Монголоороо …

Бүгдийг –

        Монголоороо!

Баярлахдаа ч –

        Монголоороо:

Бах цээжин далд,

Хоргол нь хатсан ямаа шиг

Хот сандаан бахирахгүй,

Тугалган шувууд нар хаан ниссэн,

Тугаа ч үзэхээргүй зуурам тулаанд

                                                                                     Үхлүүт шархтай ялсан баатар шиг 

                                                                                     Сүр амьд, дүр мөнх   

                                                                                     Монголоороо баярлах!

                                                                                     Уурлахдаа ч – Монголоороо:

                                                                                     Учиг хив мэт зөөлөн,

                                                                                     Улайд яарах хэрээ шиг

                                                                                    Уулс барайлган гуаглахгүй,

                                                                                    Унтаа, сэрүүний хилд

                                                                                    Зөн чагнах Будда шиг

                                                                                    Өршөөлд ойр,

                                                                                    Өшрөх сэтгэлээс

                                                                                    Ертөнцийн хязгаарт мэт хол, –

                                                                                    Монголоороо уурлах!

                                                                                    Амь хороохдоо ч –

                                                                                    Монголоороо

                                                                                    ”Аргагүй”-н туйлд,

                                                                Задгай, битүү нь залгаатай орчлонд

                                                                Завсар гарган цуулж чадахгүйн эрхэнд,

                                                                Амьсгаан тоо гүйцээх нь ч

                                                                Буян болохоор, 

                                                                Монголоороо хороох! 

                                                                Аврал хайрлахдаа ч –

                                                                Монголоороо:

                                                                 Алга сул,

                                                                 Үржих, хуваагдах нь цугтаа орчлонгийн

                                                                 Үнэнд гэгээ нэмж,

                                                                 Хоногтоо гүйцэх үйлийн үрээр

                                                                 Хорж дүүрэх хүний зовлонд

                                                                 Бурханы бараа болж, –

                                                                 Монголоороо хайрлах!..

                                     Монголоороо!

                                     Бүгдийг монголоороо!..

                                     Мөхлөө ч монголоороо,

                                     Мөнхөрлөө ч монголоороо!

                                                                 Д.Урианхай

Гэрэл зургийн эх сурвалж  http://www.facebook.com/NMCSteam/photos_stream