлын одууд, олимп, дэлхийн аварга тамирчидтай тогтмол хамтран ажиллаж байна. 

    Байгууллагуудын хувьд Наран групп, TV5 телевиз, Монголын хүүхдийн ордон зэрэг байгууллагуудтай хамтран ажилласан.

    Хувь хүний имиж бүрдүүлэлт, хувь хүн өөрийнхөө давтагдашгүй өнгө төрхийг тодорхойлж чадсанаар үргүй зардал, стресс бухимдал эрс буурч, хувь хүний амжилтанд хүрэх нэг чухал түлхүүр нь болдог. Бид хувь хүний амжилт, өөрчлөлтөөр дамжуулан нийгмийн сайн сайхан өөрчлөлтөнд хөтлөх эрхэм зорилготой ажилладаг.

    Color Consulting гэж юу гэсэн үг вэ? Хүн бүрт өөрийн арьс болон үс, нүдний өнгө бүүр цаашилвал хүний нүдэнд харагдахгүй хүний дотоод өнгө гэж байдаг. Хувь хүн өөрт зохицох үндсэн өнгө болон дотоод өнгөө судлуулж тодорхойлуулснаар өөрийн хувцасны сонголтондоо хувьсал хийж чадна. Зөвхөн танд тохирох өнгө бусад хүмүүстэй адилгүй. Өөрөөр хэлвэл хүн бүрийн хувьд энэ нь ялгаатай. Өнгөө тодорхойлуулах нь өөрийгөө олохын салшгүй нэг чухал хэсэг нь юм.

    Та хувь хүний имиж бүрдүүлэлтийн зөвлөгөөг авснаар өөрийн дахин давтагдашгүй дүр төрхийг тодорхойлуулж, өөртөө зохицсон царай төрх, үсний өнгө, үсний засалт, хувцаслалтыг бүрдүүлснээр өөртэй итгэх итгэл нэмэгдэж, ажлын амжилт болон өдөр тутмын амьдралд эерэгээр өөрчлөгдөж, өөртөө сэтгэл хангалуун өөдрөг амьдралыг бий болгож чадна.

    Та олон нийттэй харилцдаг салбарт ажилладаг удирдагч, бизнес эрхлэгч, улс төрч, урлаг соёлын салбарт ажилладаг бол өөрийн имидж бүрдүүлэх нь маш чухал нөлөөтэй юм. Бид танд үйлчилэхдээ хувь хүний нууц хадгалах ёс зүйн дүрмийг чанд мөрдөн ажиллах болно.

    Бид нийгмийн хариуцлагын хүрээнд олон нийт, оюутан сурагчидад стайл, имиджийн боловсрол олгох лекц, сургалтыг зохион байгуулж ажилладаг.

    2. ХУВЬ ХҮНИЙ ИМИДЖ БҮРДҮҮЛЭЛТ

    Хувь хүн бүр өөрийн дахин давтагдашгүй өнгөтэй байдаг. Өөрийн өнгийг тодорхойлсноор өөрт тохирсон хувцасаа өмсөх, өөрийнхөө сайхан талыг тодотгох боломжтой болно. Өөрийнхөө давуу талыг ойлгож, өөртөө итгэх итгэлийг нэмэгдүүлж өөртөө сэтгэл хангалуун амьдрах болно. Хувь хүнд өөрийн бие, нүүрний онцлогт тохирсон үсний өнгө, үсний засалт, нүүр будалтыг тодорхойлуулж гоё сайхан талаа илүү тодруулж гаргахад туслана. Гоо сайхны зөвлөгөө, нүүр, арьс арчилгааг тодорхойлж, дотроосооо болон гаднаасаа гоо сайхныг бий болгох зөвлөгөө өгнө. Өөрийн биед тохирсон хувцасны бүрдлийг тодорхойлох, давуу талаа тодруулж, сул талаа багасгах боломж бүрдэнэ.

    Та өөрөө мэдэхгүй бас бусдад харагдахгүй байгаа гоо үзэсгэлэнгээ нээж гаргаж ирмээр байна уу? Би ийм л хүн, хамгийн сайхан хувцас өмсөөд би тийм л харагдана гэж бодож байгаа бол та маш том эндүүрч байна. Өөртэй болон бусдад эерэг сэтгэгдэл төрүүлж өмсөж яваа хувцаснаасаа эрч хүчийг мэдэрч бусдад түгээж явах боломжтой. Хувцасны загвараас гадна хүн бүр өөрт зохицох өнгөнүүд байдаг.

    Түүн шиг биш түүнээс илүү өөрөөрөө гэрэлтэх нь таны тодотгол болох юм.

    Өнгөний зохицолдолгоо гэдэг бол хамгийн чухал. Хэрэв та өөрт тохирох өнгийг мэдэж авч тохирох өнгөний хувцасаа сонгон өмсөж чадсан бол өөрийн хувийн амьдрал болон бизнес карьертай амжилтаа ахиулж чадна. Өмссөн өдрийнхөө өглөөнөөс энэ бүхэн эхлэнэ. Тэгвэл ямар ямар өнгө өөрт тань зохицох вэ? Тухайн хүнд тохирох өнгийг гаргаж ирэхийн тулд мэргэжлийн COLOR CONSULTING /ӨНГӨ ТОДОРХОЙЛОГЧ/ тусгай өгөгдсөн стандарт хэмжээтэй мэргэжлийн багаж хэрэгсэлээр таныг судалж, тодорхойлох бөгөөд ингэснээр танд тохирох үндсэн өнгөнүүд зөв гарч ирдэг.

    ХЭНД ЗОРИУЛАГДСАН БЭ?

