Мэдээлэл, холбооны технологийн салбар шинэ тутам хөгжиж хувь хүн, байгууллага, төр засаг болоод нийгэм, бизнесийн бүхий л салбарт хүчтэй нэвтэрч, хурдацтай хөгжихийн хэрээр тэдгээрийн нэгдэлт маш хүчтэй өрнөж байна. Интернэт хэрэглээ нэмэгдэх тусам бизнесийн байгууллагуудад өрсөлдөх давуу талыг бий болгосоор байна. Байгууллага интернэтээр дамжуулан хэрэглэгчидтэйгээ харилцаж, тэдэнтэй илүү ойр байж санаа бодлыг нь үргэлж сонсон улмаар цаашдын үйл ажиллагаандаа тусгаж ажиллах нь тэдний бизнесийн үнэ цэнийг илүү нэмэгдүүлж байна. Тиймээс бизнесийн байгууллагууд үйл ажиллагаандаа интернэтийн технологийг нэвтрүүлж, интернэтээр дамжуулан хэрэглэгчидтэйгээ харилцах, үйлчлэх үйл ажиллагааг харьцангуй ихээр нэвтрүүлж байна. Хэрэглэгчийн тухай мэдээллийн сан үүсгэж хэрэглэгчийн хүсэл сонирхол дээр үндэслэн түргэн шуурхай харилцаж, мөн мэдээлэлд дүн шинжилгээ хийж цаашдын стратегидаа ашиглах зориулалттай интернэтэд суурилсан цогц системийг CRM гэнэ.

CRM юу хийж чадах вэ?
Байгууллагын оршин тогтнох, бизнесийн амжилтанд хүрэх гол нөхцөл бол харилцагч, хэрэглэгч. Загас усгүй бол амьдрахгүйтэй адилаар бизнес хэрэглэгчгүй бол амьдрахгүй. Хэрэглэгчдэд чанартай бүтээгдэхүүн үйлчилгээ нийлүүлэх, бизнесийн хэвийн үйл ажиллагаа явуулахад танай түнш, харилцагч байгууллагууд ч асар чухал үүрэгтэй. Хэрэглэгчид, харилцагчид гэдэг бол санхүүгийн тайлан баланст мөнгөн дүнгээр тусгагддаггүй хэдий боловч байгууллагын хамгийн чухал хөрөнгө, баялаг байдаг. Тэгвэл та өнөөдөр энэхүү чухал хөрөнгөө хэрхэн удирдаж, хөтөлж байгаа вэ? Таны бизнесийг хөгжүүлэн түргэтгэх, өргөжүүлэн тэлэх тэр боломжийг та ашиглаж чадаж байна уу? Та өөрийнхөө байгууллага, компанийн имиж, нэр хүндийг өргөхийг хүсэж байна уу? Та өөрийнхөө бүх харилцагч, хэрэглэгчийг таних уу? Тэгвэл CRM нь байгууллагын бүх хэрэглэгч, харилцагчийн талаарх мэдээлэл бүхий цогц мэдээллийн сан үүсгэх бөгөөд бүтээгдэхүүн үйлчилгээ, борлуулалт, худалдан авалтын талаарх гэрээ хэлцлүүд, төлбөр тооцоо, авлага өглөгийн, харилцагчаас ирсэн санал гомдол, уулзалт зөвлөгөөний талаарх дэлгэрэнгүй бүртгэлийг хөтлөх болно.

Энэхүү цогц мэдээллийн сан дээр үндэслэн удирдлагын, маркетингийн, борлуулалтын, үйлчилгээний, хэрэглээний талаар анализ шинжилгээ хийж, ирээдүйн төсөв төлөвлөлтийн төлөвлөгөө гаргана. Гэрээний нөхцөлүүдийг автоматаар хянаж, шаардлагатай үед сануулга өгнө. Борлуулалт, үйлчилгээний албадын үйл ажиллагааг уялдуулна. Харилцагчдыг ашиг сонирхол, үйл ажиллагааны салбар, чиглэлээр нь бүлэглэнэ. Бүлгүүдэд зориулсан бүтээгдэхүүн үйлчилгээг санал болгоно. Харилцагчдын эрэлт хэрэгцээг судална, харилцагчдын хооронд бизнесийн гүүр болж харилцан бизнесийг хөгжүүлнэ гээд дурдаад байвал маш олон боломжийг бий болгоно.

Давуу тал

1. Үйлчлүүлэгчийн талаар судалгааны өгөгдөл
Програм хангамж нь олон талаар бизнес эрхлэх арга барилыг өөрчилж байна. Хэрвээ зөв л ашиглах юм бол энэ нь үйлчилгээний байгууллагуудад харилцагчдынхаа талаар илүү ихийг мэдэхэд туслах маш чухал, зардал багатай хэрэгсэл болох юм. Өнөөгийн зах зээл дэх үйлчлүүлэгчид илүү их мэдээлэлтэй, илүү идэвхтэй, илүү ихийг хүсч, шаарддаг болсон үйлчлүүлэгчид үзүүлэх үйлчилгээ, үйл ажиллагаанд эргэлт гарч, компаниуд нойрноосоо сэрж, үйлчлүүлэгчдээ алдахгүй байхын тулд илүү их зүйл хийх ёстойгоо ухаарч байна. Өрсөлдөөн нэмэгдэж байгаатай зэрэгцээд програм хангамж ч урьдынхаасаа илүү олон боломж, хэрэглэгчийн хүсэл шаардлагад нийцэхүйц хэмжээнд хөгжсөөр байна.

Мэдээж зарим үйлчлүүлэгчид танай үйлчилгээ таалагдаагүй бол танд хэлж, цаашид алдаагаа залруулах боломж олгодог. Гэтэл ихэнх сэтгэл дундуур үлдсэн үйлчлүүлэгчид танд хэлэхээсээ илүү бусдад хэлж, та өөрөө ч мэдэлгүй бусад үйлчлүүлэгчдээ алдахад хүрдэг. Хэрэв танай байгууллага үйлчлүүлэгчдээсээ санал гомдлыг нь авдаг стратегигүй, зөвхөн сайн дураараа хэлсэн зарим нэгэн тайлбарт л найддаг бол энэ арга барилаа өөрчлөх  цаг болжээ. Иймээс харилцагч, үйлчлүүлэгчдийнхээ юу хүсч буйг мэдэх шаардлага улам бүр нэмэгдэж байна. Ажилтнууд тань үйлчлүүлэгчидтэй өдөр бүр харилцаж байдаг, иймд магадгүй та тэдний талаар бүгдийг мэддэг гэж бодож байгаа биз. Гэтэл та яг үнэн хэрэгтээ үйлчлүүлэгч тань чухам юу гэж боддог, танаас юу хүсч байгааг мэдэх үү? Хэрэв мэдэхгүй бол мэддэг болохын тулд яах ёстой вэ? Хамгийн шилдэг арга зам бол амжилтаа ахиулахын тулд харилцагчдаас ирсэн санал гомдлыг үйл ажиллагаандаа бодитоор тусгах явдал.