    • Өөрийн гоо сайхан, хувцасны стиль загвартаа анхаардаг охид бүсгүйчүүд болон эрчүүд;
    • Улс төр, урлаг соёлын салбарынхан;
    • Олны танил эрхэмүүд;
    • Үйлчилгээний байгууллага болон компаниуд / Өөрийн ажилчидынхаа гоо зүйн боловсролд анхаарч хувцаслах болон зөв будах онол практикт суралцуулах/;
    • Мэргэжлийн гоо сайханч болон гоо сайхан Make-Up үйлчилгээний бизнес эрхлэгчид, үсчид;
    • Стилист болон fashion designerууд, загвар өмсөгч, фото моделууд;

    3. БАЙГУУЛЛАГЫН ИМИЖ БҮРДҮҮЛЭЛТ

    Хувь хүний имидж бүрдүүлэлтэд суурилж, байгууллагын цогц имиджийг бүрдүүлж, эерэг, өөдрөг байгууллагын соёлыг бүрдүүлэхэд чиглэсэн багц үйлчилгээ.

    Бизнес, офисс, худалдаа, үйлчилгээ, банк зэрэг үйлчилгээний салбарын онцлогоос хамаарсан хувцаслалт, стайл бүрдүүлэлт бүгд өөрийн өвөрмөц онцлогтой байдаг. Байгууллага өөрийн онцлогт тохирсон зөв имидж бүрдүүлэлт хийснээр ажилтануудын сэтгэл ханамж, бүтээмжид эерэгээр өөрчлөхөөс гадна үйлчлүүлэгчийн хандлага, сэтгэл ханамжид нөлөөлдөг.

    Хийгдэх ажил

    Тайлбар

    Байгууллагын имидж лекц 1- 2цаг

    Суурь мэдлэг олгох лекцийг нийт хамт олонд зориулан зохион байгуулна.

    Имидж сургалт (эрэгтэй) 2цаг

    Хувь хүний имиж, нүүр будалт, гоо сайхан, фэйшн стаилийн талаар суурь мэдлэг олгох сургалт.

    Имидж сургалт (эмэгтэй) 3цаг

    Хувь хүний имиж, нүүр будалт, гоо сайхан, фэйшн стаилийн талаар суурь мэдлэг олгох сургалт.

    Имидж бүрдүүлэлтийн ганцаарчилсан судалгаа, зөвлөх үйлчилгээ.

    Өөрийн өнгийг тодорхойлсноор өөрт тохирсон хувцасаа өмсөх, өөрийнхөө сайхан талыг тодотгох боломжтой болно. Цагийн хуваарь гаргаж 1 өдөрт  2 хүнд хувь хүний имидж бүрдүүлэлтийн ганцаарчилсан зөвлөх үйлчилгээг үзүүлнэ. 1 хүнтэй 2 өдөрт 4- 6 цаг ажиллана.

    4. БАЙГУУЛЛАГЫН ЦОГЦ ЗӨВЛӨХ ҮЙЛЧИЛГЭЭ

    Файш дизайн, хувцас загвар, гоо сайхны салбарт ажилладаг байгууллагуудад зориулсан цогц зөвлөх үйлчилгээ. Тухайн байгууллагын үйлчилгээний стандартыг сайжруулах, хувцас загварын концепцийг тодорхойлоход бодлогын түвшинд зөвлөх үйлчилгээ үзүүлж өдөр тутмын ажил биечлэн зөвлөгөө өгч ажиллана. Баг хамт олныг сургаж, чадваржуулна.

    7 хоногт зөвлөгөө өгөх цаг: 12,5 цаг

    Сарын зөвлөгөө өгөх цаг: 50цаг

    5. СУРГАЛТЫН АГУУЛГА | ХӨТӨЛБӨР

    1. Өнгө гэж юу вэ? Өнгө тодорхойлох гэж юу вэ?

    /Өнгө хүнд хэрхэн нөлөөлдөг вэ? Өнгөө тодорхойлуулсан хүн ямар өөрчлөлтийг бодитоор мэдэрдэг вэ? гэх мэт өнгөний талаар бүрэн зөв ойлголт

    1. Style / Image / Fashion гэж юу вэ? 

    Өөрт тохирох хувцасны загвараар хэрхэн стиллэг харагдах вэ? Style, Image, Fashion гэж юу вэ?

    1. Make-Up / Практик будалт 

    Суралцагчдаас сонгон зөв будалт хэрхэн өөрчлөлт үзүүлдэг болохыг практикаар үзүүлж Make-Up зөвөлгөө мэдээлэл өгнө

    1. Гоо сайхан/ Арьс арчилгаа

    Арьс арчилгаа хэдэн наснаас эхлэх вэ? Нас насны хүмүүсийн арьсны онцлог, мөн арьс арчлах бүтээгдэхүүний сонголтуудыг талаар бүх талын зөвөлгөө мэдээлэл

    1. Зөв хувцаслалт ба биеийн галбир

    /Хүн бүрийн биеийн хэмжээ харьцаа өөр өөр байдаг ба таны биеийн онцлогт тохирсон хувасны сонголтуудын талаар зөвлөгөө мэдээлэл

    1. Нүүрний хэлбэр/ Зөв үс засалт 

    Өөр бусдад зохиж байгаа малгай болон шил таньд зохихгүй байх нь таны нүүр болон толгойны хэлбэртэй шууд холбоотой. Нүүрний хэлбэртэй зохицсон малгай болон шил сонгох

    6. ҮНИЙН САНАЛ

    Төрөл

    Хугацаа

    Тайлбар

    Хувь хүний имидж бүрдүүлэлтийн үндэс өнгө доторхойлох үндсэн үйлчилгээ (Эрэгтэй)

    2- 3цаг

    Ганцаарчилсан судалгаа, зөвлөгөө

    Хувь хүний имидж бүрдүүлэлтийн үндэс өнгө доторхойлох үндсэн үйлчилгээ (Эмэгтэй)

    4- 5цаг

    Ганцаарчилсан судалгаа, зөвлөгөө

    Имидж бүрдүүлэлтийн практик ганцаарчилсан зөвлөгөө

    Цаашид нэмэлтээх цаг авч гарцаарчилсан зөвлөгөө авах боломжтой.

    Байгууллагын имиж бүрдүүлэлт

    7 хоног
    1. Нийт хамт олонд зориулсан суурь мэдлэг олгох нэгдсэн сургалт 1цаг
    2. Эмэгтэйчүүдэд зориулсан сургалт 3цаг 
    3. Эрэгтэйчүүдэд зориулсан сургалт 2цаг
    4. Ганцаарчилсан судалгаа, зөвлөгөө 20 хүртлэх хүнд (түлхүүр хүмүүсээ байгууллага өөрөө сонгоно)

    Байгууллага 21-с дээш хүнд гарцаарчилсан судалгаа, зөвлөгөө авах тохиолдолд санал боловсруулж танилцуулна.

    Байгууллагын цогц зөвлөх үйлчилгээ

    3- 6 сарын гэрээ байгуулж ажиллана.

    1 сард 40- 50 цагийн зөвлөх үйлчилгээ өгнө.

    Зөвлөх үйлчилгээний төлбөрийг сар бүрийн эхэнд урьдчилж авдаг.

    Жич: [Дээрх төлбөрт НӨАТ ороогүй болно] Төлбөрт баг хамт олны сургалтын танхим, хотоос гадна бол унаа, орон нутаг бол томилолтын зардал багтаагүй болно. Оролцогчдын тоо, сургалтын давтамж, захиалагч талын нэмэлт санал хүсэлт зэргээс хамааран сургалтын хөтөлбөр, төлбөрт өөрчлөлт орж болно.

    Ганцаарчилсан зөвлөгөөнүүд манай өөрийн байранд явагдана.

    7. ИМИДЖМАКЕР ТУЯАНА

    Tayana Style Code Agency (Туяана стайл коде эженси) үүсгэн байгуулагч, имиджмакер

    Имиджмакер Д.Отгонтуяа нь Fashion Stylist, гоо сайханч, Make up Artist, Image Maker, Hair stylest мэргэжилтэй. 2006 оноос хувь хүний имидж бүрдүүлэлтийн нарийн мэргэшилүүд болох хувь хүний өнгө тодорхойлох, гоо сайхан, үсний стилист, нүүр будалтын чиглэлүүдээр мэргэшин суралцаж, ажиллаж туршлага хуримтлуулсан.

    2003- 2006 онд Герман Улсын Штутгард хотын Хатагтай Бергитийн нэрэмжит загвар зохион 

    бүтээгчдийн коллежийг Moda Design, Fashion Stylist чиглэлээр суралцаж төгссөн.

    2005- 2011 онд Германы нэрт дизайнер Blut geschwister компани болон Abseitz botique-д стилист;

    2012- 2014 онд ХБНГУ-ын Штутгард хотын Хатагтай Леманы нэрэмжит гоо зүйч, 

    гоо сайхны сургуулийг Гоо Сайханч мэргэжлээр суралцан төгссөн.

    2015- 2016 онд ХБНГУ -ын Мюнхэн хотын “Woman Styling” сургуульд Color Consultation , 

    Stylist, Make up Artsist, Hair Stylist, Personal Shoper, Fashion Stylist мэргэжлүүдээр 

    суралцан төгссөн;

    2015 оноос Герман Улсын Munchen хотод хувь хүний имидж бүрдүүлэлтийн Style Code агентлагаа Woman Styling Lounge-тай хамтран ажиллуулж бизнесмэн, багш, урлаг соёлын 60 гаруй хүний хувийн зөвлөхөөр ажиллаж байсан туршлагатай.

    2017 оноос Монгол Улсдаа имиджмакерийн мэргэжлийн зөвлөх үйлчилгээг нэвтрүүлж Tuyana Style Code Agency нээн ажиллуулж байна.

    www.facebook.com/StyleCodeAgency

  • “БАЙГАЛЬ ЭЭЖТЭЙГЭЭ УУЛЗ” ОРЧИН ҮЕИЙН УРЛАГИЙН ҮЗЭСГЭЛЭН

    Та байгаль ээжтэйгээ уулзаж, хэлж буй үгийг сонсож, ярилцаж, сэтгэл зүрхээ амраахыг хүсвэл энэхүү үзэсгэлэнд хүрэлцэн ирнэ үү.

    Монголын тал нутаг, нүүдэлчин ардын ахуй амьдралын өвөрмөц хэв маяг, соёл, гүн ухаан, монгол хөг аялгуу, сэтгэлгээ шингэсэн дахин давтагдашгүй өвөрмөц уран бүтээлүүд. Контемпорари урлагийн Видео Арт, Уран зураг, Өрөг /Инстолляци/, Фото арт, Перфоманс арт зэрэг орчин үеийн урлагийн үзэсгэлэн.

    Хэзээ: 6 сарын 20-ны 17:00 цагт
    Хаана: Занаду Арт Галлерей

    Уран бүтээлчид
    1. Л.Энхбат \”Шинэ Үе Урлаг” нийгэмлэгийн тэргүүн\
    2. Н.Амарсайхан \”Шинэ Үе Урлаг” нийгэмлэгийн удирдах зөвлөлийн гишүүн\
    3. С.Зэсээ \ЗанадуАрт галерейн куратор, урлаг судлаач\
    4. Д.Батзориг \”Хөх нар” орчин үеийн урлагийн төвийн тэргүүн\
    5. Т.Энхболд \”Хөх нар” орчин үеийн урлагийн төвийн гишүүн\
    6. В.Ундраа \Монголын Урчуудын Эвлэлийн гишүүн зураач\
    7. Ц.Ариунтөгс \Чөлөөт Уран бүтээлч\

    Tax: FREE
    Утас/факс: 976-11-310239, 99836162

    Ерөнхий зохион байгуулагч: “New century-Art” assocation /Цөлжилт урлагт төслийн хүрээнд зохион байгуулав/

  • ЭЛСЭН МАНГАСТ нутгаар урлагийн эрэл хийлээ

    5 сарын 5-аас 5 сарын 9 хооронд “Шинэ үе урлаг” холбооны уран бүтээлчидтэй хамт “Цөлжилт ба урлаг” төслийн шугамаар урлагийн бүтээл хийхээр Дорноговь аймгийн нутгаар аялаад ирлээ. Энэ аялал нь маш их сонирхолтой боллоо. Бас их юм үзэж харж ойлгож, сурч яваад ирлээ дээ.