2. Харилцааны бүхий л сувгийн ашиглалт 
Урд нь зөвхөн телефон утас, цахим шуудан болон биечлэн уулзах зэргээр хязгаарлагдмал хүрээнд харилцдаг байсан бол өдгөө цахим технологийн ололт амжилтын ачаар өөрийн компаний цахим хуудсанд хэрэглэгчийг бүртгэх, сурталчилгааны баннер, форум, эсвэл нэгдсэн цахим чат зэрэг харилцааны олон төрлийн идэвхитэй сувгийг харилцаандаа ашиглаж болдог болсон.

3. Хэрэглэгчид чиглэсэн стратеги
Үйлчлүүлэгчдийн талаар цугларсан мэдээлэлд тулгуурлан байнгын дүн шинжилгээ хийх боломж. Ингэснээр компаний үйл ажиллагаанд хэрхэн ач холбогдол өгч байгаагаар нь үйлчлүүлэгчдийг хэсэгчлэх, тэдгээрт тохирсон маркетингийн оновчтой стратегийг боловсруулах зэрэг давуу талуудтай. Одоо CRM-гүй бизнесийг цусгүй хүнтэй зүйрлэж байна. Цусгүй, цусаа соруулчихсан хүн хэр удах вэ дээ. Үнэхээр өнөөдөр CRM – технологи бизнесийнхний нэр төрийн баталгаа болоод байна. Хөгжингүй улс орнуудад бол CRM технологи ашиглаагүй худалдаа, бизнесийн чиглэлийн байгууллага бараг л байхгүй гэж хэлж болохоор болжээ. Хэрэв байх юм бол маш их ичдэг бололтой юм. Энэ жишгээр бол манай монголын ихэнх компаниуд хангалтгүй үнэлгээ авна.

4. Үйлчилгээний ажилтаныг дүгнэх
Хаанаас ч, ямар ч цаг үед хандсан үйлчлүүлэгчдийн өмнөх болон сүүлчийн хандалтын бүх мэдээллийг хадгалах мэдээллийн нэгдсэн бааз. Тухайлбал үйлчлүүлэгчийн асуусан асуулт, бүтээгдэхүүн үйлчилгээний талаарх санал гомдол, мөн тэдэнд үйлчилгээний ажилтны хэрхэн хариулт өгсөн байдлыг хянах.

5. Шинэ хэрэглэгчийг нэмэгдүүлэх
Тухайн компанийн бүтээгдэхүүн болон үйлчилгээг сонирхож цахим хуудаст бүртгүүлсэн буюу мэдээлэл хүлээн авахыг зөвшөөрсөн хэрэглэгчдэд тогтмол мэдээлэл хүргэж, эргэлзээг нь ойлголтоор солих замаар шинэ хэрэглэгчийн тоог нэмэгпүүлнэ.

6. Худалдааны санал
Шууд аргаар худалдан авахыг санал болгох үед хэрэглэж болно. Каталогио явуулах юм уу, шинэ барааны танилцуулга, урамшуулалт худалдаа, хямдралын танилцуулга зэргийг явуулснаар хэрэглэгчийг худалдаа хийх боломжийг олгож болно. Мөн хэрэглэгчийн судлагаанд тулгуурлан cross-selling, up-selling зэргийг үр дүнтэйгээр дэлгэрүүлэх суурь ч болж болох юм.

CRM-ийн дараагийн хөгжил бол Social CRM юм. SCRM нь онлайн орчины хэрэглэгчидтэй харилцаж, удирдах боломжийг бий болгодог. Манай хамт SCRM агуулсан шийдлийг бүтээхээр ажиллаж байна.

МАРКЕТИНГ, БОРЛУУЛАЛТ,
ХЭРЭГЛЭГЧТЭЙ ХАРИЛЦАХ
ҮЙЛ АЖИЛЛАГААГАА УДИРДАХ
ЦОГЦ ПЛАТФОРМ https://erxes.mn/

Таны бизнест амжилт хүсье.

Жамсранжавын Лувсандорж

Бизнесийн соёл төлөвшөөгүй, ажилтанаа тогтмол хөгжүүлэх тогтолцоог бүрдүүлээгүй, үйлчилгээний философио ойлгоогүй үйлчилгээнүүд хаа сайгүй. Хэрэглэгчээ дарамталдаг, эсвэл айлгасан. Гомдол гаргавал манайхыг доромжиллоо гэж хэлдэг. Ажилтан нь ч тэр, дарга нар нь хэрэглэгчээсээ уучлалт гуйхын оронд хэрэглэгчээ хий хоосон хардаж, чи хаанахын захиалгаар гомдол гаргав ч гэх шиг дайрч давшилж харилцдаг байдал хаа сайгүй байсаар байна. Хамгийн инээдтэй нь хэрэглэгчээ хэн ч биш мэт харж, өөрсдөд нь гомдол ч гаргах ёсгүй, өөрсдийгөө бурхан мэт бодчихдог байгууллага ч байна. Байгууллага бол бурхан хэрэглэгч бол загнуулж, зүхүүлж, доромжлуулж байх ёстой хэн ч биш амьтан мэтээр хандаж байгаа байгууллага олон байгаа нь харамсалтай. Тухайн байгууллагын дарга нь ширээний ард суугаад л хэн ч үг хэлэх ёсгүй, хэнтэй ч юу ч ярих ёсгүй хад чулуу, хаан заан мэт нэг хүн, өөрийгөө ийм байх ёстой гэдэгтээ итгэчихсэн гар. Хэрэглэгчидтэйгээ уулзаад, уучлал гуйгаад аятайхан харилцчихаж чадахгүй, хөөрхийс…

Хэрэглэгчидтэй харилцдаг болхи бүдүүлэг, хүй нэгдлийн үеийн арга барилаа одоо гээвэл таарна. Баахан мод устгаж, байшингийн хана заваартуулж цаас наагаад, хүний дургүй хүргэсэн баахан реклам цацаж дур, мөнгө хоёрыг үрнэ. Тэгээд үйлчлүүлэх гээд очихоор баахан хэлгүй хүүхэлдэйнүүд, олигтой нэг үг дуугарчихгүй, дуугарч ядаад, юм асуухаар загнаад, гомдол гаргавал бараг шууд доромжилно, хандлагаараа айлгаж, харцаараа зодно. Энд ямар нэгэн үйлчилгээний соёл, арга технологи гэж байна уу, хэ хэ. 

Хэрэглэгчидтэй харилцах арга барил улам бүр нарийсаад шинэ технологиуд нэвтэрч, хэрэглэгч анх босго давж мэндэлснээс эхлээд санал, гомдол, санаа оноо, үүх түүх, хэлсэн үг, гаргасан араншин бүрийг нь бүртгэж хадгалсан мэдээлэлдээ үндэслэн тухайн хэрэглэгчийн сэтгэл ханамжийг өндөр байлгах тактикаа боловсруулдаг болоод байхад, бид хэрэглэгчээ санамсаргүй зөрж өнгөрсөн зочин мэт харсаар. Тэр ч байтугай дэлгүүрт нэг хэрэглэгч санал гаргахад, яг тэр мөчид нь тухайн хүсэлтийн дагуу үйлдвэрлэж дэлгүүрээс гарахаас нь өмнө хүссэн бүтээгдэхүүнийг нь авчирч өгдөг тийм хурдтай ажиллаж байгаа үйлдвэр ч байна. 

Харин бидний бодит байдал:

Жишээ 1: Номхоон, зэрэгц
Ажлын ойролцоо “Үндэсний бууз” гэдэг нэг газар байна. Ойролцоо болохоор гүйгээд орчихно. Өнөөдөр ороод, хоолоо бичүүлэх гээд зогсож байсан. Тэгсэн касс нь – Ёо, ёо , би 4 гаргүй ш дээ, байж байгаач дээ (Уг нь би хурдал гэж хэлээгүй). Тэгээд сайн санааны үүднээс, үйлчилгээгээ жаахан ч гэсэн сайжруулаг гэж бодоод, – Та үйлчлүүлэгчиддээ, гаргүй энэ тэр гэж ойлгомгүй юм хэлэхийн оронд, зүгээр л “Уучлаарай, түр хүлээгээрэй” гээд хэлчихэж байгаарай гэж хэллээ. Тэгсэн чинь бүүр загнаж байна. – Мөрөөрөө юмаа идэхгүй, юун олон үгтэйн, за… н .. э..   х..  б ..ю..  о үгтэйн бэ, харцаараа бараг л зодлоо доо…  Сайн санаад хэлсэн үгнээсээ болж загнуулж, хараалгуулсан хүн хоол идэх ямар ч хүсэлгүй болчлоо. Тэнд хүнд дарамтлуулж номхон зогсож байж хоол идэх шаардлага ч надад алга. Тэгээд гарч явахдаа, энд дахиж хэзээ ч орж ирэхгүй гэж өөртөө хэллээ. Би зүгээр л, тайван сайхан хоолоо, уур уцааргүй орчинд, хэн нэгэнд хялалзуулалгүйгээр идчихээд л гараад явмаар байна. 
За энэ ч ингээд өнгөрдөг юм байж. Гэхдээ энэ буузны газрын цаана бас л Монгол хүний амьдрал байгаа. Тиймээс энэ олон “ууртай буузнууд”аа яаж гоё үйлчилгээтэй болгож тэр дэлхийн алдартай гамбирнуудтай өрсөлдүүлий дээ? 
Яаж? яаж?
Үйлчилгээний байгууллагын удирдлагууд ажилчиддаа анхаарал тавьж үйлчилгээний соёл энэ тэр зааж сургамаар юм аа. Тэгвэл нэг ч гэсэн үйлчлүүлэгчээ алдахгүй шүү дээ. Аль аль талдаа бодмоор юм их байна.

Жишээ 2: Өөр үнэтэй талх
Нэг дэлгүүр талхныхаа үнийг буруу бичихээд, 50 төгрөгөнд юун сүртэй юм бэ? гээд бухимдаад байсан. Тэд нар нэг талхны мөнгө 600 төгрөг алдаж байна л гэж бодож байгаа байх. Гэхдээ, тэр талхыг насан туршдаа худалдаж авах нэг худалдан авагчийг алдаж байгаагаа мэдэхгүй байгаа нь, бодохгүй байгаа нь даан ч харамсалтай. Тэр дэлгүүгээр дахин орж, хүмүүсд загнуулмааргүй байна. Хүмүүсийн хялалзаж, зэхэлзсэн гараас талх авмааргүй байна. 
Зүгээр л хэнийг уурлуулахгүй, хэнд ч уурлахгүй, уурлах ямар нэгэн шалтгаан байхгүй, сайхан талхаа аваад л, тайван сайхан амьдармаар байна. Хуурамч, хөндий, хоосон бөхөлзөж нахилзахыг биш, зүгээр л намайг хүндэтгэж харилцаасай гэж хүсэж байна. Би зөвхөн ТАЛХ БИШ, талхтайгаа хамт СЭТГЭЛ ХАНАМЖ худалдаж авмаар байна. Сэтгэл ханамжийг өгч чадвал, талхных нь үнэнээс 3 дахин илүү үнэ төлөхөд ч бэлэн байна. 50 төгрөгнөөс болж нервтэж амьдралынхаа үнэ цэнэтэй хором мөчийг уурлаж бухимдаж өргөрөөмөөргүй байна.