    Бидний зам Хүслийн уул, Зүүнбаян, Хашаатын гол, Хамрын хийд /Энергийн төв/, Баярбүрдийн элс, тэгээд буцаад Сайншанд орсон доо. 

    Хар уул буюу Хүслийн уул: Тэнд их сонин юм зөндөө байсан. Уул нь оройноосоо харлаад ирсэн өндөр хайрхан юм билээ. Тэнд урт шат, урт гүүр, олон суварга бас хүслээ шивнээд эсвэл бичээд шатаадаг суварга байсан. Би бас тэнд гэр бүлийхэндээ сайн сайханыг хүссэн хүслээ бичээд шатаасан. Бас хүүхдээ даатгадаг Хүүхдийн овоо гэж байдаг юм байна лээ. 

    Энергийн төв: Тэнд их гоё юм байна лээ. Төвд нь нэг хонх байдаг юм билээ. 108 суварган хүрээний өмнөд талд гурван хаалгатай сүм хэлбэртэй хаалгатай. Дунд хаалгаар нь энгийн ардууд ордог, зүүнээр нь ихэс дээдэсүүд, баруунаар нь лам хуварга нар ордог байсан юм гэнэ.  Тэгээд нэг ходоод шиг чулуун овоонд муу зүйлээ шивнээд арилгуулдаг. Бас бид нарын ороод гардаг хаалганы нүүрэнд нүд байдаг. Тэр нүдэнд муу санаж явдаг бүх хүмүүсээ үлдээдэг. Тэгээд оюун ухаанаа цэвэрлэн энергийн төврүүгээ ордог юм байна. Тэгээд арц хүж уугиулдаг томоос том бойпорны санд биеэ ариулаад цааш очир тойрогыг будаа цацаж тойроод өнгөрсөн, одоо, ирээдүйн гурван тойргийг тойрч очоод тэндээсээ архи сархадын идээгээр хүслийн уулын зүг цацал өргөсөн, өөрийн бие ажлаа даадгана. Тэгээд цааш явж энерги авдаг улаан шороон дээр хэвтэж энерги авсан. Дээшээ харж хэвтэж байгаад нарыг их том дугуй хүрээ хүрээлээд гадна талаар нь, солонго ороосон болохыг харлаа. Тэгээд гэрийнхэнлүүгээ ярьж энерги дамжууллаа.

    Дээш гарч овоог нь тойрч уран бүтээлчидтэйгээ хамт “Үлэмжийн чанар”-ыг дуулаад доошоо бууж цагаан чулуу авч гарч, үүдээр гарахдаа нэр усаа хэлээд, ирээд буцлаа гээд арагшаа ухарч гараад, чулуугаа орхино. Тэгээд Газар доорх агуй бас Эхийн умайгаар гарч өвчтэй газраа үрдэг хаданд биеэ үрсэн дээ. Хэ хэ их сонин л юм билээ.  Биднийг газарчилж явсан жолооч ах л билэнд олон сонирхолтой зүйлийг тайлбарлаж өгч байсан даа.

    За тэгээд уран бүтээлчид тус тусдаа бүтээлээ хийхээр тал тийшээ явах үед ганцаараа байх боломж олдож байсан бөгөөд тэр үеэд нь олон зүйлийг бодож, бясалгаж, өөрийгөө сонсож амар амгаланг мэдрэхэд гайхалтай байсан даа.

    Сонин сайхан зүйлээс гадна хүнд, хэцүү зүйлүүд мэдээж байсан. За тэр их элсийг харахад нэг талаараа гайхалтай үзэсгэлэнтэй харагдаж байсан ч энэ нь байгалийг идэж байгаа мангас шиг л санагдаж байсан.

    Говь газрын мал хүмүүс хэцүү амьдардаг нь харагдаж. Ихэнхдээ элсэн шуурга болж байсан. Мал нь юу иддэг юм бол гэмээр л харагдаж байсан. 

    Араас шуурах элсийг
    Эргэж ч харж амжихгүй
    Элсний нүүдэлд дайрна
    Гайхалтай бас аймшигтай
    Элсэн манхан чи
    Сайхан харагдах хэдий ч
    Нүүн наашлах
    Элсэн мангас мэт
    Бүхнийг залгиж авна

    Ингээд уг аялалын үр дүнд бүтсэн урлагийн бүтээлүүдээр бүтсэн “Цөлжилт ба урлаг” үзэсгэлэн 6 сарын 17-нд Занаду Арт галерейд болно. Та ч бас байгаль эхийн үр ач гэдгээн санаж бидний үзэсгэлэнг ирж үзээрэй.

  • МОНГОЛД ҮЙЛДВЭРЛЭВ АЯЛАЛ

    2011 оноос үндэсний үйлдвэрлэлээ дэмжих зорилгоор МОНГОЛД ҮЙЛДВЭРЛЭВ танин мэдэхүй, нөхөрлөлийн цуврал аялалыг санаачлан зохион байгуулж байна. Нийгмийн идэвхитэй сайн дураар нэгдсэн залуус үйлдвэрээр зочилж газар дээрээс нь бодит мэдээллийг олон нийтэд хүргэж сэтгэгдэлээ хуваалцдаг.