Жишээ 3: Тасалбарын цаг солиулах гээд загнуулав
Өргөө кино театрт 19:10 цагийн үед. Тасалбар түгээгч нь надаас цаг асуугаагүй, 19.20 юм байна гэж бодоод биччихэж, Цагийг нь лавлан харсан чинь 19:20 гэсэн байлаа. 21.40-р солиулах гэсэн тасалбар түгээгч нь уурлаад, билет гарнаас шүүрээд л, би өрөнд орохоор болчлоо, цагийг чинь асууж бичүүлээ биз дээ гэх мэт тасалбараасаа хэтэрсэн олон үг хэлж загнаж дайрч байна. Үргэлжлэлийг

Санал: Монголын нэг ч гэсэн үйлчилгээний байгууллага хэрэглэгчидтэй зөв сайхан харилцаж, үйлчилгээний чанараа сайжруулаасай, үйлчилгээний чанар гэдэг бол хананд өлгөсөн өргөмжлөл, шар бичигтэй цэнхэр тууз биш гэдгийг ойлгоосой, ажилтаныхаа хөгжилд анхаарал хандуулаасай, ажилтан бол байгууллагын гол баялаг гэдгийг ойлгоосой, хэрэглэгч бол дайраад өнгөрдөг зочин биш байгууллагын оршин тогтнох үндэс гэдгийг ухаараасай, хэрэглэгчтэй харилцдаг шинэ дэвшилтэт арга технологиудыг ашиглаасай гэдэг үүднээс энэ саналыг бичлээ. Бид жинхэнэ үйлчилгээг хүсэж байна… Үйлчлүүлэгчээ хайрлаж, хүндэтгэж, хүн гэж харилцдаг байгууллага МАШ ОЛОН БОЛТУГАЙ.

Ж.Лувсандорж

Бизнес буюу хүний хэрэгцээг ухаалагаар хангах урлаг нь улам бүр боловсронгуй болж хөгжсөөр. Хэн нөөцийг зөв удирдаж, чиглүүлж чадсан нь баялагийг эзэмшидэг. Дундад зуунд газрын эзэд хамгийн баян хүмүүс байсан бол 19-р зуун буюу Үйлдвэржилтийн зуунд үйлдвэрийн эзэд баялагийг эзэмшиж байв. Харин 20-р зуунд худалдаа эрхлэгчид нилээдгүй баялагийг эзэмшиж чадсан бол мэдээллийн зуун болох 21-р зуунд мэдлэгт суурилсан бизнесүүд хамгийн их амжилтанд хүрч байна. Капитал нь юу байснаас хамаараад тухайн бизнесийн ажилтан хүний үнэлэмж нь өөр өөр байв. Дундад зууны үед бол ажилтан хүн үхэрнээс илүү үнэлэгддэггүй газар хагалагч амьтан байсан бол 19-р зуунд үйлдвэрийн машинуудын эргэ шурга төдийд үзэж байлаа. 20-р зуун бол ажилтанг нэг тогтсон хэв загвар, дүрэм журмаар хэвлэн цутгаж, “Ташуур, гамбир” хоёроор илжиг мэт зүтгүүлж байв. Энэ философи одоо ч хэвээрээ үргэлжилсээр байна.

Тэгвэл өнөөдөр мэдлэгт суурилсан эдийн засагтай, оюун ухаант хүнд суурилсан цоо шинэ бизнесийн эрин эхлээд байна. Жишээлбэл, Билл Гейтс тооцоолох, мэдээлэл боловсруулалтын үйлдлийн системийг бүтээж байна. Тэр амжилтанд хүрсэн. Google асар хурдтай нэмэгдэж буй мэдээллийн агуулгаас хэрэгтэй мэдээлэлээ хурдан хугацаанд хайж олох хэрэгцээ шаардлага гарч ирнэ гэдгийг мэдсэн. Тэд бас амжилтанд хүрсэн. Fасеbооk хил хязгаар, хэл ус харгалзахгүйгээр танилцаж, мэдээлэл солилцох, хамтран ажиллах боломжийг бий болгосоноор мөн л амжилтанд хүрлээ. Apple хүний оюун ухаан, сэтгэлгээний ур шингэсэн содон шинэ бүтээлүүдээрээ амжилт олж байна. Өнөөдөр толгой эргэм амжилтаараа залуу тэрбумтанууд дэлхийд цахиур хагалж уламжлалт бизнесийн аргаар 30- 40 жилд бий болгох баялагийг 3- 4 жилд бий болгож чадаж байна. Үйлдвэрлэлийн технологи улам бүр нарийсаж хүний оюун ухаанаар бүтсэн хүчирхэг технологиуд хүний хөдөлмөрийг хөнгөвчилснөөр “ХҮН”-д сэтгэх ажлыг л үлдээж байна. Цөөхөн тооны чадварлаг инженерээр удирдуулсан асар том үйлдвэрүүд, алсын зайн эмчилгээ оношилгоо, хил хязгаараас үл хамаарах хамтын ажиллагаа, хэл, үндэстэн ялгахгүй нэг харилцаа, өндөр технологид суурилсан бизнесүүд, нанотехнологи, биотехнологи, хэт өндөр чанартай бүтээгдэхүүний үйлдвэрлэл нь ойрын ирээдүйн хөгжлийн дүр зураг юм.

Хүн төрөлхтний амьдрал, оюун санааны хөгжил цоо шинэ шатанд дэвшиж хүн бүр илүү оюунлаг, амар амгалан амьдралыг хүсэн мөрөөдөж, хүн өөрийн амьдралын утга учир, авъяас чадварыг танин мэдэх их эрэлд гараад байна. Хүний хөгжил, өөрийгөө танин мэдэх номнууд дэлхийн хамгийн их борлуулалттай номнууд болж байгаа нь үүнтэй холбоотой. Хүн бүрт тэгш мэдээлэлжих боломж бүрдсэнээр хүн илүү их  хүсэл тэмүүлэлтэй болж, өнөө маргаашаа бодож амьдрах уйтгарт хэв маягаас улам бүр татгалзах хандлага бий болоод байна. Тэгвэл сэтгэлгээний хувьд хөгжиж буй, хөгжөөгүй ч гэсэн мэдээлэлжсэн ажилтануудыг тогтоон барьж удирдах асуудал нь бизнесийн байгууллагуудыг цоо шинэ философийг эрэлхийлэхэд хүргэлээ. Энэ цаг үед хүнийг “Ташуур Гамбир”-ын аргаар хамгийн сайн ажиллуулж, зөвхөн цалин урамшууллаар тогтоон бариж чадахгүй болоод байна. Ихэнхи бизнесийн байгууллагууд ашиг орлогоо нэгдүгээрт тавьж хүнийг больж, сольж болдог хэрэгсэл мэтээр хандаж байна.

Тэгвэл өнөөдөр “ХҮН ӨӨРӨӨ БАЯЛАГ” гэдгийг шинэ зууны бизнесийн байгууллагууд ухаарах цаг болжээ. Хүнээ жинхэнэ утгаар нь баялаг болгож чадсан компаниуд амжилтын оргилд хүрч байна.
Хүнээ төв болгоно гэдэг нь ажилтан бүрийн авъяас чадварыг нээн илрүүлж, ажилтан хөгжих таатай орчинг бүрдүүлж, ажилтанаа тогтмол сурган хөгжүүлж, хүсэл тэмүүллээр нь удирдахаас бүх зүйл эхлэж байна.
Та өнөөдөр мөнгө олохын төлөө амьдралаа зориулдаг мөнгөний боол амьтан болох биш, мөнгө бол өөрийнхөө хүсэл мөрөөдөлд, хамгийн сайн хийж чаддаг зүйлээ сэтгэл хангалуунаар хийх явцад таны хүсэл тэмүүллийн шагнал болж ирдэг зүйл гэдгийг ойлгуулахаас эхлэж байна.
Ажилтан бүрээ судалж, тэдгээрийн хүсэл сонирхол, сэтгэл зүй, хувь хүний дахин давтагдашгүй онцлогт тохирсон хөгжүүлэх, сэдэлжүүлэх урт хугацааны хөтөлбөр хэрэгжүүлэх нь шинэ зууны бизнесийн амжилт юм. Хүнийг судалж, тодорхойлж, идэвхижүүж сэдэлжүүлдэг арга технологиуд хүртэл нарийсч бие хүний сэтгэц, үзэл санаа, бие физилогийн нарийвчилсан судалгаанд суурилсан ул суурьтай сэдэлжүүлэх технологиуд нь үр дүнгээ өгсөөр байна.

Танай байгууллагын хөрөнгө, өндөр байшин, гоё компьютерээс илүү ажилтан тань илүү үнэ цэнэтэй баялаг гэдгийг ойлгож, баялагаа хөөж явуулж, үзэн ядаж, хавчиж шахах биш, харин ч судалж, сургаж хөгжүүлж, арчилж дордож, дотор нь байгаа авъяас чадварыг нь нээж, боломж олгож чадвал бүхнийг сайхан болгож чадах шидтэн хажууд чинь сууж байна даа. 
Өчигдөр та ажилтнаа нухчин дарж, ажилтнаасаа мэдлэг, чадвараа харамлаж, ажилтнаа өөртэй чинь өрсөлдөхүйц мэдлэг чадвартай болохоос үхтлээ айдаг байсан бол харин өнөөдөр ажилтнаа илүү их хөгжүүлж, ажилтандаа боломж олгож, өөрөөсөө илүү чадвартай болохыг дэмжиж хамтдаа мөрөөдөлдөө хүрэх цаг ирлээ.

ХҮН – БАЯЛАГ
ХҮН- ТӨВтэй бизнес

Жамсранжавын Лувсандорж

Хэрвээ танай хэрэглэгч сошиал медиа ашигладаг бол танай байгууллагын тухай тэнд ярьж л таарна. Тиймээс байгууллага сошиаль медиаг ашиглах нь хэрэглэгчидтэй харилцах чухал хэрэгсэл болоод байна. Байгууллага сошиал медиаг ашиглахдаа тодорхой журам аргачлалаар ашиглах нь зүйтэй юм. Энэ агуулгыг байгууллагынхаа сошиал журамыг боловсруулж байгаа баг хамт олныг чиглүүлэх үүднээс бэлтгэв.

I. СТРАТЕГИ БОЛОВСРУУЛАЛТ

1. Зорилго: Ямар зорилгоор ашиглах вэ гэдгээ тодорхойлно.
2. Зарчим: Ашиглахдаа ямар зарчмыг баримтлах вэ гэдгээ тодорхойлно. Доорхоос жишээ авч болно.
3. Ил тод байх
4. Шударга байх
5. Байгууллага төлөөлж хариулж байгаа тохиолдолд хувийн сэтгэл хөдлөл, зан араншингаараа хандахгүй байх.
6. Байгууллага болон хувь хүн хоёроо ялгаж салгаж бичих.
7. Сошиал санамж буюу тухайн байгууллага яагаад сошиал медиаг ашигладаг вэ гэдгээ тодорхойлж бичих хэрэгтэй.
8. Жилийн агуулгын төлөвлөгөө буюу нэг жилийн турш ямар агуулга, мэдээллийг хэрэглэгчид хүргэхээ боловсруулж төлөвлө.
9. Хэрэглэгчийн дата бүрдүүлэх: Facebook, Twitter, Google+ зэргээс өөрийн хэрэглэгчдийн акаунтын мэдээллийг цуглуулж, хэрэглэгчээ судлах боломжтой.
10. Коммунити хөгжүүлэх: Зөвхөн компанийн сошиал медиаг хөгжүүлэхээс гадна танай хэрэглэгч болж болохуйц хобби, сонирхолоороо нэгдсэн бүлэгүүдийг үүсгэж хөгжүүл. Эсвэл үүссэн коммуни, сонирхолын бүлэгүүдтэй хамтран ажиллах хэрэгтэй. Жишээ нь кофе шоп бол кофенд дурлагчидын бүтэгтэй хамтран ажиллах гэх мэт.

II. БАЙГУУЛЛАГАДАА НЭВТРҮҮЛЭХ: Байгууллагын ажилчид нь сошиал орчин дахь байгууллагын нүүр царай юм. Тиймээс эхлээд байгууллага дотроо сошиал медиаг нэвтрүүлж, лекц, сургалт зохион байгуулах, зөв соёлтой хэрэглэсэн хүмүүсийг урамшуулах зэрэг хөшүүрэг хэрэглэж болно.