    Салбартаа нөлөө бүхий болон олон нийтийн сүлжээнд идэвхитэй иргэд, хэрэглэгч, харилцагчдийн төлөөлөлд үйлдвэртэй танилцах аялалыг зохион байгуулж, бүтээгдэхүүний танилцуулга, амталгааг явуулна. Энэ үйл ажиллагааг нэвтрүүлэг бүтээж олон нийтэд хүргэнэ.

    Зорилго: Тэргүүлэгч үйлдвэрлэлийг олон нийтэд танилцуулж, хэрэглэгчийн итгэл үнэмшил, бахархалыг нэмэгдүүлэхэд чиглэнэ.

    Үндэслэл: Хүн харсан зүйлдээ итгэж, бүрэн ойлголттой болдог учраас, тодорхой түвшинд технологи, үйлдвэрлэлийг үзүүлж үнэнч хэрэглэгчийг нэмэгдүүлж чадна.

    2011 оноос үндэсний үйлдвэрлэлээ дэмжих зорилгоор МОНГОЛД ҮЙЛДВЭРЛЭВ танин мэдэхүй, нөхөрлөлийн цуврал аялалыг санаачлан зохион байгуулж байна. Нийгмийн идэвхитэй сайн дураар нэгдсэн залуус үйлдвэрээр зочилж газар дээрээс нь бодит мэдээллийг олон нийтэд хүргэж сэтгэгдэлээ хуваалцдаг.

    Үйл ажиллагааны дараалал

    1. Агуулга бүтээх ТВ-тэй тохирох
    2. Оролцогчдыг сонгох
    3. Оролцогчидод санал тавьж, бүтгэх
    4. Өдрөө товлож, үйлдвэртэй тохирох
    5. Оролцогчидоо цуглуулж, нэгдсэн унаагаар үйлдвэр дээр авчирах
    6. Үйлдвэртэй танилцуулна
    7. Бүтээгдэхүүний амталгаа, нийт бүтээгдэхүүний танилцуулга пресентаци
    8. Хамтран ажиллах хэлбэр, саналыг танилцуулна
    9. Гарын бэлэг, бүтээгдэхүүний дээж
    10. Оролцогчдыг үдэн гаргана.
    11. Агуулгыг бүтээж олон нийтэд хүргэнэ.
    12. Оролцогчидоор нийтийн сүлжээнд мэдээлэл бичүүлнэ.

  • Б.Цэгмэд- Монголын хүндийн өргөлтийн хоёр дахь мастер | Дэлхийд 66 рекорд эзэмшдэг

    Монголын хүндийн өргөлтийн хоёр дахь мастер, пауэрлифтингийн Дэлхийн мастеруудын аварга шалгаруулах тэмцээнээс зургаа, мастеруудын Дэлхийн цомоос найм, Азийн аварга шалгаруулах тэмцээнээс долоон алт хүртсэн Олон улсын шүүгч, Олон улсын хэмжээний мастер

    Тэрбээр наян нас хүрч яваа ч пауэрлифтингийн мастеруудын Дэлхийн рекордыг тогтоож Монголынхоо нэрийг дуурсгасаар яваа юм.

    -Та пауэрлифтинг буюу хүчний гурван төрлийн мастеруудын ангилалд дэлхийн 66 удаа рекорд эвджээ. Танд баяр хүргэе?

    -Би хүндийн өргөлтөөр 60 жил хичээллэсэн. Харин хүчний гурван төрлөөр 2010 оноос тууштай хичээллэж байна. Учир нь энэ төрлөөр мастеруудын зэрэгт рекорд тогтоох боломж их байсан юм. Миний хувьд энэ сарын 1-3-ны хооронд ОХУ-ын Челябинск хотод хүчний гурван төрлийн Азийн аварга шалгаруулах тэмцээнд оролцож 14 рекорд эвдсэн. Мөн энэ сарын 7-10-ны хооронд Новосибирскт болсон “Дэлхийн цом”-ын тэмцээнд оролцож 19 рекорд эвдлээ. Энэ жил манай Хүндийн өргөлтийн холбооны 60 жилийн ой тохойж байгаа юм. 76 настай ахмад тамирчны хувьд энэ ойгоо нийт 33 рекорд эвдсэн амжилтаар угтаж байна даа. 2013 оны Дэлхийн аварга шалгаруулах тэмцээний амжилтыг оролцуулбал нийт 66 удаа рекорд эвдсэн байна.

    -Ямар тэмцээнүүдэд оролцож байсан бэ?

    -Монголд 2006 онд хүчний гурван төрлөөр улсын аварга шалгаруулах тэмцээн зохион байгуулахдаа анх удаа мастер ангиллаар зохион байгуулсан юм. Тэр үед суулт, таталтаар хоёр мөнгөн медаль хүртсэн. Дараа нь 2010 онд Азийн аварга шалгаруулах тэмцээнд рекорд тогтоосон. Мөн 2013 оноос дэлхийн рекорд тогтоож эхэлсэн. 2013 оны арваннэгдүгээр сард АНУ-ын Флорида мужийн Вест Палм Бийч хотод зохион байгуулагдаж байсан Дэлхийн аварга шалгаруулах тэмцээнд амжилттай оролцсон юм. Уг тэмцээнд хамгаалалтын дан хувцастай, бэхжүүлсэн хувцастай төрөлд 70-74 насны -75 кг-ын ангилалд гурван алтан медаль хүртсэн. Түүнчлэн дан хувцастай төрөлд шилдэг мастерын цом хүртэж байлаа. Дэлхийн аваргын тэмцээнд 20 гаруй орны 800 орчим тамирчин оролцсон. Үүнд Монгол Улсаас таван тамирчин оролцож найман алт, хоёр мөнгө, хоёр хүрэл медаль хүртэж байсан түүхтэй.

    -Та хүчний гурван төрлөөрөө хэд, хэдэн кг өргөж рекорд тогтоосон бэ?