2. Ерөнхий ач холбогдолыг тодорхойлох
1. Байгууллага өөрсдийн медиа сувгийг хөгжүүлж эхэлнэ
2. Байгууллагын соёл, орчиноо таниулах
3. Зардал хэмнэх
4. Хэвлэл мэдээлэлийн хэрэгсэлтэй болно.
5. Харилцаа холбооны хэрэгсэл болгож ашиглах
6. Байгууллагын маркетингийн хэрэгсэл
7. Бодлогоор зарим ажилтануудаа байгууллагынхаа нүүр царай болгож ажиллах
8. Ажлын тайлан болгож ашиглах тохиолдол бий
3. Дотоод ач холбогдолыг тодорхойлох
1. Байгууллагын дотоод сошиал нэтворк харилцааны
2. Сошиаль медиг байгууллагын дотоод уур амьсгалыг удирдахад ашиглах
3. Ажилтанууд дотроо ашиглах зохицуулалт.
4. Нууц үгүүдийг хүлээлцдэг байх.

III. ӨДӨР ТУТМЫН УДИРДЛАГА

1. Хуваарь боловсруулах
2. Мэдээлэл нийтлэх давтамж
3. Шалгах давтамж
4. Холбогдох асуудалд хариулах
5. Цаг зохицуулалт
6. Асуултанд хариу өгөх процесс
7. Тухайн холбогдох асуудлаар холбогдох мэргэжилтнүүдээс нь асууж тодруулна
8. Хэдэн ч хүн удирдаж болно.
9. Хариулах асуултыг чиглэлээр хариуцсан мэргэжилтнүүд хариулж болно.
10. Өдрөөр жижүүрлэх байдлаар удирд
11. Сошиал шалгаж цагийн хуваарь гарга
12. Хариулж мэдэхгүй асуултанд мэддэг хүмүүстэйгээ хамтарч хариулах
13. Автоматжуулж болох зүйлийг автоматжуул

IV. ХЭРЭГЛЭГЧИЙН ОРОЛЦООГ БИЙ БОЛГОХ

1. Хэрэглэгч оролцохуйц кампанит ажил өрнүүл
2. Харилцан яриа үүсгэх
3. Өдөөх асуулт. Хэрэглэгчтэй харилцан яриа үүсгэх өдөөсөн асуултаар эхлэх хэрэгтэй.
4. Хэрэглэгч талархсан сэтгэгдэл үлдээсэн бол?
5. Хэрэглэгчийн зургийг маш сайн ТААГлах хэрэгтэй
6. Яг одоо зарчим
7. Түлхүүр хүмүүс

V. ГОМДОЛ БАРАГДУУЛАХ

1. Мөн хэрэглэгчийн санал гомдолд хариулахдаа тухайн хэрэглэгчийг судлах хэрэгтэй.
2. Хэрэглэгчийг судла
3. Хар ПР, Гүтгэлэгт хэрхэн хандах вэ?
4. Сөрөг асуултанд яах вэ

Жамсранжавын Лувсандорж
Үндэстэн Баг ХХК

1. Ирээдүйтэй бизнес: Бидний бизнес мэдлэгт суурилсан ирээдүйтэй бизнес. Хөгжиж буй шинэ салбар.
2. Хувьцаа эзэмшигч: Бид хамтдаа бол илүү ихийг хийж чадна. Бид нэг нэгэндээ ажилтан, захирал биш хамтран зүтгэгч НЭГ БАГ гэсэн зарчмаар ажилладаг. Нэгнийхээ санаачилсан төсөл, бүтээгдэхүүнийг хамтдаа хөгжүүлж, чадвараа нийлүүлж, группынхээ нөөцийг нэмж, түүнээсээ гишүүд нь хувьцаа авах боломжтой.
3. Монгол хүний үнэ цэн: Бид Монгол залуусыг төлөөлөл болж буй багийн гишүүдээ илүү чадварлаг болгож, монгол хүний үнэ цэнийг өндөрт өргөхийг хичээдэг.
4. Амьдралын түшиг: Миний амьдралын хамгийн сайн сайхан мөчүүдэд бид хамтдаа байсан. Энэ сайхан амьдралыг бүтээн босгоход миний хамт олны нөлөө маш их бий. Бид багийн гишүүдийнхээ хувийн бизнесийг дэмжиж ажилладаг.
5. Нэг мөрөөдөл: Би эндээс олон сайхан мөрөөдлөө олсон. Миний хүсэл мөрөөдөл, миний санал санаачлагыг үргэлж дэмждэг. Бидний мөрөөдөл нэг зам дээр огтлолцдог.
6. Хөгжих тогтолцоо: Бид нэгнээ сонсож, үргэлж шинэчлэгдэн хөгжихийг хичээдэг. Би хамт олноосоо үргэлж суралцаж, сайжирч, хөгжиж байгаагаа мэдэрдэг.
7. Чин сэтгэлийн холбоо: Хүнд хэцүү бүхнийг даван туулж чадах хамгийн дотны хүмүүс дэргэд минь байгаад би баярладаг.
8. Хүн төвтэй бизнес: Бид хүнд хэрэгтэй мэдлэгийг бүтээх, хүнд хэрэгтэй ажил үйлсийг маркетингийн бодлого болгож ажиллахыг зорьдог. Бид хоосон алдар хүнд, ашиг биш үнэ цэн, утга учиртай үйл хэргийг эрэмлэдэг.

Ж.Лувсандорж
CEO
Нью Медиа Маркетинг ХХК 

“Бизнесийн өрсөлдөөн улам бүр хурдтай болж буй энэ цаг үед тогтмол сурч хөгжих тогтолцоог бий болгож чадсан байгууллага л амьд үлдэнэ”

 ==================================================

АГУУЛГА

1. Хөтөлбөрийг боловсруулах
1.а. Зорилго, хэрэгцээ шаардлагаа тодорхойлох
1.b. Нөөцөө тодорхойлох
1.с. Сургалтын байгууллагууд болон сургагч багш нарыг судлах

 2. Хөтөлбөрийг хэрэгжүүлэх
2.а. Сургалтын хэлбэр, аргачлалууд

 3. Хөтөлбөрийг үргэлж шинэчлэх

 ============================================================

 1. ХӨТӨЛБӨРИЙГ БОЛОВСРУУЛАХ

Компанид ажилтанг сурган дадлагажуулж авах үед болон сонгон шалгаруулалтаар авсан цагаас ажилтанг тогтмол хөгжүүлж, чадваржуулж байх Ажилтаны сургалт хөгжлийн хөтөлбөр гэсэн чухал хөтөлбөрт хамрагдаж явах ёстой. Уг хөтөлбөрийг менежментийн баг болон хүний нөөцийн менежер (баг) хамтран боловсруулвал зохистой. Хөтөлбөрийг 1 улиралаас 1 жил хүртлэх хугацаатай, цогц шинж чанартай, системтэйгээр хэрэгжихүйцээр төлөвлөх хэрэгтэй.