    -Би хүчний гурван төрлийн суултанд 220 кг өргөж дэлхийн мастеруудын дээд амжилт үзүүлсэн. Харин шахалтанд 105 кг, таталтанд 195 кг өргөсөн. Нийтдээ 520 кг өргөж байсан. Гэхдээ саяын хоёр тэмцээнд энэ амжилтдаа хүрч өргөөгүй, дээд тал нь 465 өргөсөн. Гэсэн ч мастерын зэрэглэлд буюу 40-өөс дээш насны ангилалд түрүүлсэн.

    -Яагаад хүндийн өргөлтийн спортыг сонгон хичээллэв. Анхны багшийнхаа тухай дурсаач?

    -Миний багш Аюурзанын Гунгаа гэж хүн байсан. Монголд хүндийн өргөлтийг үүсгэн байгуулсан хүмүүсийн нэг. Энэ спортоор хичээллэх болсон тухайд гэвэл, 1956 онд Улаанбаатарт дөрвөн ерөнхий боловсролын сургууль байсан юм. Тэр дөрвөн сургуулийн 1000-аад хүүхдээс бяртай, тэнхээтэйг нь шалгаруулж хүндийн өргөлтөөр хичээллүүлж эхэлсэн. Түүнд би шалгарч 16-тайгаасаа л энэ спортоор хичээллэж эхэлсэн дээ. Хамгийн анх Москвад тэмцээнд оролцож дөрөвдүгээр байранд орж байлаа. Би бага насандаа мал хариулж өссөн учраас хотын хүүхдүүдийг бодвол бяр тэнхээтэй байсан болов уу.

    -Та аль нутгийн хүн бэ?

    -Би Баянхонгор аймгийн Гурванбулаг сумын харьяат. Миний аавыг Паламын Магсаржав гэдэг, их бяр тэнхээтэй хүн байсан. Нутгийн олон их малтай учраас баян Магсар гэдэг байсан. Би зургаан настайгаасаа л өвлийн хүйтэнд хонио хариулдаг байсан юмдаг. Ээж минь надад нэг хонины нэхийгээр дээл хийж өгөхөд яг таарсан гэж сүүлд ярьж байсан. Нэг түүх ярихад урьд манай нутгийг Пүрэв гүний хошуу гэдэг байж. Нэг удаа Пүрэв ноён нүүж нутгийн бөхчүүд, бяр тэнхээтэй залуус тусалж гэнэ. Гэтэл буух газар нь их том чулуу байсан бөгөөд нөгөө хүчтэнүүд өргөж дийлэхгүй байж л дээ. Тиймд Пүрэв ноён “Энэ чулууг өргөсөн хүнд байдас өгнө” гэж л дээ. Харин тэр чулууг аав минь “Ямар ч хүнд зүйлийг хөлөндөө хүчээ тааруулж өргөдөг юм” гээд ганцхан өргөөд холдуулчихсан гэдэг. Аав минь бага залуу учир Пүрэв ноён байдас ч өгсөнгүй, харин таван литрийн гуулин данхаар дүүрэн мөсөн чихрээр шагнасан юм гэнэ лээ. Би 1958 онд нийгэмлэгүүдийн аварга шалгаруулах тэмцээнд ороод түрүүлсэн юм. Тэр тэмцээнийг аав минь үзчихээд “Би залуудаа өргөчих л байсан юм байна” гэж билээ.

    -Хүчний гурван төрлөөр хичээллэдэг таны үеийн тамирчин хэр их байдаг бол?

    -Миний үеийн болоод надаас ахмад тамирчин байдаггүй. Харин надаас хэд дүү тамирчид бий. Олон улсын чанартай тэмцээн уралдаанд явахад хүмүүс “Ийм насны хүн ингэж амжилт үзүүлнэ гэж байдаг юм байх даа” гээд их гайхаж, бас зургаа даруулахыг хүсдэг. Зарим хүмүүс “Манай аав, ээж танаас дүү мөртлөө явж чаддаггүй” гэхийг их л сонсож байсан. 2011 онд тэмцээнд оролцоод жингээ үзүүлж байх үед хоёр шүүгч нь “Энэ хүнийг 70 хүрсэн гэхэд үнэмшмээргүй” юм гэж байсан. Би энэ бяр чадалтай, эрүүл чийрэг байдлыг монгол хүний гентэй л холбоотой гэж боддог. Тиймээс өөрийнхөө хэмжээнд монгол хүний генийг дэлхийд таниулж байгаа гэж ойлгож байна. Намайг тэмцээнд явах тухай УБТЗ-ын нэгдүгээр орлогч А.В.Ушаков сонсоод л надад туслахаар болж “Монголын спортыг дэлхийд сурталчлахад хоёулаа хувь нэмрээ оруулах болно“ гэсэн юм. Тиймээс цаашид амжилт үзүүлэхийн тулд хариуцлагатай байж бэлтгэлээ таслахгүй, тууштай байхыг хичээж байна.

    -Та ямар албан тушаал хашиж байсан бэ. Ажлынхаа хажуугаар бэлтгэл сургуулилтаа хэрхэн зохицуулдаг байв?

    -Би төмөр замын инженер мэргэжлээр Москвад сургууль төгссөн. Төмөр замын удирдах газар 20-иод жил ажиллаад одоо гавьяаны амралтандаа амарч байгаа. Тэгсэн ч зүгээр сууж чадахгүй спортоороо хичээллэсээр л байна. Мөн ажлын хамт олон минь олон улсын тэмцээн уралдаанд явахад минь их тусалдаг. Саяхан Төмөр замын гадаад харилцааны гадаад алба байгуулагдсаны 50 жилийн ой болсон. Би гадаад харилцааны албанд ажиллаж байх үедээ Москва-Улаанбаатар, Москва-Бээжингийн суудлын галт тэрэгний бэлтгэлийг хангаж явуулж байсан. Энэ бол миний хөдөлмөр, санаачилга, бүтээсэн том зүйлийн минь нэг юм. Тэр үед хүндийн өргөлтийн шигшээ багийн тамирчин байсан учраас Спортын төв ордон дээр бэлтгэлээ хийдэг байлаа. Бас томилолтоор явах үедээ Сэлэнгэ аймгийн Сүхбаатарт мөн Чойрын арван жилийн сургуулиудад очиж штанг дээр нь бэлтгэлээ хийдэг байсан. Харин Сайншандад очвол орос цэргийн ангийн штанг дээр бэлтгэл хийн аль болох тасалдаггүй байлаа. Одоо “Алагтай цэцэн” клубт бэлтгэлээ базааж байгаа.