Сургалт хөгжлийн хөтөлбөрийг боловсуулахдаа, ажилтаны

1. Хувь хүний хөгжил (Эхлээд ажилтанг ажилтан гэж харахаасаа өмнө хувь хүн шүү гэдэг өнцөгөөс нь харж хөгжүүлвэл оновчтой. Хувийн зохион байгуулалт, дадал зуршил, амьдралын хэв маяг г.м. Монгол хүний нэг онцлог нь хүн шиг хандвал хүн шиг л хандана гэсэн дотоод бодол байдаг)
2. Мэргэжлийн ур чадвар (Мэргэжлийн ажлаа хийж гүйцэтгэхэд дутагдаад байгаа ур чадварууд)
3. Багаар хамтран ажиллах ур чадвар (Бусадтайгаа уялдаж, ойлголцож ажиллах чадварын түвшин)

гэсэн ерөнхий 3 чиглэлийг бодолцож төлөвлөнө.

Хөтөлбөрт

1. Лекц, сургалт
2. Ажилтан хамт олны уулзалт
3. Өглөөний уулзалт буюу 7 хоногт 1 удаа ажилын цагаас өмнө цуглаж мэдлэгээ солилцох, сонирхолтой хүн урьж яриа хийх.
4. Ажилчидын клуб буюу мэдлэг туршлагаа солилцдог өдөрлөг. Дотоод хөгжлийн клубын системийг бий болгосноор хамт олон туршлагаа тогтмол хуваалцан нэгнээсээ суралцаж тогтмол хөгжих тогтолцоо бүрдэнэ.
5. Гэр бүлийн өдөрлөг буюу нийт хамт олныг гэр бүлтэй нь урьж нээлттэй өдөрдөг зохион байгуулах. Гэр бүлд нь ажлынх нь онцлогийг мэдүүлэх зорилготой. (Цагаан сарын үеэр байж болно.)
6. Үнэт зүйлийн өдөр буюу байгууллагынхаа үнэт зүйл, зорилго зорилт, алдаа онооны тухай нийтээр ярилцдаг өдөр.
7. Чин сэтгэлийн зурвас буюу нэг өдөр байгууллагаар шууданч ажиллуулж нэгэндээ зориулсан зурвас, захидалуудыг зөөж үйлчилнэ. Гомдож, тунисан сэтгэлийг тайлж уур амьсгалд эерэгээр нөлөөлдөг.
8. Мэдээллийн цаг буюу байгууллагын ажилтануудад хамгийн их хэрэгтэй байгаа сэдвээр мэдээлэл хийлгэж болдог. Жишээ нь: байрны зээл, даатгал, хэрхэн турах вэ г.м.
9. Урлаг спортын арга хэмжээ, тэмцээн уралдаан
10. Хамт олноороо үзвэр үйлчилгээнд хамрагдах
11. Ажлын чиг үүргээ нэг өдөр солилцож хийж, нэгнийхээ ажлын байрны онцлогыг мэдэж авах.
12. Салбарын байгууллагуудтай өрсөлдөх уралдаан, тэмцээн гэсэн хэлбэрүүдээс оруулах боломжтой.

1.a. Зорилго, хэрэгцээ шаардлагаа тодорхойлох
Хөтөлбөрийн зорилго нь байгууллагын баг хамт олны мэдлэг, ур чадварын нөөцийг илрүүлж ашиглах, шавхагдашгүй баялаг болох хүний бүтээлч сэтгэлгээ, туршлагыг бизнесийг хөгжүүлэхэд, баялаг бүтээхэд оролцуулахад чиглэдэг.  Мөн ажилтануудын сул талыг багасгах, давуу талыг дэмжиж илүү хөгжүүлэхэд чиглэж болно.

Сургалтын хэрэгцээ шаардлагыг Гүйцэтгэлийн үнэлгээнээсээ тодорхойлж гаргаж ирнэ. Гүйцэтгэлийн үнэлгээнээс үр дүн муутай ажиллаж байгаа ажилтаны МУУ АЖИЛЛААД БАЙГАА ШАЛТГААНЫГ тодорхойлно. Мэргэжлийн ур чадвар уу, эсвэл хувийн харилцаа, хандлагаас болов уу, эсвэл удирлагын ур чадвар, баг хамт олны үл ойлголцол, хийх ажлын тодорхой биш байдлаас болов уу гэх мэтээр тодорхойлно. Тодорхойлсоны дагуу төлөвлөлт гаргана.

1. БАЙГУУЛЛАГЫН ДОТООД СУРГАЛТ
   1. Байгууллагын зорилго, үзэл санаа, үнэт зүйл
   2. Дэг, журам, заавар
   1. Дэг: Ажлын дэс дараалал
   2. Журам: Болох, болохгүйн хил заагийг заасан
   3. Заавар: Ажил хийх аргазүй, үйл явцийн заавар
   4. Гэрээ: Эрхийг заана. Хөдөлөмөрийн харилцааг зохицуулна
   5. АБТ: Үүргийг заана
2. МЭРГЭЖЛИЙН УР ЧАДВАР САЙЖРУУЛАХ
3. ХУВЬ ХҮНИЙ ХӨГЖИЛ
4. Байгууллагын соёлын үйл ажиллагаа г.м-р төлөвлөнө.

СУРГАЛТЫН ХЭРЭГЦЭЭ ШААРДЛАГЫГ Ажилтануудын санал асуулгаар тодорхойлж огт болдоггүй. Хэрвээ санал асуулгаар асуувал “Англи хэл сурах, Илтгэх урлаг”  гэх мэт ямар ч уялдаа холбоогүй Мөрөөдлийн жагсаалт болдог тул, ингэж тодорхойлоос татгалз.