    -Танд бэлтгэл сургуулилт хийхэд хүндрэлтэй зүйл байдаг уу?

    -Би орос телевиз, сонин сэтгүүлд гарсан эрүүл мэндэд тустай, амжилт үзүүлэхэд хэрэг болохуйц бүхий л зөвлөгөөг уншиж, судалдаг. Зөв хооллож биеийн хүч тэнхээ сайжруулах эм бэлдмэл тогтмол хэрэглэж мөн бэлтгэл сургуулилт тогтмол хийдэг болохоор даралт ихэснэ гэсэн зүйл байдаггүй. Харин хүчний спорт учраас өвдөгний гэмтэл авах тохиолдол байдаг.

    -Манай хүндийн өргөлтийн тамирчдын амжилт сүүлийн жилүүдэд нэмэгдэж байна. Энэ талаар таны бодол?

    -Манай хүндийн өргөлтийн тамирчид сүүлийн жилүүдэд амжилттай байна. Удахгүй олимп болох гэж байна. Ази тивийн аварга болсон М.Анхцэцэг маань их юм дуулгана гэдэгт итгэлтэй байгаа. Би медаль авах бүртээ урам аваад илүү хичээгээсэй гэсэндээ залуучууддаа очиж үзүүлдэг юм. Энэ бол миний хариуцлага гэж боддог. Мөн Монголын пауэрлифтингийн “Алагтай цэцэн” клуб олон улсын хэд хэдэн холбоодтой харилцаа холбоо тогтоож, энэ спортыг хөгжүүлэхэд их хувь нэмэр оруулж, тамирчдын амжилт ч сайжирч байна. Манай тамирчид олон улсын чанартай тэмцээнд явахад алтан медальгүй буцаж ирдэггүй.

    О.Ариунцэцэг (Өдрийн сонин 2016/8/2)


  • Интернэт маркетинг онлайн нэвтрүүлэг (2011 он)

    Цахим нийгмийн харилцааны соёлыг төлөвшүүлэх мөн бизнес эрхлэгчидэд шинэ үеийн маркетингийн арга туршлагын талаар мэдлэг олгох зорилгоор “Интернэт маркетинг” нэвтрүүлгийг санаачлан бүтээсэн.

    Сэдэв

    1. Интернэт маркетинг ба цахим хуудас
    2. Олон нийтийн сүлжээ
    3. Блог маркетинг
    4. Агуулгын маркетинг
    5. Facebook маркетинг
    6. Сошл медиа маркетинг
    7. Хайлтын системийн маркетинг
    8. Твиттер маркетинг
    9. Youtube маркетинг
    10. Цахим шуудангийн маркетинг
    11. Дижитал ПиАр
    12. Интернэт маркетинг ба номын сангийн үйлчилгээ
    13. Event маркетинг
    14. Хэрэглэгчид чиглэсэн цахим хуудас
    15. Хэрэглэгч төвтэй цахим хуудасны дизайн
    16. Цахим хуудасны шинэ технологи

  • Монголын Төмөр Зам, Замын 3-р анги | Төмөр зам дагуу соёлын үрийг тарьлаа 2011

    МТЗ-ын Замын 3-р ангийн Хөдөлмөр хамгааллын инженер Л.Дэжидмаагийн саналын дагуу тус ангийн ажилтнуудад зориулсан “Хувь хүний амжилт ба ажлын бүтээмж” сэдэвт лекц зохион байгуулахаар өчигдөр орой Говьсүмбэр аймгийн Чойр өртөөнд ирлээ. Замын 3-р ангийн инженер, мастеруудад өнгөрсөн жил сургалт зохион байгуулж байсан бөгөөд тэр үеэс холбоотой ажиллаж байгаа билээ. Инженер Л.Дэжидмаа, ахлах инженер Р.Сүхбаатар нар нь “Яруу сэтгэгч” сонины уншигчид бөгөөд анх сониноос улбаалан бидэнтэй танилцаж байсан.

    22:00 цаг өнгөрөөгөөд Чойрт ирж, албаны хүнээр тосуулан ажилчдын амрах байранд байрлалаа

    Өнөө өглөө 9:00 цагт 69 машинтай хөдөлж, замын хэсгүүд төвлөрсөн эхний газраа ирж лекцээ уншлаа. Ажилчид их сонирхож сонсож байсан бөгөөд хувь хүний хөгжлийн мэдээллээр маш их дутагдаж байдаг нь тодорхой харагдаж байв. Зам ангийн ажилчид нь төмөр замын эвдрэл, гэмтлийг бүрэн хариуцаж, шалгаж, засварлаж ажиллах үүрэгтэй ажээ. Инженерийн хэлж байгаагаар хөгжингүй орнуудын зам засвар нь бүрэн механикжиж, нэг машинаар л бараг бүх засварыг шийддэг болоод байгаа бол Монголын хувьд бараг 100% гар ажиллагаагаар гүйцэтгэж байгаа нь учир дутагдалтай санагдлаа. Ер нь МТЗ нь Оросоос шууд шахдаг хуучин технолги, зүтгүүр зэргээс шалтгаалан технологийн хувьд маш хоцронгуй явж байгаа юм байна. Харин одоо монгол захиралтай болсноос хойш шинэчлэлийн хүрээнд зарим ажлуудыг хийж байгаа тухай инженерээс сонслоо.