1.b. Нөөцөө тодорхойлох
Сургалтын дотоод нөөц буюу компанийн ажилтанууд ямар сэдвээр ямар хугацаанд лекц сургалт орох чадвартайг тодорхойлох хэрэгтэй. “Жор үзсэн ламаас зовлон үзсэн чавганц дээр” гэдэг шиг ажлынхаа тухай А-Я хүртэл мэддэг ажилтан бол хамгийн сайн сургагч болж чаддаг.  Хамгийн үр дүнтэй сайн сургагчид бол дотоод сургагчид байдаг. Тиймээс өөрсдийн дотоод сургагчидыг бодлогоор дэмжиж, чанартай сайн сургалт, зөвлөгөө зохион байгуулах ажиллагааг цалин, урамшууллын системтэй нь холбож өгөх нь зөв. Дотоод сургалт нь мэргэжлийн бус, туршлагаа солилцох хэлбэрээр эхлэдэг боловч яваандаа илүү чанаржин сайжирч хэлбэржин мэргэжлийн сургалттай өрсөлдөхүйц болж хөгждөг.

1.c. Сургалтын байгууллагууд болон сургагч нарыг судлах
Танай байгууллагад хэрэгтэй гэж үзсэн сургалтын байгууллагууд болон сургагч багш нарын жагсаалтыг гаргаж, тухайн байгууллагуудруу хандаж сургалтын дэлгэрэнгүй мэдээлэл болон сургалтын арга барил зэрэг мэдээлэлийг урьдчилан хүлээн авч тэдгээрийн салбартаа мэргэшсэн байдал, туршлага, сургалтын хэлбэр арга барил зэргийг судалж үзнэ. Мөн өөрсдөнд тулгамдаж буй асуудлаа сургагч багш нартаа хэлж, гарах гарцийг нь тогтмол ярилцаж байх хэрэгтэй.

2. ХӨТӨЛБӨРИЙГ ХЭРЭГЖҮҮЛЭХ
Хөтөлбөр нь амжилттай хэрэгжихийн тулд ажилтануудын өдөр тутмын ажил, үүргийн хуваарьтай нягт уялдсан, ажилаа хийхэд нь төвөр учирахааргүй, энгийн шийдсэн байх ёстой. Сургалт хөгжлийн хөтөлбөр явагдаад байна гэж илт мэдэгдэхгүйгээр урсах мэт, өдөр тутмын үйл ажиллагаатай уялдаад урсах мэт хийж чадсан хөтөлбөр хамгийн сайн болсон гэсэн үг. 
Байгууллагын соёлтой нягт уялдсан хөтөлбөр л цааш амьдарч чаддаг. Хэт албадлагын шинжтэй болгоод ажилтануудын дургуйцлийг хүргэвэл хөтөлбөр амжилтгүй болно. Тиймээс анхнаас нь хөтөлбөрийнхөө ач холбогдолыг  ажилтанууддаа сайн ойлгуулж хандлагыг нь бий болгох хэрэгтэй.

2.a. Сургалтын хэлбэр, аргачлалууд
Агуулгын хувьд: 1. Хувь хүний хөгжилд чиглэсэн; 2. Мэргэжлийн ур чадварыг сайжруулах; 3. Ажиллах орчин нөхцөл, текник технологийн шинэчлэлт, ашиглалттай холбоотой сургалт гэсэн 3 чиглэл байдаг.

Сургалтын орчны хувьд: 1. Ажлын байрны сургалт (ажлын байран дээр богино хугацааны); 2. Танхимын сургалт (сургалтын зориулалтын танхимд); 3. Заалны сургалт (Спорт заал ашиглан, хөдөлгөөнт тэмцээнд суурилсан сургалт); 4. Хээрийн сургалт (Хөдөө, байгалийн сайханд, гадаа талбайг ашиглан өрсөлдөөнт тоглоом, уралдаан хийх замаар баг хамт олны уур амьсгалыг зангидддаг сургалт)

Сургалтын аргууд: Лекц, семинараас гадна оролцоонд тулгуурласан аргачлалууд түлхүү хөгжиж байна. Жишээ нь: тоглоомын, дүрд тоглох, багийн ажиллагааны даалгавар биелүүлэх, кейс ажиллах гэх мэт. Сургалтын идэвхитэй олон талт аргачлалуудыг ашигласнаар хөтөлбөр сонирхолтой, үр дүнтэй болдог.

Сургалтын хэлбэр: Биечилсэн сургалтаас гадна доорх хэлбэрүүдийг ашиглавал илүү баялаг хүртээмжтэй болно. Ажилтануудын мэдлэг хүлээн авах онцлогт тохирсон олон талт сургалтын хэлбэрүүд байвал маш сайн.
1. Аудио: Захирал удирдлагуудын лекц яриа болон чадварлаг туршлагатай мэргэжилтнүүдийн хэлсэн үг зэргийг хураагуураар бичиж аудио архив бүрдүүл. Уг бичлэгүүдийг зохистой дараалалд оруулж заавал сонсох хичээлүүд болгон бэлтгэх боломжтой.
2. Видео: Онцгой, чухал ач холбогдолтой, дахин давтагдашгүй лекцүүдийг видео болгож архивла. Мөн техник технологийн ашиглалтын заавруудыг видео хичээл болгож бэлтгэ. Видео хичээлүүдийг цуврал болгож шинэ ажилтануудын заавал үзэх хичээлийн жагсаалт гаргаж үзүүл.
3. Цахим сургалт: Академик мэдлэг дээшлүүлэх, судалгааны чиглэлийн сургалтуудыг цахимаар зохион байгуулах боломжтой.

3. ХӨТӨЛБӨРИЙГ ҮРГЭЛЖ ШИНЭЧЛЭХ
Хөтөлбөрийн явцийг тогтмол дүгнэж сайжруулж байх хэрэгтэй. Байгууллагад тулгарч байгаа асуудал болон ажиглалт, судалгаанд үндэслэн эрэлттэй байгаа сургалтын сэдэвийг тодорхойлж хөтөлбөрт нэмэлтээр оруулж байх нь зөв. Сургалтын агуулга, хэлбэр, сургагч багш нарын чадварыг тогтмол үнэлж, сул талуудыг нь илрүүлж байх хэрэгтэй. Хөтөлбөрийн сургалт -> судалгаа -> үр дүнг дүгнэх -> дахин төлөвлөх гэх мэтээр хөтөлбөрийг тогтмол сайжруулах тогтолцоогоо бүрдүүлэх хэрэгтэй.

Жамсранжавын Лувсандорж
Үндэстэн Баг ХХК