    Тэндээс буцаж Зам анги дээрээ ирэхэд замын мастер нь зам ангийн үйл ажиллагааг танилцууллаа. Зам анги нь төмөр замын засвар, үйлчилгээ хариуцдаг гэдэг утгаараа зам дагуу хэсгүүдэд хуваагдаж ажилладаг юм байна. Нэг хэсэг нь 26 км замын аюулгүй байдлыг бүрэн хариуцдаг ажээ. Танилцаад явж байхад хүндэт самбар дээр нь өмнөх жил манай сугалтанд сууж байсан мастер ах Шилдэг мастер болсон байхыг хараад дотроо баярлаж л явлаа. Мөн гражийн хананд хэд хэдэн уран зураг өлгөөтөй байсан нь маш сонирхолтой харагдаж байсан. Сураг сонсвол энэ зам ангийг байгуулагдахад 2 зураач ажиллаж байсан бөгөөд тэдний бүтээл гэж хэлж байсан.

    Хоолоо идчихээд дараагийн хэсэг ажилчидад лекцээ уншлаа. Миний уншиж байсан лекцүүдээс энэ лекц нэлээдгүй халуухан лекц болсон бөгөөд заалны уур амьсгалтай уялдан сэдвээсээ хальж тусгаар тогтнол, үндэсний аюулгүй байдал, Монгол хүний үнэ цэнэ сэдвүүдрүү нилээд хазайлаа.

    Ер нь галт тэрэгэнд таарсан ах нар, энд таарсан инженер, тогооч эгч нартай ярилцаж байхад, Монгол хүний хөгжлийн асуудалд бүгд л санаа зовж байгаа нь илт байсан бөгөөд Монгол хүнд итгэл найдвар, урам зориг, хийж бүтээх сэдэл тэмүүллийг өгч, хувь хүний амьдралдаа хандах сэтгэлгээг дахин шинэ сэтгэлгээнд авчирах ёстой гэсэн санааг бүгд цухалжуулж байв. Л.Дэжидмаа инженерийн хувьд маш дэвшилтэт үзэлтэй хүн гэдэг нь ажиглагдсан. Тэрээр, “Би ажилчидаа тогтмол хөгжүүлж, цэнэглэж байхыг хичээдэг бөгөөд 300000-р сургалт авъя гэхэд дарга нар нь мөнгөө харамладаг. Тэгэхэд нь бид 300000 төлөөд 300 ажилтанаа цэнэглэж, ажилчидаараа 300000000-г бүтээлгэх ёстой гэж дарга нартаа хэлдэг. Мөн энэ төсвийн байгууллагууд бүгд албан ёсоор ажилчидынхаа толгойд юм хийж, сургаж хөгжүүлэхэд мөнгөө зориулах хэрэгтэй” гэсэн санаануудыг хэлж байсан.

    Чойр суурин нь чимээ аниргүй, хүн хөдөлгөөн багатай тосгонтой төстэй. Хөдөө явалгүй олон жил болсон миний хувьд анир чимээгүй, тайван, сонирхолтой л байна. Маргааш өглөө төмөр дагуу Айраг суманд байрлах замийн хэсгүүдрүү соёлын үрийг тарихаар явна даа. Яг одоо Чойр суурин дахь инжерийн албан өрөөнөөс блогоо бичиж байна.

    2011.4.16 өдөр 21:21 цаг
    Говь сүмбэр аймаг, Сүмбэр сум, Чойр өртөө

    Өглөө 10:00 цагт Чойроос хөдлөөд Шарын голоор дайраад Дорноговь аймгийн Айраг суманд ирлээ. Замдаа инженерүүдийн эхлүүлсэн “Шашин, итгэл үнэмшил, хуурамч лам нар, бөө, хятадууд ухаад дууслаа” гэх мэт сэдэвт яриаг сонсож, мөн Замын 3-р анги нь 312 км урт төмөр замын засвар үйлчилгээг хариуцан ажилладаг 320 гаруй ажилтан ажиллагсадтай хамт олон зэрэг мэдээллийг авлаа. Шарын голын ойролцоо МАК-ийн байгуулж байгаа коксжсон нүүрсний үйлдвэр баригдаж байгаа нь харагдаж байсан. Хуучин технологитой үйлдвэрүүдээс татгалзаж ийм өндөр технологитой үйлвэрүүдийг байгуулах нь зөв байгаа юм даа. Ингээд Айраг суманд байрлах замын 3-р ангийн ажилчидад лекцээ уншлаа. Хүмүүс лекцийг маш их сонирхож хүлээж авсан бөгөөд 2 цаг уншчихаад байхад л хэн ч гарч явахгүй байсан. Тэгээд “Мандухай хатан ээжүүд” аянг хүмүүст хүргэж Гэр бүлийн боловсролын лекцийг сонсгоход мөн л хүмүүс тэвчээртэйгээр сонсож байсан. 

    Айраг сумыг тойроод маш их жоншны ордтой бөгөөд энэ сумын ихэнхи иргэд нь жонш ухаж амьдрал ахуйгаа залгуулдаг тухай иргэд ярьж байсан. Замд жоншны хятад үйлдвэр нэг харагдаж байсан.

    Мөн энэ суманд улсын нөөцийн газар /бензин, түлш/ байрладаг юм байна. 

    Одоо эндээс 23:20 цагийн галт тэрэгт суугаад Хотын зүг хөдөлнө.

    Дорноговь аймаг Айраг сум замын 3-р ангийн замын мастер З.Чинбат ахын гэрээс блогоо бичиж байна. Сая Чинбат ахад блогын тухай нилээн тайлбарлаж өгч блог нээж өглөө. Интернэтийн ухааныг олох гэж нилээн хичээж байгаа ах байна. Сайшаалтай.